Apocalipsis 10

1Wile' juntl anjl nimtipumal, xi'toq tku'tz toj kya'j toj jun toli'n muj; atitoq jun qe'nkan tib'aj twi', intoq qoptz'aju' twitz kse'n q'ij exqe' tqan naku'j kab'e' tnej tqantaq' q'aq'. 2Tzyu'n jun tal tolin u'j tu'n, jqo'n, ex kub' twab'a'n tqan te tb'anq'ob' tib'aj ninnjab', atzu'n te tnayaj tib'aj tx'otx'. 3Jaw ẍch'intzuntz kuw, naku'j b'alun ntzanun; ex tej tjaw ẍch'in, naku'j wuq q'ankyaq e'jaw tinun. 4Kyb'ajlenxi'tzun yolinju' wuq q'ankyaq, ikytoq tku'x ntz'ib'a'ne' kyma; nb'iye' jun tzaj yolin toj kya'j, tma weye': K'u'nku'ya xkymaju' wuq q'ankyaq toj tanmiya, lalun ku'x ttz'ib'a'na, chij. 5Atzu'n anjl wa'ltoq tib'aju' ninnjab' ex tib'aju' tx'otx', jaw tq'o'n tb'anqob' twitz kya'j 6ex tma toj tb'iju' itz' tejumajx, aju' b'inchante kya'j, tx'otx', ninnjab' ex tkyaqilju' ti'jxti' ati kyoj. Tma: Mixti'tlte anb'il, 7naqa xponkmoj tu'n txi' tq'ajtza'n twuqi'n anjl tchun, kjapumelju' echa'ntl toj ewaj tu'n Dyos, kse'nx tma kyeku' tmajin ex t-sanjelal, chij. 8Atzunj xinb'i'ne' ttzaj yolin toj kya'j, tzaj yolin jumajtl weye', tma kjalu: Kutxi'ya q'elteju' tolin u'j jq'o'n toj tq'ob'ju' anjl wa'l tib'aj ninnjab' ex tib'aj tx'otx', chij. 9Nxi'tzune' tke'tzju' anjl ex xinqani'ne' tal tolin u'j te, tzaj ttzaq'we'ntzuntz kjalu: Q'inxa ex wanxa. Chi' k'okyela' toj ttziya naku'j ta'lkab', ajtzun tku'pun toj tk'u'ja kjawil tx'amix, chij. 10Elwiq'i'ne' tal tolin u'j teju' anjl, ex xinwane'; chi'toqte' toj ntziye' naku'j ta'lkab', tetzunj tb'aj wu'ne', jaw tx'amix toj nk'u'je'. 11Tzaj tma'ntzuntz weye' kjalu: Ati tu'n txitma'na ak'a'j tpakb'alil tyol Dyos kyi'j txqan tnam, kyi'j nimaqtnam, kyi'j xjal chukchaq kyol ex kyi'j nimaqkawil, chij.

will be added

X\