1 Wile' jun u'j tzyu'n tu'n tb'anq'ob'ju' q'uqli toju' q'uqb'il, tz'ib'a'ntoq tojxi' ex ti'jxi', ex jpu'ntoq kyu'n wuq sey. 2 Ex wile' jun anjl nimtipumal intoq xjelun njaw tq'ojq'ojel twi' kjalu: ¿Alkye ati toklen tu'n kyel tlaqu'n sey ex tu'n tjqonteju' u'j? chij. 3 Mixtzun alo'te jun toj kya'j, twitz tx'otx' ex tjaq' tx'otx' tu'nwt tb'ent tjqonteju' u'j, expe' tu'nwt tkub' tka'yi'n. 4 Inxixtoqtzun chin oq'e', qu'n mix-a'lo'x te jun nknet atiwt toklen tu'n tjqonteju' u'j, ex tu'nwt tkub' tka'yi'n. 5 Tzajtzun tma'n junju' tijwnaq we'ye': Lalun tz'oq'tla, qu'n matxi' kub'ti'j tu'n b'alun kyxol tnej tyajajil Juda, t-xul Dab'i, kb'antel kyel tlaqu'n sey ex tu'n tjqonteju' u'j, chij. 6 Wiltzu'ne' Qpoj Tman Rit nqaku' tk'etzju' q'uqb'il kyxolju' kyaje' itz'qe', ex kyxolju' tijwnaq. Wa'ltoq, ex q'ancha'l qa ojetoq kub' te chojb'il. Ate'toq wuq tuk'a ex wuq twitz, aye' wuq t-xew Dyos chq'o'nqe' toj tkyaqil twitz tx'otx'. 7 Tzaju' Qpoj Tman Rit lu eltiq'in u'j toj tq'ob'ju' q'uqlitoq tib'aju' q'uqb'il; 8 ex tej txi' ttzyu'n u'j, eb'ajkub' mejeju' kyaje' itz'qe' exqe' junaq kyaje' tijwnaq twitzju' Qpoj Tman Rit. Kykyaqil atitoq kychinab' arpa, ex q'i'nqe'toq tkb'el k'wab'j q'anpwaq kyu'n nojniqe'toq tu'n sturak, aye' kyna'j Dyos okslal ttanam Dyos. 9 Ex intoq che b'itzan b'itz ak'a'j kjalu: Ateju'ya ati toklena tu'n ttzyunteya u'j ex tu'n kyel tlaqu'na jupb'ilte, qu'n kub' q'o'na te chojb'il; ex tu'nju' tchk'ela elqojli e'tkola xjal te tkyaqil kyajil, chukchaq kyol ex te kykyaqil nimaqtnam, tu'n kyok teku'xi'x Dyos. 10 Mache oktq'o'na toj jun kawb'il, mache oktq'o'na te pale tu'n kyajb'en te Dyos, ex che kawil twitz tx'otx', chechij. 11 Wiltltzuntze', ex nb'iye' jawkyma'n txqan anjl kuw ate'toq ti'jileju' q'uqb'il, exqe' itz'qe' exqe' tijwnaq. Nimxi'xtoq txqan kyajlal, 12 intoq jawkyma'n kuw kjalu: ¡Aju' Qpoj Tman Rit kub' q'o'n te chojb'il ati toklen tu'n tk'monte ipumalj ex q'inumal, nab'l ex kuwal, oklenj, ninb'il ex ajwalb'il! chechij. 13 Ex nb'iye' intoq kyma'n kykyaqilju' tch'isb'en Dyos toj kya'j, twitz tx'otx', tjaq' tx'otx' ex toj ninnjab', kjalu: ¡Tewtju' q'uqli toju' q'uqb'il ex tewtju' Qpoj Tman Rit, che'xa' q'o'na' b'itz, ninb'il, ajwalb'il ex ipumalj toj tkyaqil tab'q'iyil! chechij. 14 Intoq xikytzaq'we'n kyaje' itz'qe' kjalu: ¡Ikyxwitju'! chechij. Aye'tzu'n junaq kyaje' tijwnaq e'kub'meje ex e'niman te Dyos.
