Apocalipsis 22

1Tzaj tyek'u'n anjl jun nin a' ẍnu'l, te chwinqlal tejumajx, weye'. Ẍtiluntoq kse'n kristal, ntoq etz tk'etzju' tq'uqb'il Dyos ex tq'uqb'il Qpoj Tman rit. 2Intoq ch'iyu' tze te chwinqlal toju' ninb'e toju' nintnam ex tojunjun plaj ttzi nin a', intoq witzan atl junjun xjaw, kab'lajoj maj nwitzan tojun ab'q'i; atzu'n t-xaqu' tze najb'en q'anb'ilkye nimaqtnam. 3Mixti'tlte kjel tjaq' qanb'en taq'wix atzu'. Ktenb'elu' tq'uqb'il Dyos ex tq'uqb'ilu' Qpoj Tman rit toju' nintnam, ex che k'ululju' tmajin te. 4K'okyelku' kyka'yi'n Dyos, ex ktenb'elu' tb'i tz'ib'a'n kyplaj. 5Lay ten qonik'an toju' nintnam lu, ex lay tz'ajb'en tqan kantil mo t-spik'umal q'ij toj, qu'n a Qman Dyos q'olte spik'un toj, ex che kawil toj tkyaqil tab'q'iyil. 6Tzaj tma'n anjl weye' kjalu: Ax qekye' yol lu ex q'uqb'an ku'jalqe'. Aju' Qajaw, axju' Dyos nxewsante yol kye t-sanjela, matzaj tchq'o'n tanjl tu'n tyek'u'nteju' tzulkanun lwiy kye tmajin, chij. 7¡Chin ule lwiy! ¡Tzalajb'il teju' nxitb'i'n tpakb'al b'a'n q'ma'ntl tz'ib'a'nku'x toju' u'j lu!, chij. 8Ayine' Xwan, wile' ex nb'iye' ja'lu. Tetzunj tb'aj nka'yi'ne' ex tb'anb'i'ne', nkub' mejeye' t-xetqanju' anjl tzaj yek'unte tkyaqil ja'lu, tu'n nk'ulune' twitz. 9Atzunte tzaj tma'n weye': Lalun tb'inchaya lu, tmajin Dyos qinwe', kse'nx aya ex kse'nqe' t-sanjelal Dyos, ttzika mo titz'ina, ex kse'nqe'ju' nxikyb'incha'n tz'ib'a'n toju' u'j lu. K'uluna te Dyos, chij. 10Ex tzaj tma'n weye': Lalun kub' tjpu'na tpakb'al q'ma'ntl toju' u'j lu, qu'n ch'inxtl kyjapun. 11Xk'eku' b'inchal taq'wixju' qa ljo'nx tb'inchan taq'wix, exu' xjal tz'il, tz'ilsamtib' kukxju'; atzu'n b'a'n tchwinqlal, q'onk tilil tu'n tb'inchante b'a'n, exju' okslal q'onk tilil tu'n t-xjansantetib', chij. 12Luqine' chin nul, ex tzul wiq'i'ne' oyaj kxe'l nq'o'ne' teyile junjun kse'nxju' tb'inchb'aj. 13Ayine' tnejel ex mankb'il techtz'ib', t-xetnejel ex te b'ajsb'ill. 14Tzalajb'il kyeju' nkytxjo'n kyxb'alun tu'n tten kyoklen ti'ju' tze te chwinqlal ex tu'n tb'ent kyokx kyoju' ttzi nintnam. 15Aye'tzu'n b'inchal myab'a'n che kjelten ti'jxi', aye' nche k'a'n, e'ajpajil, eb'yol xjal, e'k'lul witzleb' ex kykyaqilju' majx kgan tu'n kysb'un. 16Ayine' Jesus, matzaj nchq'o'ne' wanjle' tu'n tb'ajx tma'n tkyaqil ja'lu kye okslal. Ayine' t-xul tyajajil Dab'i. Ayine' che'w nxi'x qoptz'aj te prim, chij. 17Nkyma'n Xewb'aj Xjan tuk'i'l t-xu'jil Qpoj Tman rit kjalu: ¡Kutzaja! Ex ikx alkye ma b'inte, q'manx: ¡Kutzaja! Chiku'. Ex alkye nk'wajti ex tajb'il tk'wa', kuttzaj tu'n tk'wan naqkukx ti'ju' a' te chwinqlal. 18Kykyaqilju' mache b'inte tpakb'al q'ma'n toju' u'j lu, kxe'l nma'ne' kye: Qa ati jun majaw tch'isa'ntl tib'aj, ktzajel tq'o'n Dyos yajb'il tib'aj nimxi'x kyetwitzu' q'ma'n toju' u'j lu. 19Qatzun ati jun matz'el tiq'i'n ti'ju' tpakb'al q'ma'n toju' u'j lu, k'elel tiq'i'n Dyos toklen ti'ju' tze te chwinqlal ex toju' xjan nintnam tz'ib'a'n toju' u'j lu. 20Intma'nju' nchik'b'ante ja'lu, kjalu: Axxi'x, luqine' chin nul, chij. Ikyxwitju'. ¡Kutzaja Wajaw Jesus! 21Tenxwit t-xtalb'il Qajaw Jesus kyib'aje' kykyaqile'.

will be added

X\