Mateo 27

1Tetzunj qsqix, kkyaqilju' knejel pale exqe'ju' tijwnaq ati kyoklen kxol aj Juda eb'aj yolin kxolilex ex kub' kxima'n tu'n tkub' kb'yo'n Jesus. 2Kub' kk'lo'n ex xikyi'ntzuntz, ex pon kyi'n twitz Pilat, kawil aj Rom. 3Atzunte Judas aj jawmiltz'uj ti'j Jesus, tej tka'yinte qa matxi'toq b'entti'j kyu'n xjal tu'n tkub' b'yo'n Jesus, majx anjtzti'j tk'u'j ex xitanjsa'n ti'ju' junaq lajoj (30) pwaq kyeju' knejel pale exqe'ju' tijwnaq ati kyoklen kxol aj Juda, 4ex xitma'n kye: —Matxi' chin b'inchan ile' tu'nju' xi' nq'o'ne' jun ichan mixti' til toj kq'ob'e' extzun kkyimel, chij kye. Aye'tzunkye xikytzaq'we'n te Judas: —¿Mixti'qe' qoklen ti'j?. ¡Ti'xta tz'iq'laj ti'j! chechij te Judas. 5Atzunte Judas kyej tchto'nju' pwaq kwitz toj tja Dyos ex xi'tzuntz ex jaw tjtz'o'ntib', kyimtzuntz. 6Aye'tzunju' knejel pale jaw kyi'nju' pwaq, ex kmatzuntz: —Aju' pwaq lu taq'wix tu'n tku'x toj tk'b'el pwaq te oyaj, qu'n chojb'il tkamik jun xjal, chechij. 7Eb'ajtzun yolin ti'ju' pwaq kyej tanjsa'n Judas ti'j ex b'entti'j kyu'n tu'n klq'onte jun tnej tx'otx' okkyq'o'n tb'i Ttx'otx' b'inchal k'wil, tu'n tajb'en muqb'ilkyeju' najchaq xjal. 8Qu'mtzun a tb'iju' tnej tx'otx' lu kyej q'o'n Tx'otx' twi' tchk'el jun xjal, ex ax tb'iju' tok ja'lo. 9B'aj tkyaqil ja'lu, ex japunju' kyej ttziya'n Jeremiy tej tmante kjalu: Xikyi'nju' junaqlajoj (30) pwaq, aju' twi' jun xjal kyejni b'entti'j kyu'nju' aj Israel, 10ex klaq'ju' jun tnej tx'otx', ttx'otx' b'inchal k'wil tb'i, iku' se'nxju' tzaj q'ma'n weye' tu'n Taye. 11Xi'tzun q'i'n Jesus twitzju' kawil, ex ate xitqani'n te: —¿Ma ajuya nimaqkawil kxol aj Juda? chij te —Iku' se'n xtmaya, ayine', chi Jesus xittzaq'we'n teju' kawil. 12Tetzunj te'ktoqju' knejel pale exqe'ju' tijwnaq ati kyoklen kxol aj Juda poqolte Jesus, atzunte' Jesus mixti'tl xittzaq'we'n. 13Qu'mtzun xiya' tqani'n Pilat te Jesus kjalu: —¿Ma minti' ntb'i'na titi'ju' nkma'n xjal ti'ja? 14Atzunte Jesus mixti'x jun yol xittzaq'we'n; qu'mtzun ojexi'x lab'tiju' kawil ti'j. 15Tojtzun niq'ij intoq xittzaqpi'n kawil jun xjal jpu'n atl junjun ab'q'i, alkyexku' xjal jpu'n makyqani tnam, atzun nxi' tzaqpi'nju'. 16Atitoqtzun jun xjal jpu'nkx atoq tb'iju' B'arab'as ojtzqi'nxi'xtoq kyu'n xjal; 17tetzunj tb'aj kychmo'n kyib'ju' xjalxi' qani'n kye tu'n Pilat kjalu: —¿Alkye kyajb'ile' tu'n txi' ntzaqpi'ne': Ma aju' B'arab'as mujqa aju' Jesus, aju' Krist tb'i? 18Qu'n ma'toq tz'el tnik' Pilat ti'j qa xiq'o'n Jesus toj tq'ob' naqx tu'n tpaj ntx'a'lti'j kk'u'j xjal ti'j. 19Tetzunj q'uqlitoq Pilat toju' tja kawb'il, tzaj chq'o'n jun xjal tu'n t-xu'jil Pilat q'malte te: Lalun tz'ok tq'o'ntib'a kawil ti'ju' xjal tnik'alti'j, qu'n matz'ok q'o'n txqan nwitzik'e' taq'wixi'x tu'n tpaj, chij. 20Aye'tzunju' knejel pale exqe'ju' tijwnaq kxol aj Juda, kub'kyi'j kkyaqilju' xjal kyu'n ate'toq atzu', tu'n kyqaninte tu'n tetz tzaqpi'n B'arab'as, atzunte Jesus tu'n tkyim. 21Xi'tzun tqani'n jumajtlu' kawil kye xjal kjalu: —¿Alkye jun kxolju' kab'e' lu, kyajb'ile' tu'n tex ntzaqpi'ne'? Aye'tzunkye' xjalxi' ktzaq'we'n te: —Aqe' kajb'il tu'n tetz ttzaqpi'na B'arab'as, chechij. 22Atzunte Pilat xitqani'n kye: —¿Yajtzun ti'j Jesus aju' Krist tb'i titi' knb'incha'ye' ti'j? chij Aye'tzun xjal kkyaqil tzaj ktzaq'we'n ex kma: —¡Q'onktz twitz krus!, chechij. 23Atzunte' Pilat xitqani'n kye: —¿Titi'tzun taq'wix xtb'incha? Aye'tzunkye' xjal e'jaw ẍch'inxi'xtl kuw ex kma: —¡Q'onktz twitz krus!, chechij. 24Tetzunj tkya'yinte Pilat qa mixti'xtaq tu'me'l tu'n tb'entju' tajb'il, qu'n xi'toq nche jawa' tilju' xjal tu'n tpaj, tchaq'tzuntz tu'n txi' nenb'aj a', ex el ttxjo'n tq'ob' kywitz xjal, te yekb'ilte qa mixti' tpaj ti'ju' tkamik Jesus ex tmatzuntz: —Myayinwe' ati npaj qama kyimju' ichan lu mixti' til, aye'xixe' tib'aj, chi Pilat. 25Kykyaqiltzunju' xjal xikytzaq'we'n te: —¡Kub' tz'aqku' tililj qib'aje' ex kyib'aju' qk'wale'! chechij. 26Etztzun tzaqpi'n B'arab'as tu'n Pilat; atzunte Jesus b'aj jiku'n toj asyal ex xiq'o'ntzuntz toj kyq'ob' xjal tu'n tjaw kyq'o'n twitz krus. 27Xi'tzun q'i'n Jesus kyu'nju' xjal te q'oj te kawil, ex okx q'i'n toj tja kawb'il ex atzuntzu' b'jo'k kb'u'yina' kyib' ti'j. 28Eltzun kyin t-xb'alun Jesus ex okkyq'o'n jun pinpa't kyeqka'yin ti'j te xmayb'ilte 29ex jaxkyq'o'n jun xpatx'i'n ch'i'x toj twi' nakuj te ninb'ilte, ex ikx xikyq'o'n jun tze toj tb'a'nq'ob', nakuxwitloj ati toklen. Eb'aj kub' mejetzuntz twitz ex intoq che xmayin ti'j nxi' kma'nxi' te: —¡Nimanxwit tb'iju' nimaqkawil kye aj Juda! chechij. 30Ex ikx intoq nokx ktzub'a'n toj twitz ex tu'nxju' tze nel kyi'n toj tq'ob' nku'x kyjuma'n toj twi'. 31Tetzunj kyb'aj xmayin ti'j, elkyi'n pinpa't kyeqka'yin toktaq ti'j ex okkyq'o'n jumajtlu' t-xb'a'lun, ex xikyi'ntzuntz tu'n tjaw twitz krus. 32Tetzunj ljo'ntoq kyetz toj nintnam, okyal jun xjal aj Siren kyu'n, Simon tb'i; okkychq'o'n xjal lu tu'n t-xitiqa'n tkurus Jesus. 33Tetzunj kpon toju' tal tnej tx'otx' Kolkota tb'i, (ax tz'elpuna'ju', Tx'otx' te tb'aqil kyimni), 34xikyq'o'nju' b'in smo'n tuk'i'l ta'l k'ul majx k'a, tetzunj t-xi' tnik'b'e'n mixti'x xitk'wa'ntl. 35Tetzunj ma'toq jaw kyq'o'n Jesus twitz krus, kub' kyjyo'n ti'j alkyetoq kxe'l q'inte t-xb'alun Jesus. Kyb'inchaju' lu tu'n tjapun kyejni tziya'n tu'n t-sanjelal Dyos aj ntma'n: B'aj ksipa'n nxb'alune' kxolilex, ex kub' kyjyo'n ti'j nxb'alune' chiju' kyejni tziya'n. 36Tetzunj tb'aj kb'incha'nju' lu, axtzuntzu' ekub'a' qe xq'uqilte Jesus. 37Kub'tzun ktz'ib'a'n til Jesus twitz jun piẍ tz'len ex jax kq'o'n tib'aj twi', twitz krus intoq tma'n kjalu: Ate Jesus lu, kynimaqkawil aj Juda, chiju' yol tz'ib'a'n. 38Ex e'jaw q'o'n kab'e' xjal eleq' tuk'i'l Jesus twitz krus, jun jawq'o'n toj tb'a'nq'ob' ex juntl toj tnayaj. 39Aye'tzunju' xjal nche ik' atzu' intoq che jax ilun kyi'j ex majxtoq nxi' kyukcha'n kwi' 40ex intoq kma'n: —¡Aya intoq tma'na tu'n tkub' t-xituna tja Dyos ex tu'ntoq tjaw tb'incha'ntla toj oxe' q'ij! ¡Qanatzun Tk'wal Dyosa, klom tib'a tib'xtib'a ex kutku'tza twitz krus! chechij te Jesus. 41Ex ikqexju' knejel pale exqe'ju' xnaq'tzal ti'j kawb'il intoq che xmayin ti'j Jesus kyuk'i'lju' tijwnaq ati kyoklen kxol aj Juda ex intoq kma'n: 42— Nim xjal eb'aj klet tu'n, atzunte mixti'x nb'ent tklet tu'nxtib'. Qa a nimaqkawil kye aj Juda: ¡Kunatzun tku'tz twitz krus tu'ntzun qokslan te! 43Q'uqlina' tk'u'j ti'j Dyos: ¡kuttzaj Dyos klolte ja'loxi'x qa nlaqj tk'u'j ti'j! ¿Ma mitzun jun tzaj tma'n qe qa Tk'wal Dyos? chechij. 44Expe' aye'x junju' eleq' tqe'ktz twitz krus tuk'i'l Jesus intoq che ilin ti'j. 45Kub'tzun qloljix tkyaqil twitz tx'otx' tej ttzaj wanq'ij ex tzmaxi' spik'e'ju' tej ttzaj oxe' te qale. 46Textzunju' kmuj lu jaw ẍch'in Jesus tu'n tkyaqil tipumal ex tma: Eli, Eli, ¿lama sab'aktani? (aye'tzunju' yol lu a nkma'nju': Nman Dyos, Nman Dyos, ¿Titiqu'n ẍin kyeja' tkolb'ena?) chij. 47Ate'toqtzun junjun tqe' atzu' kb'iju' tyol Jesus ex kma: —Ate' ntxko'nju' aju' t-sanjelal Dyos Eliy tb'i, chechij. 48Ex lwiy xi' ojqelan junkye ex tzaj tiq'i'n jun esponja, ku'xtzun tnub'a'n toj b'inayr ex oktq'o'n ti'j twi' jun tqan ptz'en ex jaxtq'o'n tu'n tel ttz'ub'a'n Jesus ti'j. 49Aye'tzu'n txqantl kyma: —Xleku'j nej, atzun qil qama tzul Eliy klolte, chechij. 50Atzunte Jesus jawẍch'in jumajtl kuw ex majxtzun kub' natxk'uj. 51Textzunju' kmuj tej tkyim Jesus majx xiẍilju' xb'alun yo'l toj tja Dyos toj kab'e', tzaj laqj toj jawl ex majx k'u'l b'aj t-xexi'. Ex ojexi'x yukchiju' tx'otx' ex majx eb'ajx paxju' nimaq pik 52ex majx eb'ajx jaqliju' muqb'il; expe' txqanju' xjal kub' kyxjansa'n kyib' ojetoq che kyim, e'jatz anq'in jumajtl. 53Tjawlenxi'tzun anq'in Jesus eb'je'tzju' xjal lu toju' muqb'il ex eb'jo'kx toju' xjan nintnam Jerusalen, ja eb'jo'k ka'yina' kyu'n txqan xjal. 54Tetzunj tka'yinte nejenel exqe'ju' nche xq'uqin ti'j Jesus tej ttzaju' kyejnajnab' ex tkyaqilju' txqantl ti'xti', majx tzaj txqan xob'il kyi'j ex kyma: —¡Axxi'x Tk'wal Dyoste' ichan lu, chechij! 55Ate'toqtzun txqan qya atzu' intoq che ka'yinx najchaq ti'j Jesus, aye'j eb'jo'k lpe ti'j tzmax toj Kaliley ex eb'inchan xtalb'il te Jesus. 56Kxoltzun qya lu atitoq Mariy aj Makdala, ex Mariy ktxu Santyay ex Jse, extzunju' ktxu tk'wal Seb'edey. 57Tetzunj tqo'qax ul jun ichan q'inun a tb'iju' Jse aj Arimatey, ojetoq tz'ok te t-xnaq'tzb'en Jesus. 58Xi'tzun tk'etzju' Pilat ex xitqani'n t-xmilal Jesus te. Atzunte Pilat tchaq' tu'n txi' q'o'n te, 59Xi'tzun ti'n Jse t-xmilal Jesus ex kub' tb'altz'i'n tojun xb'alun saqile 60ex kub' tq'o'n tojun tmuqb'il Jse ak'a'j ojetoq b'ent tu'n twitz jun pik. Tzajtzun ttoli'n jun ab'j ttziju' muqb'il tu'n tjpet ex anjtzuntz. 61Atzunte Mariy aj Makdala exju' juntl Mariy e'kyaj qe nqayin ttziju' muqb'il. 62Tojtzun juntl q'ij, mujqa toj sab'l, aye'ju' knejel pale exqe'ju' parisey b'aj kychmo'n kyib' ex exi' kkyaqil tk'etz Pilat, 63ex xikyma'n te: —Taye, ati jun tyolju' xjal nimaqchalyol saj qna'ne' intoq tma'n tej itz'xtoq kjalu: tb'ajlenxi' oxe' q'ij nkuxlen mqu'ne' kchin jawil anq'ine' kxol kyimni, chij b'aj tma'n. 64Qu'mtzun, chq'onqe'xa t-xjala xq'uqilteju' muqb'il tzmax ajtjapu'n oxe' q'ij, qu'n jaku' che ulju' t-xnaq'tzb'en ex jaku' tz'ex kyelq'a'n t-xmilal, jakutzun txikyma'ntz kye xjal qa matxi' jatz anq'in kyxol kyimni. Jakutzun tz'okxi'x juntl chajyolil taq'wixi'xtl kyetwitzju' tnejel, chechij xikyma'n te Pilat. 65Atzunte Pilat xitma'n kye: —Lu jun k'loj xjal te q'oj mache'x kyuk'ile'. Kukxi'ye' ex kyjpunkye' muqb'il b'a'nxi'x, ex kb'inchame' se'nxju' b'a'n toj kwitze', chi Pilat kye. 66Eb'ajxtzuntz ex kyej kyjpu'nju' muqb'il b'a'nxi'x, majx kyej kyxtanu'n tu'n jun ab'j; ex e'kyaj kq'o'nju' xjal te q'oj xq'uqilte.

will be added

X\