Filipenses 2

1Qu'mtzun qa nche kuwsanjtze' tu'n Krist, qa nkyq'uqb'a'ne' kyk'u'j txqantl tu'n kyk'u'jlalile', qa axju' Xewb'aj Xjan ati kyuk'i'le' kykyaqile', qa nq'aq'an kyk'u'je' kyi'j txqantl, 2kyq'ontze' ntzalajb'ile', che anq'inqe'ye' mujli kynab'le' ex kyk'u'jlam kyib'e' kyxolilexe', junx kyanmiye' ex junx kyxime'. 3Lalun kyb'incha jun kyaq'une' tuk'i'l q'oj mo tuk'i'l nimjtib'il, teyile junjun kyq'onqe'k txqantl b'a'nqexi'x kyekywitz. 4Mix-a'lo' jun tu'nwt tjyonte o'kxju' tajb'il, ex ikx tu'ntjyetju' b'a'n kye txqantl. 5Junxwit kyximb'e'tze' kse'n t-ximb'e'tz Krist Jesus: 6Dyos te' Krist Jesus, ikx toklen se'n Dyos, min oktq'o'ntib' kse'n Dyos, 7kyej tq'o'n toklen ex ok te majin. Oktq'o'ntib' kse'n ayo' ex ok naqjun xjalxi'. 8kub' tme'ssa'ntib', okslan wnaq txmax tkyim, tzmax tej tkyim twitz kris. 9Qu'mtzun jaw nima'nxi'xtl tu'n Dyos nimxi'x toklen kyekywitz kykyaqil xjal, 10tu'ntzun kykub' meje twitz kykyaqilju' ate' toj kya'j exqe' ate twitz tx'otx' ex tjaq' tx'otx', 11ex kykyaqil tu'n kymante qa ate Jesukrist Qajaw, te ninb'ilte Qman Dyos. 12Qu'mtzun e'ntzik ex e'witz'in, okslan wnaqqe'ye' weye' kukxju', mya o'kx tej ntene' kyxole', chin kyb'inx xi'xtlpe'ye' ja'lo najcha'q ta'qine'. Kyq'onk tilile' ex tenx tchiylal Dyos kyeye' toju' kolb'ilkyeye'; 13qu'n tu'nte Dyos ntzaja' anq'in jun b'a'n toj kyanmiye' tu'n kytzalaje' tu'n kyb'inchanteye' tajb'il. 14Kyb'inchame' tkyaqil, lalun che yoline' myab'a'n ex lalun che wulje', 15tu'ntzun lalun che elyale' toj kyile' ex mix-a'lo' tu'n tok q'onte kypaje'. Tk'wal Dyos qe'kye', ati tu'n kyqoptz'aje' kse'nqe' che'w kyxolju' xjal b'inchal il ex pi'sqe' twitz tx'otx'. 16Che we'kuxi'xe' toju' tpakb'al b'a'n te chwinqlal, tu'ntzun ntzalaje' kyi'je' ajtul Krist qama q'ancha'lin. 17Maskyetzun machin kyime' tu'n tpaj taq'un Krist, jun oyajte' lu nxinq'o'ne' junx tuk'i'l kyoyaje' te Dyos, aju' tu'n kyokslab'le' ma kyaq'kyib'e' tu'n kyajb'ene' te Dyos. 18Ex Che tzalajxkye', qoqe' tzalaj wuk'i'le'. 19Qa axtajb'il Dyosju', lwiyxi'x kxel nchq'o'ne' Timotey kyxole', tu'n ntzalaje' ajnb'inteye' tqanil kyi'je'. 20Qu'n o'kxte nximan kyi'je' ex tajb'ilju' b'a'n kyeye' kse'nxwe'; 21Kykyaqil kye xjal nkyjyo'n axju' kyajb'il, myaju' tajb'il Jesukrist. 22Atzunte Timotey kyojtzqi'ntle' b'a'n xjal te, ex matxi' tz'onin wi'je' tu'n tpakb'et tpakb'al b'a'n, kuxi'xtej nk'wale'. 23Qu'mtzun awajb'ilju'ye' tu'n txi' nchq'o'ne' kyxole', naqa xnb'iye' qa chin elex tzaqpi'ne' mujqa lay; 24expe' q'uqli nk'u'je' ti'j Qajaw qa chin xe'lku'ye' lwiy ka'yilkyeye'. 25Ex nkub' nxima'ne' qa nojqelan tu'n txi' nchq'o'ne' qitz'in Epaprodit xb'etzalkyeye', nxi'x onin wuk'i'le' kuw tu'n txi' q'met tpakb'al b'a'n, aju' tzaj kychq'o'ne' ajb'el weye' ex ka'yilte nojqelan weye'. 26Tajb'il tu'n kyoktka'yi'ntle', ex nlab'ti kyi'je' qu'n kyb'iye' yab'ti. 27Axte' yab'ti, ch'inxtlpe' mikyima', tzajtzun q'aq'an tk'u'j Dyos ti'j, ex mya o'kx ti'j, ex ikyx wi'je', tu'n lalun tz'okxi'x txqantl b'is wi'je'. 28Qu'mtzun lwiyxi'x kxel nchq'o'ne' tu'n kytzalaje' ajtok kyka'yi'ntle', ex tu'n lalun chin b'isunxi'xe'. 29Kyk'mome' tuk'i'l tkyaqil tzalajb'il, kse'n qtzikkuxi'x toj Qajaw, ex che tzalajxe' kyi'ju' okslal ikyqe' se'n te, 30qu'n ch'inxmi kyima' tu'n tpaj najb'en te Krist. Xob'ajilx tena' tchwinqlal ex pon lq'e ttzi kamik, naq tu'n tb'inchante ajb'eb'l weye' aju' laytoq b'ant kyb'inchanteye' aye'ku'ye'.

will be added

X\