Apocalipsis 7

1Yajxi'tzuntl e'wile' kyaje' anjl wa'lqe' kyoju' kyaje' ttx'u'k tx'otx', tzyu'nqe' kyaje' kyq'iq' kyu'n tu'n lalun tzaj kyxupxi'n twitz tx'otx' ex tib'aj ninnjab', ex kyib'aju' tze. 2Ex wile' juntl anjl xi'toq ttzaj tu'me'l tjawetzq'ij, q'i'ntoq t-sey Dyos itz' tu'n. Jaw ẍch'inju' anjl lu kuw kyeju' kyaje'tl matxitoq kyk'am kyipumal tu'n kyk'ixb'san twitz tx'otx' ex toju' ninnjab', kjalu: 3¡Lalun kyk'ixb'saye' twitz tx'otx', toj ninnjab' exqe' tze, qa na'mxtoq tok qq'o'ne' kyechelju' tmajin Qman Dyos kyplaj! chij. 4Ex nb'iye' kyajlalju' b'jo'kni kyechel: wajxaqlajoj mutx' (144,000) kyb'aj kyxol kykyaqilju' tnej tyajajil Israel. 5Jumutx' lajk'al (12,000) ok kyechel kyxol tnej tyajajil Juda, jumutx' lajk'al (12,000) kyxol tnej tyajajil Rub'en, jumutx' lajk'al (12,000) kyxol tnej tyajajil Kad, 6jumutx' lajk'al (12,000) kyxol tnej tyajajil Aser, jumutx' lajk'al (12,000) kyxol tnej tyajajil Neptali, jumutx' lajk'al (12,000) kyxol tnej tyajajil Manases, 7jumutx' lajk'al (12,000) kyxol tnej tyajajil Simeon, jumutx' lajk'al (12,000) kyxol tnej tyajajil Leb'i, jumutx' lajk'al (12,000) kyxol tnej tyajajil Isakar, 8jumutx' lajk'al (12,000)kyxol tnej tyajajil Sab'ulon, jumutx' lajk'al (12,000) kyxol tnej tyajajil Jse, ex jumutx' lajk'al (12,000) kyxol tnej tyajajil B'enjamin. 9Yajxi'tzuntl, xinka'yi'ne' ex wile' nim txqan xjal te kykyaqil nimaqtnam, chukchaq kyyajil, chukchaq kyyol ex te chukchaq tnamqe'. Wa'lqe'toq twitzju' q'uqb'il twitzju' Qpoj Tman Rit, nim txqan kyb'aj, mix-a'lo'x kb'antel tajlante. Toktoq kyxb'alun saq ex q'i'ntoq tq'ob' tut kyu'n. 10Kykyaqil intoq jaw kyẍch'in kuw kjalu: ¡Tu'nte Qman Dyos xqo kleta' aju' q'uqli tib'aju' q'uqb'il, ex tu'n Qpoj Tman Rit! chechij. 11Kykyaqilju' anjl wa'lqe' ti'jileju' q'uqb'il ex kyi'jile kyaje' itz'qe'; ex e'kub' meje twitzju' q'uqb'il majx ku'pun kyplaj twitz tx'otx', ex ek'ulun te Qman Dyos 12intoq kyma'n kjalu: ¡Ikxwitju'! Awttzu' che q'onjtza' b'itz, ajwalb'il, nab'l, aq'b'il chjonte, oklenj, ipumalj ex kuwal te Qman Dyos toj tkyaqil tab'q'iyil. ¡Ikyxwitju'! chechij. 13Tzajtzun tqani'n jun kyxolju' tijwnaq weye' kjalu: ¿Alkyeqe'tzu'n tok kyxb'alun saq lu, ex jaẍe tzaja'? chij. 14Aya ojtzqilte taye, nchije' xintzaq'we'ne'. Tzaj tma'ntzuntz weye': Aye'kye matxi' che ik'ju'lu toju' ninyajb'il, aye' matxi' kyẍtilsa kyxb'alun tu'n tchk'el Qpoj Tman Rit. 15Qu'mtzun ate' twitzju' tq'uqb'il Dyos, nche ajb'en te toju' tja q'ijtl ex qonik'an. Aju' q'uqli tib'aj tq'uqb'il kxq'uqilkye tjaq' t-xmuj. 16Lay tzajtl we'yaj ex k'waj kyi'j, ex lay che tze'ytl tu'n q'ij, ex lay che yajtitl tu'n kyaq, 17qu'n aju' Qpoj Tman Rit ati toju' q'uqb'il, kk'ik'lel kyi'j ex che kxe'ltiq'i'n ja ta'qe' t-xiklil a' te chwinqlal, ex k'elel t-sun Dyos tkyaqil ta'l kywitz, chij weye'.

will be added

X\