Romanos 12

1Nchin kub'sane' kyeye' witz'in ex ntzik tu'n txi' kq'o'ne' kxmilale' te Dyos iku' se'n jun oyaj itz', xjan ex b'a'n toj twitz Dyos. Atzunte k'u'lb'ilju' lu axxi'x tu'n txi' kq'o'ne' te Dyos qama kb'inchajuye' tajb'il Qman Dyos. 2Lalun che anq'intle' se'n nche anq'ina xjal toju' tq'ijlalil ja'lo; ape' kb'inchamjuye' kych'exb'eme' che ximane' tu'ntzun tchukjiju' tu'me'l kychwinqlale' ex tu'n telkynik'e' ti'ju' tajb'il Dyos, tz'elx knik'e' ti'ju' b'a'n, ti'ju' ntzalaj Dyos ti'j ex ti'ju' tz'aqlixi'x. 3Noq tu'nju' woklene' saj q'o'n tu'n t-xtalb'il Dyos, qu'mtzun kxe'l nma'n kyeye' kkyaqile' tu'n lalun kub' kximane' qa nimxi'x kyoklene'. Naq o'kx che ximanaye' ti'ju' kb'entil kyu'ne' se'nxju' oklenj matxi' tzaj q'o'n kyeye' tu'n Dyos tuk'ilju' okslab'l tzajni tq'o'n Dyos. 4Qu'n iku' se'nju' qxmilal myanaq junx tten, b'a'npunju' tmuj iqa'ntib', ex mya kkyaqilju' tmuj iqankyib' junx kyajb'en. 5Ikxtzun qtenju', maskye txqan qb'aj naqjunx qxmilal tuk'i'l Jesukrist ex mujlqo'k junjun te juntl se'nju' qxmilal kyuk'ilju' tmuj iqa'ntib'. 6Ate Dyos matxi' tzaj tq'o'n b'a'npun qoklen teyile junjun se'nxju' tajb'il. Qu'mtzun qa matxi' tzaj tq'o'n Dyos qoklen te pakb'al, ati tu'n qpakb'ante tyol se'nxju' qokslab'l ti'j; 7qatzun matzaj tq'o'nju' qoklen tu'n qajb'en kye txqantl, qb'inchanx b'a'nxi'x. Ex alkyete matzaj q'o'n toklen tu'n t-xnaq'tzan, ati tu'n tq'onteju' xnaq'tzb'il kye xjal; 8alkyete matzaj q'o'n toklen tu'n tokten q'uqb'alte kk'u'j txqantl xjal, ati tu'n tb'inchante. Alkyete tzaj q'o'n toklen tu'n toyin kye xjal, q'onx tu'n tkyaqil tk'u'j; alkyetzunte matzaj q'o'n toklen te nejenel, b'inchamju' taq'un tojxi'x tu'me'l; ex alkye matzaj q'o'n toklen tu'n tonin kyi'ju' xjal ati nojqelan toj kychwinqlal, b'incham tuk'i'l tkyaqil tzalajb'il. 9Kk'u'jlam kyib'e' axxi'x junjun tuk'i'l juntl. Kyik'imilju'ye' myab'a'n ex che lpekye' ti'ju' b'a'n. 10Kk'u'jlam kyib'e' kxolilexe' qu'n kyitz'ina kyib'e' ex kyokslam kyib'e' ex kyonim kyib'e' kxolilexe'. 11Kq'onk tilile', lalun che k'ejb'iye' ex che ajb'ene' te Qajaw tu'n tkyaqil kk'u'je'. 12Che tzalajxe' tu'n q'uqli kk'u'je' ti'j Qajaw; tzik'xju' yajb'il kyu'ne'; ex lalun che qene' tu'n kna'n Dyose'. 13Che onine' kyi'ju' okslal ati nojqelan kye; ex che kk'mome' xjal nche pon xb'et-salkyeye'. 14Kqaninxe' k'i'wb'il te Dyos kyib'aju' ljo'n toj kq'ije' kyu'n. Kqaninxe' k'i'wb'il kyib'aj ex lalun che txkon ile' kyib'aj. 15Che tzalajxe' kyuk'ilju' nche tzalaj ex che oq'e' kyuk'ilju' nche oq'. 16Che tenkuye' toj mujb'ab'ltib'il kxolilexe'. Lalun jaw knima'n kyib'e', kq'onk kyib'e' junx kyuk'ilju' xjal me'sqe'. Lalun nok kq'o'n kyib'e' qa tixi'x knab'le'. 17Qama tz'ok b'incha'n myab'a'n kyeye' lalun tz'ok kq'o'ne' t-xel ikxju'. Kq'onk tilile' tu'n kb'inchanteye' b'a'n kwitz kkyaqil xjal. 18Tz'okx tilil kyu'ne' tu'n kyanq'ine' toj nak'b'il kyuk'i'l kkyaqil xjal. 19Lalun tz'ok kq'o'ne' t-xel myab'a'n te juntl ayeye' witz'in ex ntzik, kq'onkjkye' toj tq'ob' Dyos qu'n ate ati toklen tu'n tkub' tz'e'ysante kwitzju' xjal; qu'n iku' ntma'n toju' Tu'jil: Ayinwe' ati woklen tu'n ntz'e'ysante kwitz xjal; ex ayinwe' chin okyel q'onte tu'me'l t-xel kye. 20Ex ikx: Qa in we'yajtiju' ajq'oj ti'ja, q'onxa twa; exqa nk'wajti, q'onxa tk'wa'; extzun qama tb'inchaya ikju' majx kb'el kyeqaxju' tajq'oja tu'n tch'ixaw. 21Qu'mtzun lalun taja tu'n tkub' ti'ja tu'nju' taq'wixil. Ape' b'inchamjuya b'a'n tu'ntzun tkub'ti'ju' taq'wix tu'na.

will be added

X\