Romanos 1

1Ayine' Pawl tmajen Jesukrist qine', ntxokliye' tu'n Dyos tu'n tokq'o'n woklene' te chq'o'n ex machin jaw sk'o'ne' tu'n nyoline' ti'ju' tpakb'al b'a'n. 2Aju' tqanil lu tzajni tziya'n atxi'x ojtxi' kyu'nju' t-sanjelal Dyos toju' Xjan Tu'jil. 3- 4Aju' tqanil lu atzu' nyolina' ti'j tk'wal Dyos Qajaw Jesukrist, itz'j se'nte xjal ex atzu' tzaja' ti'j tyajajil nimaqkawil Dab'i, ex tej tjatz anq'in kxol kyimni atzuntzu' tyek'uya Xewb'aj Xjan qa tk'wal Dyos tuk'ilju' tipumal. 5Naqx tu'nel Jesukrist saja' q'o'n woklene' tu'n wokye' te chq'o'n, ex luqine' nchin ajb'ene' te, tu'ntzun kyokslan xjal toj kkyaqil nimaqtnam. 6- 7Kxoltzu'n kkyaqil xjal lu ate'qeye' aj Rom. Ate Dyos nche k'u'jlanjtze' tu'n ex matxi' che txokliye' tu'n kyokye' te Jesukrist tu'n ex tu'n kyokye' kxolju' ttanam Xjan. Awttzun Qman Dyos ex Qajaw Jesukrist che k'iwlankyeye' ex tenwitju' nak'b'il kyeye'. 8Tnejelxi'x nxi' nq'o'n chjonteye' te Dyos toj tb'i Jesukrist kyi'je' kkyaqile', qu'n matxi' kub' puqli tqanil kyi'je' qa wa'lqexixe' toj kyokslab'le'. 9Ate Dyos nchin ajb'ene' te tu'n tkyaqil wanmiye' ex nchin pakb'ane' tiju' tpakb'al b'a'n ti'ju' Tk'wal, k'okyel te tziyal wi'je' qa jachq'al nche kub' nna'ne' toj nna'j Dyose', 10Ex nchin kub'sane' twitz Dyos toj nna'j Dyose' tu'n ttzaj tq'o'n anb'il weye' tu'n npone' ka'yilkyeye', oklo kb'entel qa ax t-xtalb'ilju'. 11Qu'n wajb'ile' tu'n tok nka'yine' kwitze' ex tu'n wonine' kyi'je' toj kyokslab'le', tu'ntzun kwe'xixe'; 12mujqa tu'n qoninte qib' toj qokslab'l, qu'n ajnpone' kxole' chin tzajel kyonine' ex che kxe'l wonine'. 13Wajb'ile' tu'n kb'inteye' witz'in ex ntzik qa b'a'npunxi'maj kub' nximane' tu'n npone' ka'yilkyeye', naqtzun aju' mixti'x nb'ent npone'. Awe' wajb'il tu'n npone' pakb'alte tpakb'al b'a'n kxole' se'nxju' matxi' nb'inchaye' kyoj txqantl nimaqtnam. 14Ilxi'xti'j tu'n txi' nma'ne' tpakb'al b'a'n kye kkyaqil xjal; ati kyojtzq'ib'l mujqa mixti' kyojtzqib'l, atixi'x knab'l mujqa mixti' knab'l; 15qu'mtzun inxi'x k'atjne weye' tu'n txi' nma'ne' tpakb'al b'a'n kyeye' ayeye' najlqe'ye' toj Rom. 16Lay chin ch'ixwiwe' tu'n txi' nma'ne' tpakb'al b'a'n, qu'n tipumalna' Dyos, tu'ntzun kkyaqilju' mache okslan te ok che kletel tu'n, aye'ju' aj Juda tnejelxi'x ex ikqexju' mya aj Juda. 17Qu'n aju' tpakb'al b'a'n ntzaj yek'unte qe se'ntaq'wi tu'n qoka' tnik'alti'j: tu'nju' qokslab'l qo okyela' tz'aqlixi'x. Ikna' ntma'nju' toju' Tu'jil: Atzu' k'anqilaju' xjal tnik'alti'j tu'nju' tokslab'l. 18Ex nimju' xjal taq'wix ex mya tnik'alkyi'j nkub' kymqo'nju' axxi'x tu'nju' kyb'inchb'aj myab'a'n. Ate Dyos ati toj kya'j kb'el tz'e'ysante kwitz tu'nju' mya tnik'alti'jqe'. 19Qu'n kkyaqil xjal ojtzqi'n kyu'n qa ati Dyos, qu'n axte saj yek'untetib' kye; 20maskye minti' q'ancha'lte Dyos, atzu' nela' qnik' ti'j tu'nju' taq'unb'en b'ent ojtxi', tej tkub' tb'incha'n twitz tx'otx' ex layx b'aj tipumal. Qu'mtzun mixti'x tu'me'l tu'n kmante xjal qa mixti' Dyos exqa mixti' kyil. 21Ex maskye matxi' kyilju' Dyos, mixti'x njaw knimsa'nju' tb'i, naku'j mya Dyos kye ex mixti' nxi' kq'o'n chjonte te. Xipe' nche ximana' tu'n kb'inchante ti'xti' taq'wix mixti'x kyoklen extzunju' kyanmi atzu' ta'ya' toj qxopin. 22Impe' kyma'n qa atixi'x knab'l, extzun mixti'x b'a'n kyu'n. 23Qu'n min nche k'uluntl twitzju' Dyos itz' tejumajx, xi'pe' nche' k'uluna'tl kywitzju' kyilb'ilal xjal nche kyim ex kwitz kyilb'ilal pich', kwitz kyilb'ilal txkup kyaje' kqan ex txup nche qititinje. 24Qu'mtzun matxi' che kyajkolb'e'n tu'n Dyos tu'n tpaju' kyb'inchb'en taq'wix, ex tu'nju' kxim taq'wix matxi' kub' kb'incha'n ti'xti' tuk'i'l kxmilal ch'ixb'ajilx. 25Matxi' kub' kych'exb'e'n tyol Dyos axxi'x tuk'ilju' chajyolil, ex atzu' nche k'uluna'tl kwitzju' tch'isb'en Dyos, ex myatzu' twitzku' Dyos b'inchante tkyaqilju' ti'xti' ati twitz tx'otx' aj ati tu'n tnimet tb'i tejumajx. Ikxwitju'. 26Qu'mtzun matxi' che kyej tzaqpi'n tu'n Dyos tu'nju' kb'i'nchb'aj ch'ixb'ajilx. Kse'nqe' qya kyxol min nche kub' kẍetl kyuk'i'l ichan, axtzu' kyajb'ila' tu'n kkub' kẍe kyuk'i'lx qya; 27ex ikxqeju' ichan min kyajb'iltl tu'n kkub' kẍe kyuk'i'l qya, xi' npona'tl kk'u'j kyi'jx ichan. Tu'ntzun ja'lu makb'incha txqan ti'xti' ch'ixb'ajilx ex matxi' tzaj q'o'n tz'e'ysb'il kywitz ti'jx kyxmilal tu'n Dyos tu'nju' ẍe' eltxalpuj ti'ju' b'a'n. 28Qu'n mixti'na' xkyaj tu'n telkynik' te Dyos, axte' Dyos xitzaqpinkye tu'n tchukjiju' knab'l ex tu'n kyb'inchante aju' myab'a'n. 29Matxi' noj kyanmi tu'n taq'wixil, pi'sqe', jamjolqe' ex b'inchal taq'wixqe'. Intx'a'l ti'j kk'u'j kyi'j xjal, b'yol xjalqe', jyol q'ojqe', sb'ulqe', b'inchal myab'a'n qe' ex jk'ul yolqe'. 30Inche yolin myab'a'n kyi'j txqantl, ajq'ojqe' ti'j Dyos, twi' yasulqe', taq'wixqe' ex nimal kyib'; aye'x nche' jaw ximante taq'wixil, min nche okslan kye kyman, 31mya kyajb'il tu'n tkaneju' axx toj kwitz, mixti' njapunju' kyol, mixti' kyk'u'jlalil, mixti' ntzaj laqj kyk'u'j. 32B'i'n kyu'n b'a'nxi'x intma'n toj tkawb'il Dyos qa ati tu'n kykyimju' xjal nche b'inchante tkyaqil ja'lu; extzun ilti'j teqe'k b'inchalte ex inxi'x che tzalaj kyi'ju' nche'x b'inchante myab'a'n.

will be added

X\