1 Expe' che tzalajxe' ntzik ex witz'in toj tb'i Qajaw. Mya toq'wixte' wewe' tu'n txi' ntz'ib'a'ntle' oje txi' ntz'ib'a'ne', atite' tajb'en kyeye'. 2 Kyka'yinx kyib'e' kyeju' xjal tx'yanqe', kyeju' myab'a'n aq'unalqe' na'j, aye' kyajb'il tu'n kyqesut kychib'jil, 3 qu'n ayo'na'qe tokxi'x qeche'l, njaw qnima'n Qman Dyos tu'n Xewb'aj Xjan, ex nqo tzalaj tu'n te Krist Jesus qo', ex myatzu' nqeya' qk'u'j ti'j qxmilal. 4 Jaku'pena' tu'me'l tu'n tokqe nk'u'je' kyi'ju' ti'xti' lu. Mix-a'lo' juntl tu'me'lwit tu'n tokqe tk'u'j kyi'ju' lu: 5 Okq'o'n wechele' ti'j nchib'jile' toj wajxaq q'ij witz'jlene', kyxol tnej tyajajil B'enjamin qine', aj Eb'rey qine' ex kyk'wal aj Eb'rey qine'. Atzu'n ti'ju' pujb'il kykawb'il aj Juda, parisey qine'; 6 tu'n tpaj tokxi'xtoq nwitze' ti'ju' kawb'il, kub' nljo'ne' toj kyq'iju' okslal; ex mixti'x tu'n nkub' tzak'u'ne' ti'ju' tnik'alilti'j tu'n tjapun ntma'n kawb'il. 7 Tkyaqiltzun ja'lu, nimtoq toklen weye' nejtl, atzu'n ja'lo, naq tu'nel Krist, mixti'tl kyajb'en weye'. 8 Expe' tz'isqe'tl weye' ja'lo, tu'nju' tb'anil wojtzqib'le' ti'j Qajaw Krist Jesus. Naq tu'nel Krist matxi' kyej nq'o'ne', ex tkyaqil tz'istel weye' tu'n nkanb'ane' tuk'i'l Qajaw 9 ex tu'n ntene' tuk'i'l; mya wu'nxe' tu'nwt njapun kawb'il wu'ne' ẍin k'meta'ye' tu'n Dyos, tu'nte' wokslab'le' ti'j Krist, axju' tu'me'l nqo' tk'mo'na' Dyos tu'n okslab'l. 10 Awajb'ilju'ye' tu'n wojtzqinteye' Krist, tu'n nna'nteye' tipumal tjawlen anq'in ex tu'n nyajtiye' se'n yajta'; expe' tu'n nkyime' kse'nx kyima', 11 ex wajb'ile' tu'n njaw anq'ine' kyxol kyimni. 12 Mya tu'nwtju' lu matxi'wt nkane' tu'n tb'ant tkyaqil wu'ne', mo tz'aqli qintlwite'; ljo'nxtzun wu'ne', noktilil wu'ne' tu'n ntkanb'anteye', qu'n a ẍin kleta'ju'ye' tu'n Krist Jesus. 13 E'ntzik ex e'witz'in, min nok nq'o'n wib'e' matxi'wt nkanb'aye'; a nb'incha'ne' min ntzaj nna'ntle' matxi' kyej wi'jxi'ye' ex noktilil wu'ne' tu'n nkanb'anteye' ati nwitzxi'ye', 14 tu'n nkanb'anteye' jatu'n npona'ye' ex tu'n nkanb'anteye' oyaj toj kya'j nqo ttxko'n Dyos tu'n qk'monte tu'nel Jesukrist. 15 Qkyaqilju' matxi' qo ch'iy toj qokslab'l, ati tu'n qximan ikju'. Qatzun ate' junjunkye' junxi'tl tu'me'l nche ximana', ktyek'u' Dyos chik'lixi'x kye. 16 Axtzunju' matxi' tz'el qnik' ti'j, axtzun tu'n qanq'inteju'. 17 E'ntzik ex e'witz'in, kyknome' wi'je', ex kyka'yinke' kyi'ju' nche anq'in kse'nx matxi' tz'el kykno'n qi'je'. 18 Matxi' txinma'nxi' b'a'npun maje' kyeye', kxel nma'ntle' kyeye' ja'lo tuk'i'l ta'l nwitze', ate' txqan ajq'ojqe', nche anq'in naku'j mixti' tajb'enju' tkamik Krist kye, 19 che kxe'lkye' xjal lu toj naje'n. A kydyosju' naq nche wan, ex nkynima'n kyib' ti'ju' nkyb'incha'n, ju' npe'wt che ch'ixwi tu'n tpaj. Naq o'kxtzu' toka' kywi' ti'ju' te twitz tx'otx'. 20 Atzunqe te toj kya'j qtanamil, ex nqo ayon tu'n ttzaju' Klolqe Qajaw Jesukrist toj kya'j, 21 ate kch'exb'elte qxmilal mixti'x tajb'en tu'n tok kse'nx t-xmilal tb'anilxi'x. Ex k'okyel tq'o'n tu'n tipumal ati tib'aj tkyaqil ti'xti'.
