Mateo 26

1Tetzun tb'aj tma'n Jesus tkyaqilju' xnaq'tzb'il lu, xitma'ntzuntz kyeju' t-xnaq'tzb'en kjalu: 2B'i'n kye'kyu'n qa naq kab'e' q'ijtl tu'n tkub' ik'setju' Tq'ij tzaqpib'l ex chin xe'l q'o'ne' toj kyq'ob' xjal ayine' Tk'wal Dyos tu'n njaw q'o'ne' twitz krus. 3Tojtzunju' q'ij lu, b'aj kychmo'n kyib'ju' knejel pale, exqe'ju' tijwnaq kxol aj Juda twitz tjaju' knejel pale nimaq toklen, Kaypas tb'i, 4eb'ajtzun yolin tiju' tu'me'l tu'n ttzyet Jesus kyu'n tuk'i'l sb'ub'l, tu'ntzun tkub' kb'yo'n. 5Ex kmatzuntz kxolilex kjalu: —Lalun qtzuy toju' niq'ij, tu'ntzun lalun che b'jaw tilju' xjal, chechij. 6Atitoqtzun Jesus tja Simon najli toju' tnam B'etanya, aj atitoq xlemtx'a'k ti'j; 7pon lq'eju' jun qya tk'etz Jesus q'i'ntoq jun lmet k'ok'sb'il tu'n twi' wi'yal. Tetzunj q'uqlitoq Jesus ti'j mes, tzaju' qya ex jax tqo'n toj twi' Jesus. 8Aye'tzunju' t-xnaq'tzb'en, tej kka'yinte, tzaj ktx'u'jil tu'n ex kma: —¿Titiqu'n xkub'a' yajtiju' k'ok'sb'il lu? chechij. 9Ma'wtlo txi' k'ayit tu'n txqan pwaq, ex ma'wtlo che'x onitju' prow tu'n, chechi xnaq'tzb'en. 10Atzunte Jesus tej teltnik' kyi'j, xitma'n kye: —¿Titiqu'n saja' ktx'u'jile' ti'ju' qya lu? ate' qya lu matxi' tb'incha jun b'a'n weye'. 11Qu'n aye'kye' prow kukx ktenju' kxole', ayintzunwe' mya kukx chin tenb'ile' kxole'. 12Ate' xtb'inchaju' qya lu, tej xjax tq'o'nju' k'ok'sb'il toj nwiye', matb'incha tu'n tb'ent ntene' ajnku'x mqu'ne'. 13Axxi'x kxe'l nma'n kyeye', jaxjaku' mapakb'etaju' tpakb'al b'a'n toj tkyaqil twitz tx'otx', kxe'l pakb'a'n tiju' xtb'inchaju' qya lu wi'je', tu'ntzun tajb'en te nab'ab'lte. Chi Jesus xitma'n kye. 14Atzunju' jun kxolju' kab'lajoj t-xnaq'tzb'en Jesus, aju' Judas Skaryot, xi' kyk'etzju' knejel pale 15ex xitma'n kye: —¿Jte' ktzajel kyq'o'ne' weye' qama txi' nq'o'ne' Jesus toj kyq'ob'e'? Aye'tzunkye' knejel pale xi' kychjo'n junaq lajoj (30) saqpwaq te Judas tu'n t-xitq'o'n Jesus toj kyq'ob'. 16Textzun kmuj lu aq'wi Judas jyol tu'me'l se'ntaq'wi tu'n txi' tq'o'n Jesus toj kyq'ob'. 17Tojtzunju' tnejel q'ij teju' ninq'ij tej intoq che wan xjal wab'j mixti' ttx'amal, e'pon lq'eju' t-xnaq'tzb'en tk'etz ex xikyqani'n te Jesus kjalu: —¿Ja tajb'ila'ya tu'n tkub'a' qb'incha'ne' wab'j toju' tq'ij tzaqpib'l? chechij te Jesus. 18Atzunte' Jesus xitma'n kye: —Kukxi'ye' toju' nintnam tja jun xjal, ex kmanxe' te kjalu: Ch'inxtl tpon kmuj weye', qu'mtzun atzu' kb'ela' wik'sa'njuye' tq'ij tzaqpib'l tjaya kyuk'i'lju' nxnaq'tzb'ene'. 19Aye'tzunju' t-xnaq'tzb'en kb'inchaju' matxi'toq txi' tma'n kye, ex kub' kb'incha'n wab'j tu'n tkub' kyik'sa'nju' tq'ij tzaqpib'l. 20Tetzunj qok yupj, okqe Jesus ti'j mes kyuk'i'lju' kab'lajoj t-xnaq'tzb'en; 21Ex tej intoq che wan, xitma'n Jesus kye: —Axxi'x kxe'l nma'n kyeye' qa ati jun kxole' kjawil miltz'uj wi'je' ex chin xe'l tq'o'ne' toj kyq'ob' xjal. 22Tzajtzun txqan b'is toj kyanmiju' t-xnaq'tzb'en tej kb'inte ex teyile junjun okten qanilte te Jesus kjalu: —Taye, ¿Ma ayinqine'? chechij te. 23Atzunte Jesus xitma'n kye: —Aju' jun nku'x tnub'i'n twa toj pik'laq junx wuk'i'le', atzun kjawil miltz'uju' wi'je'. 24Ayine' Tk'wal Dyos chin xe'l q'o'ne' toj kyq'ob' xjal iku' se'n ntma'n toj tu'jil tyol Dyos kjalu; ¡qab'anxtzuntej xjal twitz qama jawmiltz'uj tiju' Tk'wal Dyos! Maswitlo b'a'n naqwit ikj mixti'x ul itz'j. 25Atzunte Judas aju' jawmiltz'uj ti'j Jesus, xitqani'n te: —Xnaq'tzal, ¿Ma ayintzuloye'?, chij. —Anatzuna, chi Jesus xittzaq'we'n te. 26Tetzunj intoq che wan, jaw ttzyu'n Jesusju' wab'j, ex tej txi' tq'o'n chjonte te Dyos kub'tzun taq'puntz ex xitq'o'n kyeju' t-xnaq'tzb'en, tmatzuntz kjalu: —Ktzyunxe' ex kwanxe'; qu'n ate nxmilalju'ye' lu. 27Ex ikx jaw ttzyu'n jun k'wab'l toj tq'ob', xitq'o'n chjonte te Dyos, xitq'o'ntzuntz kye ex tma kjalu: —Kk'wanxjuye' lu te kkyaqile', 28qu'n ate' nchk'eljuye' lu, tu'n tajb'en te q'uqb'ab'l tk'u'jlajilju' yol kyejni b'entti'j tu'n Dyos kyuk'i'le', ex tu'n tajb'en te najsb'il kyilju' txqan xjal aj il. 29Extzun kxe'l nma'n kyeye' qa layx chin k'wan jumajtle' kyuk'i'le' ti'ju' tal ub'a, tzmaxi'j aj qwan jumajtel kyuk'i'le' ti'ju' ak'a'j b'in toj tkawb'il Qman Dyos. Chi Jesus xitma'n kye. 30Tb'ajlenxi'tzun kb'itzi'n b'itz exi' twi'ju' witz Olib'os tb'i. 31Xi'tzun tma'n Jesus kye: —Kkyaqilxe' k'elel kypa'n kyib'e' wi'je' teju' qonik'an ja'lo. Ati jun yol kyejni tz'ib'a'n toju' tu'jil tyol Dyos kjalu: Kb'el nb'yo'njuye' k'ik'lel ex majx che kxe'l slamju' trit. 32Ajtzun njaw anq'ine', che okyel nb'u'yi'n jumajtle' toj Kaliley. 33Atzunte Luch xittzaq'we'n te Jesus ex tma: —Maskyelo k'elel kypa'n kyib' kkyaqil ti'ja, ayintzunwe' lay tz'el npa'nwib'e' ti'ja, chij. 34Atzunte Jesus xitma'n te: —Axxi'x kxe'l nma'n teya Luch, texju' qonik'an lu, ma'toq chin kub'tewa'n oxe' maja ajtjaw oq'ju' tmanek', qu'n ok tmaya qa minti' ojtzqi'nqine' tu'na, chi Jesus te. 35Xi'tzun ttzaq'we'n jumajtlu' Luch te Jesus ex xitma'n te: —Maskye machin kyime' tuk'i'la, ex lay kub' wewa'na, chij. Kkyaqilxtzunju' t-xnaq'tzb'en Jesus intoq kyma'n ikxju' se'nte Luch. 36Pontzun Jesus kyuk'i'lju' t-xnaq'tzb'en toju' najb'il Jetzemani tb'i, tetzunj kpon xitma'n Jesus kye: —Che qekje' tzalu, ayintzunwe' machinxe' na'l Dyos chix, chi Jesus kye. 37Exi'tzun tk'le'n Jesusju' Luch exqe'ju' kab'e' tk'wal Seb'edey tuk'i'l, ex tzaj txqan b'is toj tanmi, qu'n ex ch'yo'n toj tk'u'j tkyaqilju' atitoq tu'n tik'xtu'n. 38Xi'tzun tma'n Jesus kye: —Nimxi'x b'is ati toj wanmiye' nakuj ch'inxtl nkyime' tu'n. Che' tenkje' tzalu ex che xq'uqine' wuk'i'le', chi Jesus kye. 39Xi'tzun lq'e ch'intl Jesus kwitzxi', kub'joqe ex majx kuponju' tplaj twitz tx'otx' ex aq'witzuntz na'l Dyos kjalu: Nman Dyos, naqwit ati tu'me'l tu'n lalun chin nokye' toj tkyaqilju' yajb'il lu majx k'a; extzun lalun b'inchetju' wajb'ile' naq o'kx tu'n tb'ent aju' tajb'ila, chi Jesus toj tna'j Dyos. 40Tetzunj tb'aj na'n Dyos ul kk'etzju' t-xnaq'tzb'en, aye'tzunkye' t-xnaq'tzb'en matxitoq che b'jik'wtan. Xitma'ntzuntz te Luch kjalu: —¿Se'n taq'wi minti' xkyipaye' tu'n kxq'uqin jun tal kmuje' wuk'i'le'? 41Lalun che ik'wtane' ex che na'nqe' Dyose' tu'ntzun lalun che okye' toj joyb'ilkyi'je'. Tajb'ilte' kyanmiye' tu'n kyxq'uqine', atzu'n kyxmilale' min ntipa'n, chi Jesus kye. 42Xi'tzun jumajtl Jesus na'l Dyos ex tma kjalu: Nman Dyos, qa mixti' tu'me'l tu'n tmqet tkyaqilju' yajb'il lu tu'n tik'x wu'ne', japunxwitju' tajb'ila chi Jesus tma toj tna'j Dyos. 43Tetzunj tb'aj na'n Dyos tkamaji'n, ul jumajtl kk'etzju' t-xnaq'tzb'en intoq che wtan, qu'n yo'lokxi'xtoq kwatl. 44Ex axtzu' ekyeja' tq'o'n, atzunte xi' jumajtl na'l Dyos toxmaji'n, ex aye'x yolju' xitma'n. 45Ultzun jumajtltzu' kk'etzju' t-xnaq'tzb'en ex xitma'n kye: —Che wtanqetzune' ja'lo ex che ojlane'. Qu'n matxi' ponju' kmuj tu'n nxi' q'o'ne' ayine' Tk'wal Dyos toj kyq'ob'ju' aj il. 46Qu'mtzun che we'ktze' ex qo'qe'ye'; qu'n luju' xjaw miltz'uj wi'je' tzul, chij. 47Inxtoqtzun yolin Jesus kyuk'i'l, tej tponju' Judas kk'etz, jun xnaq'tzb'en kxolju' kab'lajoj, k'le'nqetoq txqan xjal tu'n iq'i'ntoq kk'uẍtx'e'nb'il ex ktze. Aye'ju' xjal lu chq'o'nqetoq kyu'nju' knejel pale ex kyu'nju' tijwnaq nimaq kyoklen kxolju' aj Juda. 48Aju' Judas jaw miltz'uj ti'j Jesus matxi'toq b'entti'j tu'n kyuk'i'lju' xjal titi'ju' tu'me'l tu'n tb'inchante ti'j Jesus tu'n txi' tq'o'n toj kyq'ob', xi'tzun tma'n kjalu kyeju' xjal: Aju' k'okyel nma'tzine' atzunju', wixtzun ktzyume' chij. 49Pon lq'etzun Judas tk'etz Jesus ex xitma'n te: —¡Qa'lte, Xnaq'tzal! chij ex oktma'tzi'n. 50Atzunte Jesus xittzaq'we'n te: —Wamiw, b'inchamjuya t-xima. Aye'tzunju' xjal e'pon lq'e tk'etz Jesus ex tzyet Jesus kyu'n. 51Atitoqtzun jun kxolju' t-xnaq'tzb'en Jesus jatz tiq'inju' tk'uẍtx'e'nb'il ex xi' ojqelan tx'emulte t-ẍkyinju' jun tmajenju' knejel pale. 52Atzunte Jesus xitma'n te: —K'u'nkuxa tk'uẍtx'e'nb'ila toj tk'b'el. Qu'n kkyaqilju' nche b'ujun tuk'i'l k'uẍtx'e'nb'il, tu'nx k'uẍtx'e'nb'il nche kyima'. 53¿Ma minti' b'i'n tu'na, qa wajb'ile' jaku' txi' nqanine' te Nmane', ex jaku' ja'loxi'x che tzaj tchq'o'n kab'lajoj tk'i' ch'intl k'loj anjl klol weye'? 54Extzun mlay txi' nqanine' qu'n, ¿se'ntzun tu'n tjapunaju' yol tz'ib'a'n toj tu'jil, aj ntma'n qa ilti'j tu'n tjapun ikju'? 55Xi'tzun tqani'n Jesus kye xjal: —¿Titiqu'n ẍe ulaye' tuk'i'l k'uẍtx'e'nb'il ex tuk'i'l kytzeye' tzyulweye' nakuj eleq' qine' toj kwitze'? Extzun tkyaqil q'ij nchin xnaq'tzane' toj tja Dyos kyeye' ex min ẍin ktzyuye'. 56Tkyaqiltzun ja'lu nb'aj tu'n tjapun kyej ktz'ib'a'n t-sanjelal Dyos toju' tu'jil. Chi Jesus xitma'n kye xjal. Kkyaqiltzunju' t-xnaq'tzb'en eb'aj kub' oq ex kyej kyq'o'n Jesus tjunal teju' kmuj lu. 57Aye'tzunju' xjal etzyunte Jesus atzu' xa' kyina' twitzju' knejel pale Kaypas tb'i, ja b'u'yi'ntoqa' kyib'ju' xnaq'tzal ti'j kawb'il exqe'ju' tijwnaq ati kyoklen kxol aj Juda. 58Atzunte Luch xi' lpe najchaq ti'j Jesus tzmaxi'j tej kpon twi' tpen tjaju' knejel pale. Atzuntzu' kub'a' qe Luch junx kyuk'i'lju' intoq che xq'uqin, tu'ntoq tka'yinte titi' kb'ajel ti'j Jesus. 59Aye'tzunju' knejel pale exqe'ju' tijwnaq ex kkyaqilju' k'loj tzyul kawb'il intoq kyjyo'n jun tziyal taq'wix ti'j Jesus tu'ntzun tkub'toq kb'yo'n, 60extzun mixti' okyal kyu'n, maskyepe' nim txqan xjal e'pon q'malte chajyolil ti'j Jesus, ex mixti' b'enti kyu'n. Yajxi'tzuntel e'pon kanun kab'e' xjal chalyolqe' te tziyal taq'wix ti'j Jesus, 61ex kma kjalu: —Ate ichan lu ntma'n kjalu: Jaku' kub' nxitu'nwe' tja Dyos ex jaku' b'ent jumajtl wu'ne' toj oxe' q'ijx, chiqe' chalyol ti'j Jesus. 62Jawtzun we'ju' knejel pale tej tb'inteju' lu, ex xitqani'n te Jesus: —¿Titiqu'n minti' ntzaj ttzaq'we'na? ¿Titiqu'n naq nb'ina tiju' nq'manjtz ti'ja? chij te Jesus. 63Atzunte' Jesus mixti'xte' xittzaq'we'n. Xi'tzun tma'ntlju' knejel pale te: —Kxe'l nma'n teya toj tb'i Dyos itz' tu'n ttzaj tma'na axxi'x qeye' qa aya Krist, aj Tk'wal Dyos. 64Atzunte Jesus xittzaq'we'n te: —Ayine', iku' se'n xtmaya. Ex ikx kxe'l nma'n kyeye' qa kjapumel tq'ijlalil ok chin kla'ye' q'uqliqine' toj tb'a'nq'ob' Dyos nimtipumal, ex chin kyla'ye' ajntzaje' toj muj twitz kya'j, chi Jesus xitma'n te knejel pale. 65Tetzunj tb'inte knejel pale aju' tyol Jesus, majxkub' tlaqu'n t-xb'alun te yek'b'ilte qa inxi'xtoq q'ojin ex tma kjalu: —¡Myab'a'n tyolju' ichan lu ti'j Dyos! ¿Titi'tzun tajb'en txqantl tziyil tu'n qb'inte? Matxina kb'iye' tyol, in xmayi'n ti'j Qman Dyos; 66¿Titi'kye' nkma'n tu'n ja'lu? chij kye xjal Aye'tzunju' xjalxi' ktzaq'we'n te ex kma: —Atite' til ex b'a'n tu'n tkyim, chechij. 67Eb'jo'ktzun ten tzub'alte toj twitz Jesus ex eb'jo'kten b'yolte. Atzun junjuntel eb'jo'kten tz'ajulte twitz, 68ex intoq xikyma'n te: —Q'mantz tzuna qeye' alkye sok jumanteya, qu'n anaya Krist tk'wal Dyos. 69Atzunte Luch q'uqlitoq twi' pe'n. Atitoqtzun jun txin majen ex o'kx tpon lq'e tk'etz ex xitma'n te: —Ex axtoq junta nb'et tuk'i'l Jesus te Kaliley, chij 70Atzunte Luch kub' tewa'n kwitz kkyaqilju' ate'toq atzu' ex tma: —Minti' b'i'n wu'ne' alqi'j nyolina'ya, chi Luch. 71Etztzun Luch ttzija, ex ikx ilwi tu'n juntl txin majen, atzunju' txin lu xitma'n kye xjal ate'toq atzu', ex tma: —Atoq junte' ichan lu nb'et tuk'i'l Jesus te Nasaret, chiju' majen. 72Atzunte Luch kub' tewa'n jumajtel, expe' tzaj tna'n tb'i Dyos ti'j tej tmante kjalu: —¡Mixti' wojtzqi'nwe' ichan lu! chij. 73Yajxi'tzun ch'i'ntel, kkyaqilju' xjal ate'toq atzu' e'pon lq'e tk'etz Luch ex xikyma'n te: —Axxi'x ax junta kyuk'i'l. Qu'n q'ancha'lxi'xju' yolina ikxju' se'nkye, chechij te Luch. 74Atzunte' Luch tej tb'inte ja'lu, aq'witzuntz ilil tib' tib'xtib' ex tzaj tna'n jumajtlu' tb'i Dyos, tmatzuntz kjalu: —¡Mixti' wojtzqi'nwe' ichan lu!, chij. Textzunju' kmuj lu, jaw oq'ju' tmanek', 75ex atzuntzu' tzaja' tna'n Luch yol xi'ni tma'n Jesus te: Ma'toq chin kub'tewa'n oxe' maja ajtjaw oq'u' tmanek', chij. Tetzunj ttzaj tna'n Luch, etztzuntz ti'jxi' ja ex majxkub' oq' b'a'nxi'x qu'n majx ex ch'yo'n toj tanmi.

will be added

X\