Apocalipsis 16

1Nb'iye' etz yolin jun kuwxi'x toju' ja xjan, tma kyeju' wuq anjl kjalu: Kukyxi'ye ex kyqonxe' ttx'u'jil Dyos tku'x kyoju' wuq k'wab'l lu tib'aju' tx'otx', chij. 2Xi'tzun tnejel anjl ex xitqo'nju' tku'xtoq toj tk'wab'l tib'aju' tx'otx'; b'je'tztzun tx'a'ktz taq'wixi'x ex k'ixk'ojxi'x kyi'j kykyaqilju' xjal toktoq techelu' txkup kyi'j ex intoq che k'ulun twitzju' tilb'ilal. 3Xitqo'n tkab' anjl toju' tk'wab'l tib'aj ninnjab', ex jawb'entju' ninnjab' te chik' kse'n tchk'el jun xjal makub' b'yo'n, ex eb'aj kyim kykyaqilju' intoq che anq'in toj ninnjab'. 4Xitqo'n toxi'n anjl k'wab'l tzyu'n tu'n kyib'aj nin a' ex kyib'aj t-xiklil a', ex eb'jaw b'ent te chik'. 5Nb'itzuntze' tmaju' anjl ati toklen tib'aju' a' kjalu: Nman Dyos, aya xjan, majx atiya tejumajx tu'me'lte' saj tq'o'na tz'e'ysb'il witzb'aj lu, 6qu'n b'je'l kychk'el ttanama xjan kyu'n, ex kychk'elju' t-sanjelala, atzu'n ja'lo tojx kyil xxa'tq'o'na chik' te kyk'wa', chij. 7Ex nb'iye' juntl etz yolin ti'j q'olb'eb'l kjalu: Ikyju' Nman Dyos, nimtipumala, makub' ttz'e'ysa'na kywitz tojxi'x tu'me'l ex ax, chij. 8Xitqo'n tkyaji'n anjl tku'x toju' tk'wab'l tib'aju' q'ij, ex xiq'o'n tipumal q'ij tu'n kyb'aj ttz'e'ysa'n xjal. 9Kykyaqiltzun majx eb'aj tz'e'y; extzun mixti'x anjtzkyi'j tuk'i'l Dyos tu'n ja'lu, ex min jawkyajwali'n, xipe' e'oka'ten q'mal kyol taq'wixi'x ti'ju' Dyos nimtipumal tib'aj tkyaqilju' yajb'il lu. 10Xitqo'n tjwe'yi'n anjl tku'x toju' tk'wab'l tib'aj tq'uqb'ilu' txkup, ex majx kyej qloljixju' tkawb'il. Inxi'xtoq kytx'a'n xjal kyaq' tu'n k'ixk'oj; 11mixtzunti'x kyej kytzaqpi'n tu'n kyb'inchan taq'wix tu'n tpaju' tx'a'k ex k'ixk'oj, xi'pe' e'oka'tentl q'mal txqan ti'xti' myab'a'n ti'j Dyos te toj kya'j. 12Xitqo'n tqaqi'n anjl tku'x toju' tk'wab'l tib'aju' nin a' Ewprates, ex xitzqiju' nin a' tu'n kyik'xju' nimaqkawil tzajniqe' toj tjawetzq'ij. 13Wile' eb'je'tz oxe' tz'il xewb'aj naku'j xtx'oqe' toj ttzi wakxkan, toj ttzi txkup ex toj ttzi mya ax sanjelal. 14Kyxew tajaw ilqe', intoq che kyb'incha'n techlal tuk'i'l b'a'nq'ob'aj ex intoq che kyb'uyi'n kykyaqil nimaqkawil twitz tx'otx' tu'n kyq'ojin toju' q'ij ajkyok kykyaqil xjal toj xjel tu'n Dyos nimtipumal. 15Tma Dyos kjalu: Naqx myanim ajwule' kse'n jun eleq'. Tzalajb'ilxi'x teju' itz' ex nxitka'yi'n t-xb'alun, tu'n lalun b'et ẍb'iqli ex tu'n lalun tz'el tch'ixaw, chij. 16Eb'ajtzun kyb'uyi'n nimaqkawil toju' tenb'il Armajedon tb'i toj eb'rey. 17Xi'tzun tqo'n twuqi'n anjl tku'x toj tk'wab'l toju' kyq'iq', ex etz yolin jun toju' ja xjan tzmax jata' q'uqb'il, tma: ¡Matxi' b'ent! chij. 18B'ajtzajtzun xleq'lekya'jtz, e'tq'ojq'ojel towi'yj ex q'ankyaq, ex yokchi tx'otx' tu'n jun kyajnajnab' kuwxi'x kyetwitz tkyaqil kyajnajnab' ttzajlenx kyanq'in xjal twitz tx'otx'. 19Kub' aq'puju' nimaq nintnam toj oxe', ex eb'ajkub' xitju' nimaqtnam twitz tx'otx'; ex tzaj tna'n Dyos nimaq nintnam B'ab'ilon, tu'n tk'monteju' ttx'u'jil Dyos kuwxi'x. 20Kykyaqilju' swejtx'otx' exqe' witz eb'ajkub'naj, 21b'aj tzaj txqan nimaq saqb'aqun twitz kya'j b'ajkub' kyib'aju' xjal, jun kyintalchaqlo kyalal, ex b'jaw kyma'n xjal kyol taq'wixi'x ti'j Dyos tu'n tpaju' yajb'il tu'n saqb'aqun, qu'n jun ninyajb'ilxi'x.

will be added

X\