Romanos 10

1Ayeqeye' witz'in ex ntzik, axxi'x wajb'ilju'ye' toj wanmiye' ex nxi' nqanine' toj nna'j Dyose' tu'n kkletju' aj Israel. 2Qu'n matxi' tz'el nnik'e' kye qa kyajb'il tu'n kyajb'en te Dyos; naq aju' mixti' nkane' toj kwitz. 3Qu'n minti' nelkynik' se'n tu'n qoka' tnik'alqi'j tu'n Dyos, noqx noktilil kyu'n kyib'xkyib' tu'n kyok te tnik'alti'j; ex mixti' nkyaq' kyib' tu'n kb'inchante tajb'il Dyos. 4Qu'n aju' tkawb'il Moyses atzu' njapun b'aja' tej tul Krist, ex o'kx che k'metela' xjal tu'n Dyos qa nche okslan te Krist. 5Qu'n kyej ttz'ib'a'n Moyses toju' Tu'jil se'n tu'n kk'amliya xjal tu'n Dyos kjalu: Aju' xjal qama japunju' kawb'il tu'n ok k'anq'il tu'nxju' kawb'il. 6Atzun ti'ju' tu'me'l tu'n qk'met tu'n Dyos naq tu'n kyokslab'l intma'n kjalu: Lalun kub' t-ximana: ¿Alkye jun kjawix toj kya'j? —tu'ntzun tku'tz Qajaw Jesukrist—; 7mujqa ¿Alkye jun kb'elix toju' knajb'il kyimni?— tu'n tjatz anq'inju' Jesukrist tu'n kxol kyimni. 8¿Titi'tzunju' ntma'n?: Aju' tyol Dyos nqaku' ta' tk'etza, toj ttziya ex toj tanmiya. Atzunju' yol lu aj nxi' qpakb'a'n nyolin ti'j okslab'l. 9Qama tchik'b'aya tu'nku' ttziya qa a Jesukrist Qajaw, exqa ma tokslaya toj tanmiya qa tu'n Dyos jatza' anq'in kxol kyimni, kkleteltzuntziya. 10Qu'n qama qoksla tu'n tkyaqil qanmi qo k'amleltzuntz tu'n Dyos exqa ma qchik'b'a tu'n qtzi qa a Jesus Qajaw qo kleteltzuntz. 11Qu'n intma'n toj Tu'jil tyol Dyos kjalu: Lay che kub' ch'ixwiju' matz'ok qe kk'u'j ti'j. 12Junelniqe' xjal toj twitz Dyos, b'a'ntzun qa aj Juda mujqa mya; qu'n axte Dyosju' kye kykyaqil xjal ex intzaj tq'o'n k'i'wb'il nimxi'x kyeju' nche kub'san twitz. 13Qu'n aja'lu aj in ntma'n: Kkyaqilju' nche kub'san te Dyos, kb'elti'ju' kolb'il kyu'n. 14¿Se'n taq'witzun tu'n kkub'san twitz extzunqa na'mx kyokslan te? ¿Ex se'n che okslala' te extzunqa na'm kb'inteju' tyol? ¿Ex se'n taq'wi tu'n kb'inte tyol Dyos qa mix-a'lox jun nxi' pakb'ante kye? 15¿Ex se'n taq'wi tu'n txi' kpakb'a'n tyol Dyos kye qa mya chq'o'nqe'? Iku' se'n intma'nju' Tu'jil: ¡Majx tb'alnilxi'x kyulenju' xjal nche tzaj q'inte b'a'n tpakb'al! 16Naqtzun aju' mya kkyaqil nxi' kb'i'nju' tpakb'al b'a'n. Ikse'n intma'n Isayiy kjalu: Taye, ¿alxi'xkye sokslan tu'nju' qpakb'ab'le'? 17Iktzu'n, tu'nju' pakb'ab'l in qb'i'n nqo okslana', ex atzunju' pakb'ab'l in qb'i'n aju' tyol Krist. 18Atzun nchiwe': ¿Ma na'mxtzunlo kb'inteju' pakb'ab'l lu? ¡Matxina' kb'ikye'! Qu'n ina' tma'nju' Tu'jil kjalu: Aju' tq'ojq'ojel kwi'ju' pakb'al matxi' b'injtz toj tkyaqil twitz tx'otx', ex matxi' che ponju' kyol tzmax ttxa'nxi' tx'otx'. 19Ex nxi' nma'n jumajtle': ¿Ma na'mxtzunlo telkynik'ju' aj Israel ti'j? Matxi' kanete' toj kwitz, qu'n tnejelxi'x intma'nju' kyejni ttz'ib'a'n Moyses toj Tu'jil kjalu: Knb'incha'ye' kyi'j aj Israel tu'n kjaw xky'aqlan ti'j jun tnam nakuj mya tnam toj kwitz; knb'incha'ye' tu'n ttzaj ktx'u'jil ti'j jun tnam mixti'x nkyaj tu'n tkane toj kwitz. 20Yajxitzuntel tmate Isayiy kjalu: Aye'ju' mixti'toq nche' jyon wi'je', matxi' chin elyale' kyu'n; ex matxi' nyek'un wib'e' kyeju' mixti'toq nche' qanlaqj wi'je'. 21Atzunju' tz'ib'a'n tu'n Isayiy toj Tu'jil kyi'j aj Israel intma'n kjalu: Tkyaqil q'ij nchin txokone' te jun tnam min nokslan ex pi's, chiju' tz'ib'a'n tu'n Isayiy.

will be added

X\