Apocalipsis 13

1Wile' jun nin txkup jatz toj ninnjab', wuq twi' ex lajoj tuk'a. Tokxtoq jun koron toj twi' junjun tuk'a, ex ate'ktoq tb'i xmayb'i'lte Dyos kyi'ju' twi'. 2Ikytoq nintxkupju' wile' kse'n leopa'rt; ikyqe'toq tqan kse'n tqan oso, atzu'n ttzi kse'n ttzi b'alun. Xitq'o'n wakxkan tipumal ex tq'uqb'ilju' txkup lu tu'n tkawin, ex nim toklen. 3Wile' jun twi'ju' txkup lu, naku'j k'ixb'ni te kyimle'n; atzu'n k'ixb'ni lu q'anet, kykyaqiltzu'n xjal eb'jaw lab'ti ex eb'jo'k lpe ti'ju' txkup lu. 4E'k'ulun te wakxkan qu'n xitq'o'n toklen txkup, ex ek'ulun teju' txkup, intoq kyma'n kjalu: ¿Alxi'xkye juntl kse'n txkup lu, ex alkye kb'antel tq'ojin tuk'i'l? chechij. 5Ex xiq'o'n anb'il teju' txkup lu tu'n tmante tyol te ninb'iltib' ex te xmayb'il ti'j Dyos, ex xiq'o'n toklen tu'n tkawin kab'naq kab'e' xjaw. 6Yolintzuntz ti'j Dyos, tma txqan xmayb'il ti'j Dyos, ti'ju' tja xjan ex kyi'ju' ate' toj kya'j. 7Xiq'o'n anb'il te tu'n tq'ojin ti'ju' xjan tnam, tzmax ajtkub'kyi'j tu'n; ex xiq'o'n toklen tu'n tkawin kyib'aj kykyaqil xjal chukchaq kyyajil, chukchaq kytanam, chukchaq kyyol, ex chukchaq nimaqtnamqe'. 8Che k'ulul kykyaqil xjal najlqe' twitz tx'otx' teju' txkup lu, aye' min tku'x kyb'i ttzajlen qex twitz tx'otx' toju' tuj Qpoj Tman rit te chwinqlal. 9Alkye ati t-ẍkyin, b'inxju' yol lu: 10Aye' ati tu'n kyxi' toj kars, che xe'lq'i'n toj kars; aye'tzu'n ati tu'n kyb'aj tu'n k'uẍtx'e'nb'il che kb'el b'yo'n tu'n k'uẍtx'e'nb'il Atzuntzu' kq'ancha'lixela' kyipumal ex kyokslab'lju' xjan ttanam Dyos. 11Yajxi'tzuntl wile' juntl txkup, intoq jatz toju' tx'otx'. Ate'toq kab'e' tuk'a kse'n tuk'a qpoj tman rit, extzun intoq yolin kse'n jun wakxkan. 12Xini q'o'n toklen tu'n tnejel txkup, ex eb'jo'k tchq'o'n tx'otx' exqe' najlqe' twitz tu'n kyk'ulun teju' tnejel txkup, ju' ojetoq q'anet tk'ixb'len te kyimle'n. 13Ex e'tb'incha nimaq techlal eb'a'nq'ob'aj. Inpe' tzajt-xon q'aq' twitz kya'j nkb'u'l twitz tx'otx', kywitzku' xjal. 14Kyu'ntzu'n techlal nxiq'o'n anb'il te tu'n tb'inchante twitzju' tnejel txkup, e'kub' t-sb'u'n xjal najlqe' twitz tx'otx' ex xitma'n kye tu'n kyb'inchante jun tilb'ilalju' txkup itz'x maskye ojetoq k'ixb'sanjtz tu'n k'uẍtx'e'nb'il. 15Ex xiq'o'n tipumalju' tkab' txkup tu'n tq'onte tchwinqlalju' tilb'ilal tnejel txkup, tu'n tyolinju' tilb'ilal lu ex tu'n tmante tu'n kykub' b'yo'n kykyaqilju' min nche k'ulun te. 16Expe' tb'incha tu'ntzun kykyaqil xjal, nim kyoklen ex ch'i'n kyoklen, q'inun ex prow, tzaqpi'nqe' ex lq'o'n majin, tu'n tok kyechel toj kyb'anq'ob' mujqa kyplaj. 17Ex mix-a'lo'te kb'entel tloq'on ex tu'n tk'ayin, qa mixti' tok techel mujqa tb'iju' txkup ti'j, mujqa tajlalju' tb'i. 18In nojqelan nab'l teju' lu; alkye makane toj twitz, ximanx tnab'lju' tajlal txkup lu, qu'n tajlalx tb'i xjalte'. Aju' tajlal lu junk'al oxlajnaq qaq (666).

will be added

X\