Apocalipsis 21

1Yajxi'tzuntl wile' jun ak'a'j kya'j ex jun ak'a'j tx'otx'; qu'n mixtoq ti'qe'tlkye' tnejel kya'j exju' tnejel tx'otx', exju' ninnjab'. 2Wile' xjan nintnam, ju' ak'a'j Jerusalen, xi'toq tku'tz toj kya'j twitz Qman Dyos. B'incha'ntoq tib' kse'n jun txin tok t-xb'alun twitzju' q'a xi' tmje tuk'i'l. 3Ex nb'iye' jun tzaj yolin kuw tk'etzju' q'uqb'il, ntoq tma'n: Luju' janajla' Dyos kyuk'i'lju' xjal. K'anq'il kyuk'i'l, ex che okyel te ttanam, ex aku' Dyos ktenb'el kyuk'i'l tu'n kyk'ulun te. 4K'elel t-sun ta'l kywitz, ex lay tzajtl kamik kyi'j, lay che oq'tl, lay tzultl toj kyk'u'j, lay che oktl toj k'ixk'oj; qu'n tkyaqilju' atitoq nejtl, mixti'qe'tl, chij. 5Tmaju' q'uqli tib'aju' q'uqb'il kjalu: Tkyaqilju' ti'xti' che nb'incha'ye' ak'a'j, chij. Ex tma: Tz'ib'anku'ya, qu'n ax qekye' yol lu ex ati tu'n tqe tk'u'jlalil, chij. 6Yajxi'tzuntl tzaj tma'n weye': B'antnitlte'. Ayine' tnejil ex b'ajsb'il techtz'ib', te ttzajlen qe ex te jakpomela' b'aj. Alkye nk'wajti, kxe'l nq'o'ne' tk'wa' ti'ju' t-xiklil a' te chwinqlal, mya loq'oj. 7Alkye ma kanb'an, tk'ma' tkyaqil ja'lu te tetzb'il; kk'ulul weye' ex k'okyel ten k'wale' ayine' Dyos. 8Aye'tzu'n mya'l che xob', exqe' mya okslal, e'myab'a'n kyb'inchb'aj, eb'yol xjal, e'ajpajil, e'ajk'a, e'k'lul witzleb', ex kykyaqilju' chalyol, che kxe'l toju' njab' q'ol ntz'e'y, aju' tkab' kamik, chij. 9Ultzun jun kyxolju' wuq anjl nk'etze', ju' q'i'nqetoqu' wuq k'wab'l kyu'n nojnqe' tu'n wuq yajb'il kuwqexi'x te b'ajsb'il ex tma weye' kjalu: Kutzaja, kxel nyek'u'ne' txin ch'inx tmje teya, aju' t-xu'jil Qpoj Tman rit, chij. 10Naku'jtzun toj witzik' tzaj tyek'u'n Xewb'aj Xjan weye', nxitiq'i'ne' anjl twi' jun nin witz ex nimin twe', ex tzaj tyek'u'n xjan nintnam Jerusalen weye', ljo'ntoq tku'tz toj kya'j twitz Dyos. 11Intoq qoptz'aju' nintnam tu'n t-spik'umal Dyos; ikytqoptz'ajel se'n jun tb'anil ab'j, kse'n jun tal ab'j jaspe, ẍtilun kse'n kristal. 12Atitoq jun nintapi nimin twe' ti'jileju' nintnam, ate'toq kab'lajoj tjpel, ex atitoq jun anjl tojunjun tjpel; tz'ib'a'ntoq kyb'iju' kab'lajoj tnej tyajajil Israel kyi'ju' tjpel. 13Oxe' tjpel ate'toq tu'me'l tjawetzq'ij, oxe' tu'me'l tb'a'nq'ob'kya'j, oxe' tu'me'l tnayajkya'j, oxe' tu'me'l tkub'exq'ij. 14Ate'toq kab'lajoj ab'j te tq'uqlilju' nintapi ti'ju' nintnam, tz'ib'a'ntoq kyb'i kab'lajoj t-apostl Qpoj Tman rit kyi'j. 15Q'i'ntoq jun ajlaj q'anpwaq echb'ilte nintnam, e'tjpel exju' nintapi, tu'n anjl ntoq yolin wuk'i'le'. 16Juniletoqu' nintnam kyoju' kyaje' ttx'u'k; kyinxtoq tnuqub'u' se'n twitz. Kub' techa'n anjlju' nintnam tu'n ajlaj: junk'al wuqnaq lajoj (2,200km.) ajlab'; kyinx tnuqub'ju', kyinx twe'ju' ex kyinx twitzju'. 17Xitecha'ntlu' nintapi: tetoq oxnaq jwe' (65) metr, ax echb'ente tu'n anjl kse'nx che echan xjal. 18Ab'j jaspeyileju' nintapi b'incha'n, atzu'n nintnam q'anpwaqilexi'x, kse'n b'idr ẍtilsa'n. 19Wiqo'n kyi'ju' ab'j te tq'uqlil kyu'n tkyaqil ch'ix tb'anil ab'j: aju' tnejel kyu'n tal ab'j jaspe; atzu'n tkab' kyu'n ab'j sapiro; atzu'n toxi'n kyu'n ab'j akata; atzu'n tkyaji'n kyu'n cha'x ab'j; 20atzu'n tjwe'yi'n kyu'n ab'j onise; atzu'n tqaqi'n kyu'n kyeq ab'j; atzu'n twuqi'n kyu'n ab'j krisolit; atzu'n twajxaqi'n kyu'n ab'j b'erilo; atzu'n tb'eljoji'n kyu'n ab'j topasyo; atzu'n tlajoji'n kyu'n ab'j krisopras; atzu'n tjunlajoji'n kyu'n ab'j jasint; atzu'n tkab'lajoji'n kyu'n ab'j amatist. 21Aye'tzu'n kab'lajoj tjpel kab'lajoj tb'anil xlikqe'; teyile junjun tjpel b'incha'n junx cha'x ab'j. Atzu'n b'e toju' nintam q'anpwaqile, kse'n b'idr ẍtilun. 22Minti' wile' jun ja te k'u'lb'il toju' nintnam, qu'n a ja xjanju' toj, aku' Qman Dyos nimtipumal exju' Qpoj Tman rit. 23Min nojqelan q'ij ex xjaw tu'n kyk'ant toju' nintnam, qu'n aku' t-spik'umal Dyos nspik'b'ante toj, ex a tkantilju' Qpoj Tman rit. 24Che b'etelu' xjal kye nimaqtnam toj t-spik'umalju' nintnam, aye'tzu'n nimaqkawil twitz tx'otx' kxelkyq'o'n kyq'inumal toj. 25Lay che jpetu' tjpel te q'ijtl, ex lay ten qonik'an toj. 26Kb'ajxel q'o'n kyq'inumal ex kyxa'wanku'yil nimaqtnam te; 27ex lay tz'okx jun tz'il toj, ex lay tz'okx jun xjal nb'inchan taq'wix mo sb'ub'l toj. Oqe'kxju' tz'ib'a'n kyb'i toju' tuj Qpoj Tman rit te chwinqlal che okyex toj.

will be added

X\