Apocalipsis 20

1Wile' jun anjl xi'toq tku'tz twitz kya'j q'i'ntoq talja te tjpelu' jul jaloja t-xelo ex q'i'n jun nin xpatx'k'uxb'il tu'n. 2Aju' anjl lu kub' t-xmo'n wakxkan, ju' ojtxi' kan aju' Tajaw il ex Tajq'oj Dyos, kyej tk'lo'n kab'k'al lajnaq (1,000) ab'q'i toj xpatx'k'uxb'il. 3Ku'x t-xon toju' jul jaloja t-xelo, jakyaja' tjpu'n ex oktq'o'n jun techel ti'ju' tjpel tu'n lalun sb'untl kyi'ju' nimaqtnam tzmax ajtjapun kab'k'al lajnaq (1,000) ab'q'i, tu'n tel tzaqpi'n jte' q'ij ajtjapun tq'ijlalil lu. 4E'wile' q'uqb'il, jaq'uqlqe'toqu' matxitoq kyk'am kyoklen tu'n kyok xjal toj xjel kyu'n. Ex e'wile' kyanmiju' ojetoq b'je'l tx'emu'n kywi' tu'n tpaj q'uqlok kyk'u'j ti'ju' t-xnaq'tzb'il Jesus ex tyol Dyos. Min ek'ulun teju' txkup ex te tilb'ilal, ex min kyaj tu'n toku' techel txkup ti'j kyplaj mo ti'j kyq'ob'. Ex wile' e'jaw anq'intl ex e'kawin kab'k'al lajnaq (1,000) ab'q'i tuk'i'l Krist. 5Ayekye' tnejelju' tu'n kyjaw anq'in, min eb'jaw anq'in txqantl kyimni toju' kmoj lu, tzmaxi'j tb'aju' kab'k'al lajnaq (1,000) ab'q'i. 6¬°Tzalajb'il kyeju' ate' kyxolju' che jawil anq'in toju' maj tnejel, qu'n xjan tnamqe'! Mixti' toklenju' tkab' kamik kyi'j, che okyel te ajb'el te Dyos ex te Krist, ex che kawil tuk'i'l toju' kab'k'al lajnaq (1,000) ab'q'i. 7Tb'ajlenxi'tzun kab'k'al lajnaq (1,000) ab'q'i, k'eletz tzaqpi'n Tajq'oj Dyos toju' ja jpu'na', 8k'elextzuntz sb'ulkye nimaqtnam kyoju' kyaje' ttx'u'k tx'otx', toj Kok ex toj Makok, nim kyajlal txqan kyxjal te q'oj kse'n tz'awan ttzi ninnjab', che b'ajel tb'uyi'n tu'n kyq'ojin. 9Eb'ajtzaj toj tkyaqil twitz tx'otx', b'aj kyb'eti'n ti'jile xjan tnam, exju' nintnam ntk'u'jla'n. Tzajtzun q'aq' toj kya'j ex majx eb'aj tz'e'y tu'n. 10Atzu'n tajaw il matxitoq sub'un kyi'j, xi'xon toju' njab' q'aq' ex q'ol, ja ojetoq txa' xonju' txkup tuk'i'lxi' chalyol pakb'al. Atzuntzu' che tx'iwunjtzela' q'ijtl ex qonik'an toj tkyaqil tab'q'iyil. 11Wile' jun nin saq q'uqb'il, ex e'kub'naju' kya'j ex tx'otx' twitzju' q'uqli tib'aj, mixti'x e'ok ka'yi'ntl. 12Ex e'wile' kyimniqe'tl, nimaq kyoklen ex ch'i'n kyoklen, wa'lqe' twitzju' q'uqb'il; ex e'jqetu' u'j, exu' juntl u'j, aju' u'j te chwinqlal. E'okju' kyimni toj xjel kse'nxu' kyb'inchb'aj exju' tz'ib'a'n kyoju' u'j lu. 13Kyek'u kyib'ju' eb'aj kyim toj ninnjab' twitz Dyos, exqe' ate'toq toj kynajb'il kyimni; kykyaqil eb'jo'k toj xjel, teyile junjun kse'nx tb'inchb'aj. 14Xi'tzun xonju' kamik tk'i'xi' tkawb'il toju' njab' q'aq'. Atzun tkab' kamikju' njab' q'aq' lu, 15atzuntzu' exa' xona' min tz'ib'a'n kyb'i toju' u'j te chwinqlal.

will be added

X\