Mateo 28

1Tb'ajlenxi'tzun q'ij te ojlab'l, ch'inxtltoq qsqix toju' tnejel q'ij te sman, exi' Mariy aj Makdala tuk'i'lu' juntl Mariy ka'yilteju' muqb'il ja kyeja' q'o'n t-xmilal Jesus. 2Naqx minab'en tzaj jun nin kyejnajnab', qu'n ku'tz jun tanjl Qman Dyos toj kya'j ex pon lq'e tk'etzju' muqb'il, elti'nju' ab'j jpub'lte muqb'il ex kub' qe tib'aj. 3Atzunju' anjl lu inxi'xtoq qoptz'aj nakuj jun xloq'lokya'j, ex atzunju' t-xb'alun saqxi'xtoq nakuj txun che'w. 4Majxtzun eb'ajxob'ju' xjal te q'oj intoq che xq'uqin ttziju' muqb'il ex majx e'pon tz'aq tu'n kxob'il nakuj e'kyim. 5Atzunju' anjl xitma'n kyeju' qya kjalu: —Lalun che xob'e'. Qu'n b'i'n we'wu'n qa nche jyone' ti'j Jesus, aj jawq'o'n twitz krus, chij. 6Mixti'tlte' tzalu, qu'n matxi' jaw anq'in kse'nxju' tma. Kuktzaje' ka'yilte ja kub'a' q'o'na' t-xmilal. 7Wixi'x kukxi'ye' q'malte kyeju' t-xnaq'tzb'en kjalu: Matxi' jaw anq'in, ex matxi' txi' kaliley tu'n kyok tb'u'yi'n jumajtle'; atzuntzu' k'okyela' kka'yintle' chij. Qu'n matxi' txi' nma'n kyeye' chi anjl kyeju' qya. 8Aye'tzunju' qya lwiyxi'x eb'jik' b'et tk'etzju' muqb'il, intoq che xob' ex intoq che tzalaj tu'n tpaj, ex exi' q'malte tqanil ojqel kyeju' t-xnaq'tzb'en Jesus. 9Tetzunj intoq che b'et kub' tyek'u'ntib' Jesus kwitz ex exi' tq'olb'e'n. Aye'tzunkye qya exi'lq'e tk'etz Jesus, e'kub' meje ex majx ok kychle'n tqan, 10atzunte Jesus xitma'n kye: —Lalun che xob'e'. Ku'kxiye' q'malte tqanil kyeju' witz'ine' tu'n kxi' toj Kaliley, qu'n atzu' chin nokyela' kka'yine', chi Jesus kyeju' qya. 11Tetzunj kxi'ju' qya, aye'tzun junjunju' xq'uqil eb'ajx q'mal tqanil toju' nintnam kyeju' kynejel pale tkyaqilju' ma'toq b'aj. 12Aye'tzunju' knejel pale eb'aj yolin kyuk'i'lju' tijwnaq ati kyoklen kxol aj Juda ex b'entti'j kyu'n tu'n txi' kq'o'n txqan pwaq kyeju' xjal te q'oj e'xq'uqin ttziju' muqb'il, 13xi'tzun kma'n kye: —Kmanxe' kjalu kye xjal: Te qonik'an tej intoq qo wtane', mache ponju' t-xnaq'tzb'en Jesus ex matxi' txi' kyi'nju' t-xmilal. 14Qatzun matb'iju' kawil, atzun qo' yoline' tuk'i'l tu'n tkub' tk'u'j tu'ntzun lalun kub' tz'e'ysa'n kwitze', chechi nejenel kyeju' xq'uqil. 15Aye'tzunju' xq'uqil ku chechij, xikytzyu'nju' pwaq ex kyb'incha' se'nxju' xiq'ma'n kye. Aju' chajyolil lu kub' puqli toju' tq'ijlalil aju' expe' ax nyonlinjtzu' toj tq'ijlalil ja'lo kxolju' aj Juda. 16Aye'tzunju' junlajoj (11) t-xnaq'tzb'en e'pon toj Kaliley, twi'ju' witz jaxitma'na' Jesus kye. 17Tetzunj tok kka'yi'n Jesus ek'ulun te, extzun ateqe' junjuntl intoq jawje' kyanmi. 18Atzunte Jesus pon lq'e kk'etz ex xitma'n kye: —Matxi' tzaj q'o'n woklene' tib'aj tkyaqilju' ati twitz kya'j ex twitz tx'otx'. 19Qu'mtzun kuxkxi'ye' kyoj kkyaqil tnam, ex kmanxe' kye kkyaqil xjal tu'n kyok te nxnaq'tzb'ene'; tu'n tjaw a' kwi' kyu'ne' toj tb'i Manb'aj, toj tb'i K'wa'lb'aj ex toj tb'i Xewb'aj Xjan, 20ex kyxnaq'tzanxe' kye tu'n tjapun kyu'n tkyaqilju' matxi' nchaq'e' kyeye'. Ayintzunwe' chin tenb'ile' kyuk'i'le' tkyaqil q'ij, tzmax ajtjapun mankb'il q'ij, chi Jesus kye t-xnaq'tzb'en.

will be added

X\