Filemón 1

1Ayine' Pawl, jpu'nqine' tu'n tpaj Qajaw Jesukrist extzunju' qitz'in Timotey inxi' qq'olb'e'na Pilemon, ex inxi'x qk'u'jla'na qu'n quk'il qib' tuk'ila toj aq'untl, 2ex inche'x qq'olb'e'ne' okslal nkyb'uyi'n kyib' tjaya, ex ikx qanab' Apya, ex Arkyip quk'i'l toj tzq'un Dyos. 3Awt Qman Dyos ex Qajaw Jesukrist che q'onte xtalb'il nak'b'il kyeye'. 4Inxi' nq'o'ne' chjonte te Dyos kukxju' ajttzaj nna'na toj nna'j Dyose', 5qu'n inb'i'ne' tqanil ti'ju' tk'u'jlalila exju' tokslab'la ti'j Qajaw Jesukrist ex kyi'j kkyaqil okslal. 6Inchin kub'sane' twitz Dyos tu'n tokqe tk'u'ja ti'j ex tu'n tojtzqinteya t-xtalb'il Dyos exju' b'a'n tu'nel tk'u'jlalil Jesukrist. 7Inxi'x chin tzalaje' ex maqe nk'u'je' tu'nju' tk'ujlalila, qu'n intq'uqb'a'na kyk'u'j kykyaqil okslal. 8Qu'mtzun, maskye ati woklene' toj Qajaw Jesukrist, tu'n txinma'ne' teya titi' kxe'l tb'incha'na, 9wajb'ile' tu'n nkub'sane' twitza tu'nju' ink'u'jla'na. Ayine' Pab'l matxi' chin tijine' ex jpu'nqine' ja'lo tu'n tpaj Qajaw Jesukrist, 10Inxi' nqani'n jun xtalb'il teya ti'j Onesimo, qu'n matxi' tz'ok te nk'wale' toj okslab'l tzalu toj kars. 11Mixti'xi'x ajb'en Onesimo teya tnejel, atzun ja'lo nimxi'x tajb'en teya ex weye'. 12Kxel wanjsa'ntl ti'je' tk'etza: k'moma b'a'nxi'x nakuxwitloj ayinku'ye' chin pomil tk'etza. 13Atoq wajb'iljuye' tu'n tkyej ten tzalu nk'etze', tu'n tajb'en weye' te t-xela toju' kars, qu'n jpu'nqine' tu'n tpaj Qajaw Jesukrist. 14Naq aju' min wajb'ile' tu'n nb'inchanteye' qa myaya inq'mante, tu'ntzun lalun kub' njtz'o'na tu'n tb'inchan xtalb'ila weye', masb'a'n aya kq'malte qa b'a'n toj twitza. 15Qapelo matz'el tpa'ntib' jte' q'i'j Onesimo ti'ja, tu'ntzun tk'monteya ja'lo tejumajx, 16mya jun lq'o'n majintl, b'a'nxi'xtl k'okyela' teya, naku'j titz'ina k'u'jlanxi'x tu'na. Ati penawe' nk'u'j ti'j, mitzulo yata atixi'x tk'u'ja ti'j, mya o'kx tu'nju' tmajena, ex ikx tu'nju' okslal ti'j Qajaw Jesukrist. 17Qatzun qa qitz'inqib' toj okslab'l toj twitza, k'moma Onesimo nakuxwitloj ayine'. 18Qatzun ati jun taq'wix xtb'incha teya, mujqa ati tk'as teya, xi' peyintza'ya weye'. 19Ayine' Pab'l ẍinkub' tz'ib'ante u'j lu tu'nku' nq'ob'e': Ayine' chin chjolte. Maskyetzun ikxta nim tk'asa weye', ex lay txinma'nwe' teya tu'n toka te nmajine'. 20Qu'mtzun witz'in, b'inchama xtalb'il weye' naq tu'n tk'u'jlalila ti'j Qajaw Jesukrist; q'uqb'ama nk'u'je' tu'nju' okslalqo' te Qajaw Jesukrist. 21Ma txintz'ib'a'ne' teya, qu'n q'uqli nk'u'je' ti'ja qa ktb'incha'ya, kpe' ktb'incha'ya nimxi'x kyetwitzju' nxinma'ne' teya. 22Ex ikx kxe'l nma'ne' teya tu'n tb'aj tnk'u'na jun ja weye' ja chin tenb'ila'ye'; qu'n q'uqli nk'u'je' qa ktzajel ttzaq'we'n Dyos nna'j Dyose' ex ktq'a' anb'il weye' tu'n npone' xb'et-salkyeye'. 23Inxiq'olb'e'na tu'n Epapras, wuk'i'le' toj kars tu'n tpaj Qajaw Jesukrist, 24ex inxiq'olb'e'na kyu'n Markos, Aristark, Demas ex Lukas, aye' junx inche aq'unan wu'k'ile' toj taq'un Dyos. 25Awt t-xtalb'il Qajaw Jesukrist ten toj kyanmiye'. Ikxwitju'.

will be added

X\