Apocalipsis 18

1Tb'ajlenxi'tzun ja'lu, wile' juntl anjl ljo'ntoq tku'tz twitz kya'j; nimtoq tipumal, majxkub' ẍtile' twitz tx'otx' tu'n tqoptz'ajel. 2Intoq ẍch'in kuw, intma'n: ¡Matxi' kub' xitj, matxi' kub' xitj nimaq B'ab'ilon! ¡Matxi' tz'ok te kyja tajaw il, te kyja kykyaqil tz'il xewb'aj te kyja kykyaqil tz'il pich' ex te kyja tz'il txkup ik'b'ajilqe'x! 3Mache tx'ojti xjal kyoj kykyaqil nimaqtnam tu'n b'in te tajpaji'n; mache ajpajin nimaqkawil twitz tx'otx' tuk'i'l, mache q'inumaxju' xk'aẍlel twitz tx'otx' tu'nju' tachb'il nimxi'x, chij. 4Nb'iye' tzaj yolin juntl toj kya'j, intoq tma'n: Kukyetze' ntanam toju' nintnam lu, tu'n lalun che b'inchan ile' junx kyuk'i'l ex tu'n lalun pon kanun yajb'ilkye kyi'je'; 5qu'n nim txqan kyil majx njapun toj kya'j, ex in tka'yi'n Dyos tkyaqilu' kyb'inchb'aj myab'a'n. 6Kyb'inchame' te kse'nx matxi' tb'incha kye txqantl; kyq'onk kamaje' tu'me'l t-xel te; kysmonku' kamaj twitzju'ye' tk'wa' k'axi'x kyetwitz smob'ente kyk'wa' txqantl tu'n; 7kyq'onke' toj k'ixk'oj ex yajb'il kse'nx tjaw tnima'ntib' ex tej sachun. Qu'n ina' tma'n toj tanmi kjalu: Luqine' q'uqli qine' kse'n qya nimaqkawil. Mya kyimniwe' nchmil ex lay chin yajtiye', chij. 8Qu'mtzun naq tojun q'ijx tzula' yajb'il ti'j: e'kamik, b'is ex we'yaj, ex kb'el tz'e'ysa'n tu'n q'aq' qu'n nimte Qman Dyos tipumal, ju' xiq'onte toj tz'e'ysb'il twitz, chij. 9Che oq'elu' nimaqkawil twitz tx'otx' e'ajpajin ex e'achin tuk'i'l, ex k'elex ch'yon toj kyk'u'j ajkyka'yinte sib' ajtb'aj tu'n q'aq'. 10Che kjelten najchaq tu'n kyxob'el teju' tz'e'ysb'il witzb'aj, ex kkyma' kjalu: ¡Qab'anx twitza, nimaq nintnam, B'ab'ilon, aya nimaqtnam nimtipumala! Qu'n naq tejun kmojx xkub' tz'e'ysa'n twitza, chij. 11Ex che oq'elju' xk'aẍlel twitz tx'otx' ex k'elex ch'yon nintnam lu toj kyk'u'j, qu'n mix-a'lo'tl alkye klq'olte kyk'a'ẍ: 12txqan kyk'a'ẍ q'anpwaq, saqpwaq, tb'anil ab'j, cha'x ab'j, xb'alun tz'umin sed ex sed, tb'anil ka'yin ex kyaq; tkyaqil tze ati kyk'ok'jal; e'ti'xti' tb'anil b'aq, e'tb'anil tze, e'q'ank'uxb'il, e'k'uxb'il ex e'ẍtilun ab'j; 13Txqan kanel ex ti'xti' k'ok'jqe'; sturak, e'k'ok'sb'il ex e'k'ok'sa'n aseyt; eb'in, aseyt, tb'anil arin ex triy; e'alu'mj te iqal, e'rit, eb'anchej, e'karwaj expe' e'lq'o'n majin wnaqqe'. 14Kyma te nintnam kjalu: ¡Mixti'tltej tb'anil twitz lob'j achb'ajil qexi'xtoq teya; tkyaqilju' tachb'ila ex tq'inumala matxi' che kub'naj tejumajx! 15Eb'aj q'inumaxju' xk'aẍlel kyi'ju' ti'xti' lu tu'n nintnam, che kjelten najchaq tu'n kyxob'el te tz'e'ysb'il kywitz, che oq'el ex k'elex ch'yon toj kyk'u'j, 16ex okkyma': ¡Qab'anx twitza nimaq nintnam! Tz'umin sed t-xb'aluna tok, ate'k t-xb'aluna tb'anil ex kyaq che ka'yin, wiqo'n kyu'n q'anpwaq, chi-ab'j ex tb'anil ab'j. 17¡Ex naq tojun kmujx xkunaja' txqan q'inumal! chechilo. Kykyaqilju' nejenel kyi'j b'ark exqe' nche b'et toj b'ark mlaj, e'aq'unal kyi'j b'ark ex kykyaqilju' nche aq'unan toj ninnjab', mache kyejten najchaq 18Ex tej xkyka'yinte t-sb'el tq'aq'alju' nintnam, mache jawẍch'in: ¿Alxi'xkye juntl nintnam ikywit kse'n nimaq nintnam lu?, chechij. 19Ex mab'jax kyq'o'n quq toj kywi', nche oq' ex nul toj kyk'u'j, ex njaw kyẍch'in: ¡Qab'anx twitz nimaq nintnam! Ma'xi'x che b'jawb'ent kykyaqil ati kyb'ark tu'n tq'inumal. ¡Naqtzun tojun kmujx xkyaja' xitj! chechij. 20Che tzalajxe' ate'ye' toj kya'j ti'ju' nintnam lu; che tzalajxe' aye'ye' xjan tnamqe'ye', exqe'ye' apostl exqe'ye' sanjelal, qu'n matb'incha Dyos tnik'alilti'j kyeye', tej xtmante tu'n ttz'e'yset twitzu' nintnam, chechij. 21Tzajtzun jun anjl nimtipumal, jawtiq'i'n jun ab'j, kse'n jun nin ab'j te cheb'l, ex xit-xon toj ninnjab', tma kjalu: Ikytzun kb'elexa' xoyeta'ju'ya, B'ab'ilon, nimaq nintnam, ex layx tz'ok ka'yi'ntla. 22Layx che b'injtztl chnab' arpa, xux ex chun, kyoju' b'e toja, lay che tentl aq'unal ti'j jun aq'untl toja, ex lay b'injtztl tq'ojq'ojel ab'j te cheb'l toja. 23Layx k'antl tq'aq'al jun kantil toja, ex lay b'injtztl tzalajb'il toj mjeb'le'n toja. qu'n nimaq q'inun qe'toq t-xk'aẍlela twitz tx'otx' ex macheb'aj t-sb'u'na kykyaqil nimaqtnam tu'n tajk'ayi'na, chij. 24Qu'n matz'elyal kychk'elju' sanjelal ex kychk'elu' okslal ti'j Dyos toju' nintnam lu, ex kychk'el kykyaqilju' oje che b'aj kub' b'yo'n twitz tx'otx'.

will be added

X\