Romanos 11

1Ja'lo inchin xjelune' ti'j ja'lu: ¿Ma matxitzunlo tz'el tik'un Dyosju' ttanam? ¡Mixti' sel tik'unte'! Qu'n aj Israel qinawe', tyajajil Ab'raam kxolju' tnej tyajajil B'enjamin. 2Atxi'x tnejel kjawlen sk'o'n aj Israel tu'n Dyos te ttanam; ex na'mx kyel ik'u'n tu'n ja'lo. ¿Ma mixti'tzun b'i'n kyu'ne' ntma'n toj Tu'jil, nyolin ti'j Eliy t-sanjelal Dyos qa okten poqolkye aj Israel toj tna'j Dyos? Ex tma: 3Taye aye'ju' aj Israel matxi' che kub' kb'yo'nju' t-sanjelala ex matxi' che kub' kxitinju' q'olb'eb'l; naqx o'qinkxtle' matxi' chin kyejten, ex ikx kyajb'il tu'n nkub' kb'yo'ne'. 4Atzunte Dyos tzaj ttzaq'we'n te ex tma: Ate' wuqlajk'al lajnaq ichan matxi' tz'el npa'ne' na'm kkub' meje twitzju' witzleb' B'aal. 5Ikxtzun nb'aju' ja'lo, matxi' che jaw t-sk'o'n Dyos jte'tl aj Israel naqx tu'n t-xtalb'il. 6Qatzun tu'n t-xtalb'il Dyos ẍe jaw sk'o'na' myate' tu'n ma'wit kb'incha jun ti'xti'; naqwit ikju', aju' t-xtalb'il Dyos mya'xwitlo b'a'n. 7¿Se'ntzun tten ja'lu? Ma minti' knetju' in kjyo'n aj Israel, aye'tzunju' e'jaw sk'o'n tu'n Dyos knet kyu'n. Ex aye'tzunju' txqantl kub' kych'uẍsa'nju' kyanmi, 8iku' se'n ntma'nju' Tu'jil kjalu: Axte Dyos kub' jpunte knab'l tu'n lalun tz'ok toj kwi', tu'n lalun kyil tu'n kwitz ex tu'n lalun kb'i tu'n kẍkyin ex ikxtzun ktenju' ja'lo. 9Ex ikx ntma'n Dab'i kjalu: Che jawxwit miltz'uju' nimaqwan nche kub' kq'o'n te jun xpatxab' kye ex te tzyub'lkye, tu'ntzun kjaw trakpuj ti'j, ex tu'n tkub' tz'e'ysa'n kwitz tu'n tpaj. 10Che kyajxwit moẍix tu'n lalun che ka'yin; kyejxwit pukyeju' ttze'lkyi'j kukxju'. 11Atzunwe' nxjelu'n: ¿Ma majxtzulo e'kub' tz'aqju' aj Israel jumajx tej kjaw trakpuj? ¡Mikxa'te'! Ape'te' tu'nju' e'kub' tz'aqju' aj Juda, matzaj q'o'nju' kolb'ilkye txqantl xjal mya aj Judaqe' tu'ntzun kjaw xky'aqlanju' aj Israel tu'n tpaj. 12Atzun ja'lo, qa tu'nju' ẍe kub' tz'aqju' aj Juda matz'ajb'en tu'n ttzaj q'o'nju' xtalb'il kye mya aj Juda, mitzunloyate' qama tz'anjtzti'j kyanmi kkyaqilju' aj Juda, nimxi'xloju' xtalb'il tzul q'o'n kye kkyaqil xjal. 13Ex ati jun nyole' wajb'ile' tu'n txi' nma'n kyeye' aye'ye' mya aj Judaqeye'. Ate Dyos saj chq'onweye' ex saj q'onte woklene' tu'n ntene' kxol txqantl xjal mya aj Judaqe', ex inxi'x chin laqje' ti'ju' woklene' lu saj q'o'n tu'n Dyos. 14Wajb'ile' tu'n kjaw xky'aqlanju' nxjalile' kyi'je', tu'ntzun kklet junjun kxol. 15Qu'n qa ate Dyos tej kyeltik'unju' aj Juda etk'amju' txqantl xjal mya aj Judaqe' tu'n kmujb'ante kyib' tuk'i'l, ¿Titi'tzunlo tzultq'o'n Dyos qama tz'anjtzti'j kyanmi jumajtl aj Juda? ¡Junlo anq'ib'l kyeju' kyimnqe' ja'lo! 16Qu'n qa xjansa'n tnejel wab'j nxi' q'et te Dyos, ex ikx tkyaqilju' tq'otjil xjansa'nte', exqa xjansa'nju' tlok' tze ex ikxju' tq'ob' xjansa'n. 17Aye'tzun junjun aj Juda mache el tx'emu'n kse'n tq'ob' tze olib'o, ex mache okptxo'ne' tekyxelju' tq'ob' lu ti'ju' t-xmilal tze, aye'ye' ikqejuye' kse'n Olib'o toj k'ul. Iktzu'n saja' q'o'n toklena tib'aju' tlok' tze ex ti'ju' t-xmilal. 18Ex lalun kmaye' qa aye'qeye' nimxi'x kyoklene' kyekwitzju' tq'ob' olib'o elni tx'e'mu'n, extzunlo qama kb'inchaye', kyna'ku'ye' qa aju' tlok' tze nk'a'chankyeye' ex myayeqeye' nche k'a'chanteju' tlok' tze. 19Qajpelo jaku' kmaye': Iknatzunlo', extzun mache el tx'e'munju' tq'ob' juntl tze tu'n tok ptxo'n ti'ju' olib'o. 20Axte' se'nju' nkma'ne', ma'natzun che el tx'emu'n tu'n tpaj mixti'ju' kyokslab'l, atzunta matz'ok ptxo'na tu'nju' ati tokslab'la. Qu'mtzun lalun jawtnima'ntib'a naq o'kx xob'a twitz Qman Dyos. 21Qu'n qa mixti' xkub'najsa'n kyilju' tq'ob'ku' olib'o tu'n Dyos, ex ikxta lay kub'najsa'nta til tu'n. 22Tz'elx tnik'a ti'j qa b'a'nxi'xte' Dyos exqa kuwte' ikx. Matzaj ttx'u'jil kyi'ju' ẍekub' tz'aq ex nyolin tuk'i'l tk'u'jlalil kyeye'. Qu'mtzun ati tu'n tanq'ina se'nxju' tajb'il Qman Dyos; qatzun minti' ax junta k'elil tx'emu'n tu'n. 23Exqa matz'anjtzti'j kyanmi jumajtlu' aj Juda, che okyel ptxo'n jumajtl tu'n Dyos, qu'n ate Dyos ati tipumal tu'n tb'inchante. 24Qu'n aye'penakye' toj k'ul olib'oqeye' nejku', mache el tx'emune' ex mache ok ptxo'ne' ti'ju' jun olib'o tb'anilxi'x, ¡mitzunlo yakye' aj Juda, xi' ẍe' ela' ti'ju' b'a'n olib'o, che okyel ptxo'n jumajtl ti'jxju' olib'o ja e'eltx'emuna'! 25Wajb'ile' tu'n telkynik'e' ti'ju' tb'is tk'u'j Dyos b'entniti'j tu'n ojtxi' e'ntzik ex witz'in, tu'ntzun lalun kmaye' qa atixi'x knab'le': ayekye' aj Israel makub' kych'uẍsa'nju' kyanmi, ex naq o'kx aj kyokslan txqantl xjal mya aj Israelqe'. 26Ajtzun tb'aj tkyaqil ja'lu, kkyaqilju' aj Israel che kletel, iku' se'n tz'ib'a'n toju' Tu'jil kjalu: Xi' tzula'ju' kolil toj Syon ex ate k'elel q'inte myab'a'n kxolju' tyajajil Jakob'. 27Ex atzun yol ja'lu kjel b'entti'j wu'ne' kyuk'i'l naqa sel wi'ne' kyil. 28Mache okju' aj Israel ajq'oj ti'j Dyos tu'ntpaj min xikyoksla'n tpakb'al b'a'n ex tu'ntzunju' saja' q'o'n anb'il kyeye'; atzunte Dyos inx che tk'u'jla'n aj Israel, e'jaw t-sk'o'n ojtxi' kyajilb'en. 29Qu'n lay tz'el tiq'i'nte Dyos xtalb'il oje tzaj tq'o'n kye ex lay tch'exb'eju' tyol Dyos te txokb'il. 30Iku' se'nkye' ojtxi' mixtoqti' nche okslane' te Dyos, tu'ntzun ja'lo mixti' ẍeniman aj Israel te Dyos, qu'mtzun saja' q'aq'an tk'u'j Dyos kyi'je'. 31Ex ikxtzunkye aj Israel ja'lo mixti' nche niman te Dyos, naqx tu'n ttzaj q'aq'an tk'u'j Dyos kyi'je' ex ikxtzun tjax chix tzul q'aq'an tk'u'j jumajtl Dyos kyi'j. 32Qu'n axte xitzaqpinkye kkyaqilju' aj Israel toju' kpi'sal, naqxwit tu'n ttzaj laqj tk'u'j kyi'j xjal kkyaqil. 33¡Nimxi'xte Dyos tq'inumal, tnab'l ex tojtzqib'l! Mix-a'lox jun kb'entil tchik'b'anteju' t-xim, ex mix-a'lox jun kkaneb'ilju' tb'e toj twitz. 34Qu'n ¿alxi'xkye jun ojtzqilte tnab'l Qman Dyos? ¿Alkye jun kb'antel tq'onte tnab'l Dyos? 35¿Alkye jun xiq'onte jun ti'xti' tnejelxi'x te Dyos tu'ntzun tzaj anjsa'ntlti'j te? 36Mix-a'lox jun qu'n tete' Dyos tkyaqilju' ti'xti', tu'nte Dyos b'enta' ex ate tajaw tkyaqilju' ti'xti'. ¡Nimanxwitju' tb'i Dyos kukxju'! Ikxwitju'.

will be added

X\