Apocalipsis 8

1Tej tel tlaqu'n Qpoj Tman Rit twuqi'n sey jupb'ilte u'j, majx e'kyaj nume nik'jan or ju' te toj kya'j. 2Ex e'wile' wuq anjl wa'lqe'toq twitz Dyos, b'ajx q'o'n wuq chun kye. 3Yajxi'tzuntl ul juntl anjl q'i'n jun q'anpwaq xq'aq'b'il tu'n, ex kub' we' twitz q'olb'eb'l; xiq'o'n txqan sturak te tu'n tkub' tq'o'n tib'aju' q'anpwaq q'olb'eb'l, atitoq twitzju' q'uqb'il, tuk'i'lxi' kyna'j Dyos tnam xjan. 4Jawju' t-sb'el sturak toj tq'ob'ju' anjl twitz Dyos, kymoju' kyna'j Dyos tnam xjan. 5Jawtzun ttzyu'n anjl xq'aq'b'il, kux tnojsa'n tu'n ttxalq'aq' tib'aj q'olb'eb'l, ex xit-xon tib'aju' tx'otx'; ex e'q'ajt q'ankyaq, tq'ojq'ojel towi'yj, xloq'lokya'j ex tzaj kyajnajnab'. 6Kyb'incha kyib'ju' wuq anjl b'ajx q'o'n chun kye tu'n kyq'ajtzante. 7Xitq'ajtza'n tnejel anjl tchun, ex b'aj tzaj xon saqb'aqun ex q'aq' smo'n tk'i chik' twitz tx'otx'. B'aj tz'e'y jun toxi'n aq'pun twitz tx'otx', kyuk'i'lxi' jun toxi'n aq'pun tze ex tkyaqilju' cha'x k'ul. 8Xitq'ajtza'n tkab' anjl tchun, ex pon xon jun toj ninnjab' naku'j nin witz nk'ant q'aq' ti'j; ex jawb'ent jun toxi'n aq'punju' ninnjab' te chik'. 9Eb'aj kyim jun toxi'n aq'pun te tkyaqilju' ate' toj ninnjab', ex eb'aj xitj jun toxi'n tneju' b'ark. 10Xitq'ajtza'n toxi'n anjl tchun, ex tzaj tz'aq jun ninche'w twitz kya'j, nk'ant naku'j tqantaq' q'aq', ex kub' tz'aq tib'aj jun toxi'n aq'pun kye nin a' ex kyib'aj t-xiklil a'. 11Tk'ayil tb'iju' che'w; ex jaw k'ayix jun toxi'n aq'punju' a', nim xjal eb'aj kyim tu'nju' k'a a'. 12Xitq'ajtza'n tkyaji'n anjl tchun, ex b'o'lj jun toxi'n aq'punju' q'ij, jun toxi'n aq'punju' xjaw ex jun toxi'n aq'pun kyeju' che'w. Majx kyej qloljix jun toxi'n aq'pun kye, ex min e'k'ant jun toxi'n aq'pun te jun q'ij ex te qonik'an. 13Xinka'yi'ntle' ex wile' jun t'iw intoq lipan twitz kya'j ex intoq jawtma'n kuw kjalu: ¡Qab'anx kywitzju' xjal najlqe' twitz tx'otx', ajkyq'ajtiju' chun che xe'lkyq'ajtza'n oxe'tl anjl!, chij.

will be added

X\