Mateo 9

1Tb'ajlenxitzun ja'lu, ik'x Jesus jlajxi' njab' ex pon kanun toju' ttanam. 2Ultzun q'i'n jun xjal k'oljni tk'etz, kuẍli twitz kuẍb'il; tetzunj tka'yinte Jesus kyokslab'lju' e'tzaj q'inte, xitma'n teju' yab' kjalu: —Kuwxa nk'wal, qu'n matxi' che najsetju' tila, chij te. 3Ate'toqtzun junjun xnaq'tzal kawb'il lwiyxi'x kub' kyxima'n ex kyma: In xmayinte' xjal lu ti'j Qman Dyos, chechij. 4Eltzun tnik' Jesus tiju' kyxim, xitqani'n kye: —¿Tiqu'n myab'a'nju' kyxime' wi'je'? 5¿Alkyetzu'n yol b'a'nxi'x tu'n txi' q'met: Matxi' kub'najsetju' tila, mujqa: We'ktza ex b'eta? 6Kxe'l nyek'une' kyeye' tu'n telkynik'e' ti'j qa ayine' tk'wal Dyos ati woklene' twitz tx'otx' tu'n tkub' nnajsa'ne' il, chij. Xi'tzun tma'ntz teju' k'oljni: —We'ktza, iq'inktza tkuẍb'ila ex txi'ya tjaya, chi Jesus. 7Jawtzun we'ju' k'oljni ex xi'tzuntz tja. 8Tetzunj klonte xjalju' lu, majx e'jaw lab'ti ex jaw kniman tb'i Qman Dyos tu'nju' oklenj tzaj tq'o'n kye xjal twitz tx'otx'. 9Tik'lenxi'tzun Jesus toju' ja lu, til jun ichan Matey tb'i, q'uqlitoq ja npeyinjtzaju' pwaq chojb'il te Rom. Xi'tzun tma'n Jesus te: —Lpeka wi'je', chij. Jawtzun we' Matey ex oklpe ti'j Jesus. 10Tetzunj intoq wan Jesus toj tja Matey, nimju' nche peyun pwaq, ex junjuntl xjal aj ilqe' e'pon ex e'kub' qe ti'j mes tuk'i'l Jesus exqe'ju' t-xnaq'tzb'en. 11Tetzunj kka'yinte pariseyju' lu, xikyqani'n kyeju' t-xnaq'tzb'en: —¿Titiqu'n in wana' kyxnaq'tzale' kyuk'i'lju' peyul pwaq exqe'ju' aj il? chechij. 12Tb'itzun Jesus kyol parisey ex xitma'n kye: —Aye'ju' b'a'nqe' ex mya yab'qe' mixti' tajb'enju' q'anil kye, atzu' ta'te' tajb'en kyeju' yab'qe'. 13Kuxkxi'ye' ex tz'elx knik'e' tiju' yol lu: Awajb'ilju'ye' tu'n ttzaj laqj kyk'u'je' kyi'ju' xjal, ex myate' tu'n tkub' kq'o'ne' chojb'il. Qu'n minti' ẍin nulwe' txkolkyeju' tnik'alkyi'j, aye'we' aj il ẍin nul txkolkye, chi Jesus. 14Eb'jultzun lq'eju' t-xnaq'tzb'en Xwan jawsal a' tk'etz Jesus ex xikyqani'n te: —In qo mewayinqe' nim exqe'ju' parisey, ¿Yajtzunta titiqu'n min nche mewayinju' t-xnaq'tzb'ena? chechij. 15Xi'tzun ttzaq'wente' Jesus kye: —¿Ma oktzun che b'isulju' txko'nqe' toj jun mjeb'le'n, extzunqa atiju' chmilb'aj kyuk'i'l? Oktzun pomel jun tq'ijlalil ajt-xi' q'inju' chmilb'aj, tzmaxi'tzun che mewayilju'. 16Mix-alo' jun xjal najb'en t-xk'ojb'il ak'a'j te jun xb'alun ttx'anqa'n, qu'n aju' xk'ojb'il ak'a'j nok k'olpaj ex nxi' laqju' ttx'anqa'n tu'n, expe' majx kxe'l laqjxi'xju' xb'alun ttx'anqa'n. 17Ex mix-a'lo' jun xjal nku'x tq'o'nju' ak'a'j b'in tojun tz'u'n ajb'emnitl, qu'n nex laqju' tz'u'n ex nche nkub' txa'jl kkab'il tu'n ak'a'j b'in. Qu'mtzun ati tu'n tku'x q'etju' ak'a'j b'in toju' ak'a'j tz'u'n, tu'ntzun lalun che kub' txa'jl kkab'il, chi Jesus. 18Akxtoqtzun nxi' tma'n Jesus ja'lu kye, ul jun xjal knejel aj Juda, kub' meje twitz Jesus ex xitma'n te: —Tzmayinku' tkyimlenju' nmyale'; qama tb'inchaya xtalb'il tu'n ttzaja ka'yilte exqa makub' tq'o'na tq'ob'a tib'aj, kjawil anq'in jumajtl, chij. 19Jawtzun we' Jesus, kyuk'i'lju' t-xnaq'tzb'en ex exi' tjaju' xjal lu. 20Atitoqtzun jun qya yab' tu'nju' ttx'ajin ma'toq b'aj kab'lajoj ab'q'i, pon lq'e tk'etz Jesus ex xittzyunju' ttxa'n tpinpa't. 21Qu'n kub' t-xima'n: Yaqinpete' qama txi' ntzyu'ne' ttxa'n tpinpa't, majx chin q'anitele' tu'n, chij. 22Anjtztzun miltz'uj ti'j Jesus, xika'yin teju' qya ex xitma'n te: —Kuwxa, nmyal, noqtu'n tokslab'la matxi' q'aneta, chij. Textzunju' kmuj lu q'anetju' qya. 23Tetzunj tpon Jesus tjaju' knejel aj Juda, ex tej tka'yinte qa matoq b'ent ktenju' xuxil tib'aju' kyimni ex naqxtoq tu'n kxi'tl mqulte nche' oq' b'a'nxi'x, 24xitma'n kye: —Kukyexe' pe'n, qu'n aju' txin lu mya kyimnite', noq in wtante', chi Jesus. Atzunkye' xjal naq e'jaw tze'n ti'j Jesus, 25tetzunj kb'je'tz t-xla'ja'n xjal twi' pe'n, okxtzun Jesus tuja ex jaw ttzyu'n tq'ob'ju' txin ex jawe'tzuntz. 26Kub' puqli tyolinjtzu' b'aj lu toju' tx'otx' atzu'. 27Tetzunj tetz Jesus toju' najb'il lu, exi' lpe kab'e' xjal moẍ ti'j intoq che ẍch'in kjalu: —¡Q'aq'antz tk'u'ja qi'je' tk'wal Dab'i! chechij. 28Tetzunj tpon Jesus tojun ja, e'pon lq'eju' moẍ tk'etz, ex xitqani'n Jesus kye: —¿Ma nkyoksla'ne' qa kb'entelju' lu wu'ne'? Chij. —Iku' Taye inxi' qoksla'nqe' chechij. 29Tzajtzun Jesus ok tmko'nju' tb'aq' kywitz, ex xitma'n kye: —Kche q'anetele' tu'nju' ma qe kyk'u'j wi'je', chij. 30Textzu'n kmuj lu jqetju' kywitz. Xi'tzun tab'tzi'nxi'x Jesus kye kjalu: —Lalun txi' kyoline' lu kye xjal, chij. 31Tetzunj kyb'aj anj, b'ajx kyoli'n ex kub' puqli tyolinjtz Jesus toju' najb'il lu. 32Tetzunj xi'toq kyanju' moẍ, tzaj kyi'n xjal jun me twitz Jesus ex tzyu'ntoq tu'n tajaw il. 33Tetzunj telju' tajaw il tiju' xjal tu'n Jesus, b'ent tyolin. Eb'jawtzun lab'tiju' xjal ex kyma: —¡B'ajx qila'te' b'a'nq'ob'aj lu toj Israel! chechij. 34Aye'tzunkye' parisey intoq kyma'n: —Axju' nejenel kye tajaw il nq'onte tipumal tu'n kyex t-ljo'nju' tajaw il, chechij. 35Intoqtzun b'et Jesus kyoj kykyaqilju' tnam ex kojb'il, intoq xnaq'tzanxi' kyoju' ja te k'u'lb'il. Intoq tpakb'a'nju' tqanil b'a'n tiju' tkawb'il Qman Dyos ex nche q'anitju' xjal tu'n te chukchaq yab'il ex k'ixk'oj. 36Tetzunj tka'yinte Jesus txqan xjal, tzaj q'aq'an tk'u'j kyi'j, qu'n matxi'toq che sikt ex matxi'toq che kub' yajt, nakuj ritqe' mixti' k'ik'lel kyi'j. 37Xitma'ntzuntz kyeju' t-xnaq'tzb'en kjalu: —Axxi'x, nimte' twitz awal tu'n tjaw b'uyit, naqtzun aju' ch'i'nqeju' aq'unal. 38Qu'mtzun, kyqaninxe' teju' tajaw awal tu'n ttzaj tq'o'n txqantlju' aq'unal tu'ntzun tjaw b'u'yitju' twitz awal, chi Jesus kye.

will be added

X\