Filipenses 1

1Ayine' Pawl tuk'i'l Timotey, tmajin Krist Jesus qo'ye', nche'x qq'olb'e'ne' aye'ye' najlqe'ye' toj nintnam Pilipos, ttanam Dyos qe'ye' tu'n kyokslalb'le' ti'j Krist Jesus, aye'ye' kykyaqile' kyuk'i'lju' nejenel kyxole' exqe' ajb'el. 2Tzajxwit tq'o'n Qman Dyos ex Qajaw Jesukrist t-xtalb'il ex tnak'b'il kyib'aje'. 3Nchin q'on chjonteye' te Qman Dyos atl ajkytzaj nna'ne'; 4ex nchin kub'sane' tuk'i'l tzalajb'il kukxju' kyi'je' ajnna'n Dyose'; 5tu'nju' xkmujb'a kyib'e' quk'i'le' toju' tpakb'al b'a'n, tzajx tnejel q'ij tej kyb'inteye' tzmax ja'lo. 6Q'uqliwe' nk'u'j ti'j qa aju' b'a'n aq'untl tzyet tu'n Dyos toj kyanmiye', kxel tljo'n tu'n tb'antxi'xtl tzmax ajtul jumajtl Jesukrist. 7Tu'me'lxi'xte' tu'n nximane' kyi'je' ikyju', qu'n majx na'nqe'ye' toj wanmiye' ex tu'nju' kykyaqile' nche onine' wi'je' tu'n t-xtalb'il Dyos saj tyek'u'n weye', b'a'ntzunqa antine' toj kars mujqa machin pone' kywitz tzyul kawb'il klolte ex q'maltexi'xju' tpakb'al b'a'n. 8Tojtzqi'n Dyos inxi'x chin lab'tiye' kyi'je' kykyaqile', inxi'x chin laqje' kyi'je' tu'n tk'ujlalil kub' tq'o'n Jesukrist toj wanmiye'. 9Nxi nqani'ne' toj nna'j Dyose' tu'n ttenxi'xtl kyk'u'jlalile' kyxolxe', ex tu'n ttzaj tq'o'n Dyos kynab'le' ex tu'n tkane toj kywitze', 10tu'n tb'ent tjaw kysk'o'ne' tb'anilxi'x. Kb'anteltzun kyanq'in kychwinqlaltze' ẍtilun, mixti' kychuksb'ene' ex mix-a'lo' kpoqolkyeye' toju' q'ij ajtultl Krist; 11kna'kyb'incha' kyeye' b'a'n tu'n tonb'il Jesukrist, tu'n tnimanjtz Qman Dyos ex tu'n tajwalinjtz kyu'n xjal. 12E'ntzik ex e'witz'in, wajb'ile' tu'n kyb'inteye' qa axxi'x matz'ok jni'xju' matxi' b'aj wi'je' te jun o'nb'il tu'n tpakb'etju' tpakb'al b'a'n. 13Kykyaqilju' xjal te q'oj exqe' txqantl xjal matxi' kyb'i qa jpu'nqine' tu'n tpaj nchin ajb'ene' te Krist. 14Expe' kynimal okslal tej xkylonte jpu'nqine', matxi' kykuwsa kyib' tu'n kypakb'ante tyol Dyos, min nche xob' ex q'uqlixi'x kyk'u'j ti'j Qajaw. 15Ate'xtzun junjun nche pakb'an ti'j Krist qu'n kyajb'il tu'n kyonin tu'n tkyaqil kyk'u'j, aye'tzun txqantl nche pakb'an qu'n ntx'a'lti' kyk'u'j ex nche q'ojin wi'je'. 16Ate' junjun nche pakb'an ti'j Krist tuk'i'l kyk'u'jlalil, qu'n b'i'n kyu'n qa a Dyos xkub' q'onweye' klolteju' tpakb'al b'a'n; 17aye'tzun txqantl nche pakb'an tu'ntlkye tb'is kyk'u'j kyex, ex mya ax kyol, akyajb'ilju' tu'n ttzajxi'xtl xitb'il wi'je' jpu'n qinku'ye' ja'lo. 18B'a'ntzulo qa ikju', qa ax kye nche pakb'an mujqa mya, luqe' nche pakb'an ti'j Krist; atzun weju'ye' ntzalajb'il. Expe' chin tzalajel xi'xtle', 19b'i'n wu'ne' qa tu'n kyna'j Dyose' ex tu'n tonb'il Xewb'aj Xjan te Qajaw Jesukrist chin elex tzaqpi'na'ye' toj kars. 20Q'uqlixi'xwe' nk'u'j qa lay chin kyaje' taq'wix tu'n Qman Dyos, okpe' tyek'u'te' toklen Krist toju' nchwinqlale' ja'lo, qa itz'qinxe' exqa machin kyime', kse'nx ntb'incha'n kukxju'. 21Qu'n qa itz'qinxwe', chin ajb'ele' te Krist, qatzun machin kyime', kanb'ab'lte'. 22Exqa machin tentle' twitz tx'otx', nimxi'x wajb'ene' toju' aq'untl, tu'ntzunju' min nkane toj nwitze' alkye b'a'n. 23Ch'uẍ tu'n nsk'onteye' alkyexi'x kyxol kab'e': tojun tu'me'l wajb'ile' tu'n nkyime' tu'n ntene' tuk'i'l Krist, qu'n ate tb'anilxi'xju' weye'; 24atzun juntl tu'me'l, mas nojqelan itz' qi'nxe' tu'n wonine' kyi'je'. 25Tu'ntzunju' q'uqli nk'u'je' qa chin kjeltentle' kyuk'i'le' onilkyeye' tu'n kykuwixe' ex tu'n kytzalaje' toj kyokslab'le'. 26Tu'ntzun ntentle' kyxole' ex tu'n kytzalajxi'xtle' ti'j Jesukrist. 27Naq o'kx kyq'onk tilile' tu'n kyanq'ine' kse'nx ntma'n tpakb'al b'a'n ti'j Krist. Se'nkutzun qama chinxe' mujqa min ẍinxe' ka'yilkyeye', wajb'ile' tu'n nb'inteye' qa ljo'nx kyu'ne' b'uyi'n kyib'e', noktilil kyu'ne' toj kyokslab'le' toju' tpakb'al b'a'n, 28ex tu'n lan che xob'e' kye nche q'ojin. Atzun yek'b'ilju' tu'n nche q'ojin kyi'je' qa che kxe'l toj naje'n, ex a yek'b'ilte kolb'ilju' kyeye', qu'n tu'n Dyos nche kanb'ana'ye'. 29Mya o'kx ati kyoklene' tu'n kyokslane', ex ikx tu'nkyyajtiye' tu'nel Krist. 30Ax che yajtela'ye' se'n matxi' chin yajta'ye', ex b'i'n kyu'ne' nchin yajtitle'.

will be added

X\