Mateo 24

1Tetzunj tetz Jesus toj tja Dyos, e'pon lq'eju' t-xnaq'tzb'en tk'etz, xikyek'u'n tja Dyos te. 2Atzunte Jesus xitma'n kye: —¿Ma in kka'yine' tkyaqil ja'lu? Axxi'x kxe'l nma'n kyeye' qa aju' ja lu majx kb'el xitj, ex lay kyejten jun ab'j nk'u'n tib'aj juntl. Tkyaqilx majx kb'el xitj, chi Jesus kye. 3Xi'tzun Jesus kyuk'i'lju' t-xnaq'tzb'en twi' witz Olib'o tb'i. Tetzunj kjapun kub' qe Jesus, ex e'pon lq'eju' t-xnaq'tzb'en tk'etz tu'n txi' kqani'n te tu'nju' o'qekxtaqkye ate': —Qajb'ile' tu'n ttzaj tma'na qeye' jtoj tzul tkyaqil ja'lu. ¿Titi'ju' techlal tzul ch'inxtltoq tula exqa ch'inxtltoq tjapun b'aj ju' mankb'il q'ij? chechij te Jesus. 4Atzunte Jesus xittzaq'we'n kye: —B'a'nqexe', kxq'uqim kyib'e' tu'ntzun lalun che kub' sb'une' kyu'n xjal. 5Qu'n che b'ju'l xjal nim ex k'okyel kyq'o'n kyib' se'n ayine' ex kma': Ayinwe' Krist, ex ajtzun kyul nim xjal che kb'el ksb'u'n. 6Kyb'iye' tqanil q'oj nqaku' ex najchaq; ajtzun kb'inteye' lalun che jaw sak'puje', qu'n tkyaqil ilti'j tu'n tb'aj ikju', extzun na'mxtoq tu'n tulte' mankb'il q'ij. 7Qu'n kq'ojilju' jun nimaqtnam ti'j juntl nimaqtnam, ex kq'ojil jun tnam ti'j juntl tnam; tzul we'yaj, tx'u'j yab'il ex kyejnajnab' toj chukchaq najb'il. 8Aye'tzun tnejel k'ixk'oju' lu tzul kyi'j xjal twitz tx'otx'. 9Oktzun che kxe'l q'o'ntze' toj kq'ob' xjal tu'n kb'aj k'ixb'sa'ne'; ex che kb'el b'yo'ne' kyu'n, ex majx che elel ik'une' kyu'n kkyaqil xjal twitz tx'otx' naqx tu'n npaje'. 10Tojtzunju' tq'ijlalil aju', nim xjal kjel ttzaqpi'n tokslab'l, ex k'elel kyik'u'n kyib' junjun tuk'i'l juntl, ex aye'xju' kyuk'i'l che okyel miltz'uj kyi'j. 11Ex nimqe' xjal che b'ju'l k'okyel kyq'o'n kyib' te t-sanjelal Dyos, che okyeltentzuntz sb'ulkye xjal. 12Tu'ntzunju' il ma'toq kub'chmet, nimju' xjal lay kk'u'jla'tl kyib'. 13Atzunju' xjal qama tzik'x tkyaqilju' lu tu'n, exqa wa'lxi'x toj tokslab'l atzunte kkletelju'. 14Extzunju' tpakb'al b'a'n ti'ju' tkawb'il Dyos kxe'l pakb'a'n toj tkyaqil twitz tx'otx', tu'ntzun telkynik' kkyaqilju' nimaqtnam ti'j, tzmaxi'tzunj ajtjapun tzultzun mankb'il q'ijtzu'. 15Qu'mtzun, naqa sok kka'yine' jun tilb'ilal ik'b'a'jilxi'x toj tja Dyos, aj kyejtma'n Danyel t-sanjelal Dyos ti'j. Alkyetzunte majaw ẍch'inte lu tz'elx tnik' ti'j, 16aye'tzu'n ate' toj Juda, kukxi' oq kyoj k'ul, 17ex alkyeju' xjal tokx twi' ja, mixti' tu'n tku'tz nel jun ti'xti'; 18exqa ati jun xjal toj kojb'il, lalun tz'anjtzti'j iq'ilte t-xb'alun, wix txi' oq. 19¡Tojtzun tq'ijlalil lu, qab'anx kwitzju' qya ch'onwi'qe' exqe'ju' qya tzma nche ch'u'n kyal! 20Qu'mtzun kqaninxe' te Dyos tu'n lalun che'x oqe' toj jb'alil ex toju' q'ij sab'l, naqa xponju' tq'ijlalil lu; 21Qu'n tzul jun yajb'il te nim k'ixk'oj kyi'ju' xjal b'ajx tzaja tb'entlen twitz tx'otx' ex lay tzaj yajxi'tl. 22Naqwit min kub'ttaqk'u'n Dyos tq'ijlalil lu, mix-a'lox jun jaku' klet; oktzun kb'el ttaqk'u'n Dyos tq'ijlalil lu tu'nju' tk'u'jlalil kyi'ju' sk'o'nqe'tl. 23Qatzun ati jun matma kyeye': Kka'yinxpe'ye', luju' Krist ati tzalu, mujqa luju' Krist ati chixi', lalun txi' kyoksla'ne'. 24Qu'n che b'ju'l txqan xjal k'okyel kyq'o'n kyib' te Krist ex te t-sanjelal Dyos; ex kb'incha'ju' txqan techlal ex b'a'nq'ob'aj tu'ntzun kkub' ksb'u'nju' txqan xjal, expe' aye'x junju' sk'o'nqe'tl tu'n Dyos che b'elkysb'u'n. 25Loq'tzun matxi' b'ajx nma'n tkyaqil ja'lu kyeye', tu'ntzun b'i'ntl kyu'ne' ajtjapunju' tq'ijlalil. 26Qu'mtzun qama tzaj q'ma'n kyeye' kjalu: Luju' Krist ati toj chq'ajlaj qa chi, lalun che'xe' ka'yilte, mujqa matzaj q'ma'n kyeye' kjalu: Kka'yintzpeye' luju' Krist ati toj tja Dyos, qa chi, lalun txi' kyoksla'ne' kyol. 27Qu'n aju' tulelju' Tk'wal ichan ikju' se'n jun xlolo'kya'j njatz k'anti tzmax tjawetzq'ij ex npon qoptz'aj tzmax telex q'ij. 28Qu'n ja tu'me'l taju' t-xmilal kyimni, atzuntzu' nche chmeta' k'utz. Chi Jesus b'aj tma'n kyeju' t-xnaq'tzb'en, chi Jesus. 29Tb'ajlenxi'tzunju' yajb'il toju' tq'ijlalil tzul, kb'el qloljixju' q'ij, lay k'entlju' xjaw, che b'ju'l tz'aqju' che'w twitz kya'j ex majx che jawil yukchiju' ati kyipumal twitz kya'j. 30Atzuntzu' kq'ancha'lixa' techlal twitz kya'j qa xi'toq ttzaju' Tk'wal ichan toj kya'j, ex kkyaqil kyoju' tnam te tkyaqil twitz tx'otx' che oq'el tu'n kxob'el, ex kxe'l kka'yinju' Tk'wal ichan ajttzaj toj muj toj kya'j tuk'i'l nim tipumal ex tuk'i'l tqoptz'ajil. 31Ex ate tzul chq'onkyeju' anjl q'ajsalteju' chun kuwx'ix, tu'ntzun ktzaj kb'u'yinju' xjal sk'o'nqe'tl toj tjawetzq'ij, ex tkub'ix q'ij, toj tb'a'nq'ob' kya'j ex toj tnayajkya'j, toj tkyaqil twitz tx'otx' che tzajela' kb'u'yi'n. 32Kyiq'imil jun techale' tiju' tqan lob'j iw: Qa a'la'ju tq'ob', exqa matxitoq che tzaj puqliju' t-xaq, atzuntzu' nela' knik'e' qa tzulju' jb'alil. 33Ikxtzunju' naqa sok kka'yinjuye' xnmaye' kyeye', tz'elx knik'e' ti'j qa nqaku' ta'ju' tq'ijlalil tu'n tulju' Tk'wal ichan. 34Axxi'x kxe'l nma'n kyeye' qa tkyaqil ja'lu kb'ajel na'mxpetoq kkyimju' xjal toju' tq'ijlalil ja'lo. 35Aju' kya'j exju' tx'otx' che b'ajel, atzunwe' nyol milo b'ajel ex ilti'j kjapumel. 36Atzunju' q'ij exju' kmuj tu'n wul jumajtle', mix-a'loxte b'ilte, expe' mixti' b'i'n kyu'nju' anjl ate' toj kya'j, ex ikxwe' min b'i'n we'wu'n. Naq o'kxju' Dyos Manb'aj b'ilte. 37Aju' tq'ijlalil ajwule', ik kb'ajelju' se'nju' b'aj toj tq'ijlalil Noe. 38Qu'n toj tq'ijlalil tej na'mxtoq ttzaju' ninq'eqjab', aye'ju' xjal naqxtoq nche wan, nche k'wan ex intoq che mje, kukxtoq nkb'incha'nju' tzmaxi'j tokx Noe toj ark. 39Ex mixti'xtoq knab'en tej ttzaju' ninq'eqjab' ex majx eb'ajx iqi'n tu'nju' tnimal a'. Ikxtzun kb'ajelju' ajtulju' Tk'wal ichan, mix-a'loxte b'ilte, noqx minab'en atitl. 40Tojtzunju' kmuj lu, kxol kab'e' xjal ate' toj kojb'il naq jun kxe'l q'i'n atzun juntl kjelten. 41Ex kxol kab'e' qya nche chen junx, kxe'l q'i'n jun atzun juntel kjelten. 42Qu'mtzun che xq'uqine', qu'n minti' b'i'n kyu'ne' jtoj tzulju' Taye. 43Ex kb'intzju'ye' yol lu, noqwit b'i'n tu'nju' tajaw ja jni or tzulju' eleq' elq'al, jaku' kub'ten xq'uqilteju' tja ex lay taj tu'n tokxju' eleq' elq'al toj tja. 44Qu'mtzun, ikxkye' che xq'uqine' qu'n minti' b'i'n kyu'ne' alkye kmuj chin ule', naqx minab'en ajwule'. Chi Jesus b'aj tma'n. 45¿Alkyeju' majen njapun taq'un ex b'a'n tz'aq'unan, aj nkyej q'o'n tu'nju' tajaw aq'untl ka'yilteju' toj tja, tu'n txi' tq'o'n kwa ajxi'x tponju' kmuj te wan? 46K'i'wla'nxi'xju' majen nxi' tb'incha'nju' taq'un tkyaqil ex inxi'x naq'unan ajtponju' tajaw aq'untl. 47Axxi'x kxe'l nma'n kyeye' qa aju' tajaw aq'untl kxe'l tq'o'n toklenju' majen lu tu'n txi' tka'yi'n tkyaqilju' ati te exju' toj tja. 48Qatzun myab'a'nju' majen lu, exqa makub' t-xima'n, yajlo tzulte' tajaw aq'untl, qa chij 49exqa matz'okten b'yolkyeju' txqantl majen, exqa naq sokten wal ex k'wal kyuk'i'lju' nche tx'ojti, 50tzultzunju' tajaw aq'untl aku'xi'x q'iju' minti' xima'n tu'n ex aku' kmuju' minti' b'i'n tu'n qa tzulju' tajaw aq'untl 51kb'el tz'e'ysa'n twitzju' majen lu tu'nju' tajaw aq'untl, ex ikx kb'ajelju' ti'j se'nkyeju' xmletz'. Atzuntzu' k'oq'ela' ex majx kjach'ub'tel t-xe twitzte, chi Jesus b'aj tma'n.

will be added

X\