Mateo 22

1Ex aq'wi jumajtl Jesus yolil kye xjal tuk'i'l techlal ex tma: 2Iky tkawb'il Dyos te toj kya'j kse'n jun nimaqkawil tb'incha jun ninwan tej tmjeju' tk'wal. 3Eb'ajx tchq'o'nju' tmajen q'ol txokb'il kyeju' ttxokin, aye'tzunju' ttxokin mixjun e'pon toju' mjeb'le'n. 4Exi' tchq'o'n jumajtlu' tmajen txkolkyeju' ttxokin ex xitma'n kye: Kmanxe' kye xjal txko'nqe'tl tu'n kyten toju' mjeb'le'n qa matxi' b'entju' wab'j. Qu'n mache kub' nb'yo'ne' nwakyixe' ex walu'ne' q'u'sqe', ex lu matxi' b'ajb'ent tkyaqil; kuktzaje' toju' ninwan kb'ajel toju' mjeb'le'n, chechiku'ye', chi nimaqkawil kyeju' tmajen. 5Aye'tzunju' xjal txko'nqe' mixti' kyej tu'n ktzaj. Jun kxolju' xjal lu xi' aq'unal toju' ttx'otx', atzun juntl xi' xk'aẍlel, 6aye'tzun junjuntl b'ajkub' ktzyu'nju' tmajen nimaqkawil, eb'aj kwuli'n ex majx e'kub' kb'yo'n. 7Tzajtzun ttx'u'jilju' nimaqkawil tu'n tpaju' lu ex tchaq' kyeju' t-xjal te q'oj tu'n kxi' b'yolkyeju' xjal e'kub' b'yonkyeju' tmajen ex tu'n tkub' kpatunju' ktanam. 8Xitma'ntzuntz kyeju' tmajen: Matxi' b'entte' ninwan te mjeb'le'n, ex aye'ju' xjal ẍe'x txket, myab'a'n qe'. 9Qu'mtzun kukyxi'ye' kyoj xky'ichb'e, che kytxkontze' kykyaqilju' xjal mache okyal kyu'ne' toju' ninwan, chij. 10Exi'tzunju' majen kyoj xk'ichb'e ex e'tzaj kb'u'yinju' xjal kkyaqil, b'a'nqe' ex myab'a'n qe'; ex majx noju' ja kyu'nju' xjal lu ja okaju' mjeb'le'n. 11Tetzunj tokxju' nimaqkawil ka'yilkyeju' ttxokin, xitka'yin jun xjal mixtoqti' tokju' t-xb'alun tex mjeb'le'n. 12Xi'tzun tma'n te: Amiw, ¿Se'n taq'wi soktza tzalu, extzun minti' tokju' t-xb'aluna tex mjeb'le'n? chij. Atzunju' xjal mixti' xittzaq'we'n te. 13Xi'tzun tma'n nimaqkawil kyeju' intoq che sipan wab'j ti'j mes: Kk'lonkuye' tqan ex tq'ob' ex kxomixe' toj qlolj twi' pe'n, jata'ju' oq'e'n ex jach'ub'te'n t-xe witzteyj, chij. 14Qu'n txqanju' xjal txko'nqe', ex naq jte' nche' jaw sk'o'n kyxol, chi Jesus b'aj tma'n kye. 15Tb'ajlenxi'tzun ja'lu, eb'aj yolin parisey kyxolilex se'n tu'me'l tu'n tkub'a' tz'aq Jesus kyu'n tojun til, naqx tu'n tyol ajt-xitma'n kye. 16Exi'tzun kychq'o'n kyxnaq'tzb'en kyuk'i'lju' t-xjal Erodes qanilte te Jesus kjalu: —Xnaq'tzal, b'i'n qe'qu'n qa axju' ntma'na ex ntq'o'na xnaq'tzb'il se'n tu'me'l tu'n qb'et twitz Qman Dyos, ex min nxob'a' kywitz xjal, qu'n min nxitb'i'nteya nkyma'n alchaqxkyeku' xjal, chechij. 17Q'mantza qeye', titi' nt-xima'na ti'j ja'lu: ¿Ma b'a'n tu'n t-xiqchjo'ne' chojb'il teju' ninimaqkawil aj Rom, mujqa mya? chechij te Jesus. 18Atzunte Jesus eltnik' qa mya'toq b'a'nju' kxim, xitma'n kye: —Xmletz' xjal, ¿Titiqu'n in kyjyonaye' tu'me'l wi'je' tu'n nkub' tz'aqe' toj il? 19Kyik'intz chaqe' pwaq weye' aju' nxiq'et te chojb'il, chij. Xi'tzun kye'k'u'n jun pwaq te, 20ex xitqani'n Jesus kye: —¿Al qilb'ilal tok twitzju' pwaq lu ex alqb'i tz'ib'a'nk twitz? Chij. 21Aye'tzunkye xikytzaq'we'n te: —Tilb'ilal ninimaqkawil ex tb'i tok ti'j, chechij. Xi'tzun tma'n Jesustz kye: —Qanatzun tilb'ilal ninimqkawil, kyq'onxe' te ninimaqkawil aju' te ninnimaqkawil, ex kyq'onxe' te Dyos aju' te Dyos, chi Jesus kye. 22Tetzunj kyb'inteju' yol lu, majx e'jaw lab'ti; kyejtzun kyq'o'n Jesus axtzu', exi'tzuntz tojun plajtel. 23Tojxtzunju' q'ij lu eponju' sadusey tk'etz Jesus, aye' inkyma'n qa lay che jaw anq'in kyimni, qu'mtzun xikyma'n ja'lu te Jesus: 24Ati jun yol tma Moyses, Xnaq'tzal, qa ati jun xjal makyim extzun mixti' tk'wal xkyej, ati tu'n tkyeju' t-xu'jil teju' titz'in tu'ntzun tul tk'wal tuk'i'l tu'n kyok te tk'walju' qtzan ttzik. 25Atitzun jun b'aj tzalu qxole' jumaj, ate'toq wuq xjal kyitz'in kyib'. Aju' tnejel k'walb'aj mje, ex kyim. Tu'ntzunju' mixti' tk'wal kyej, kyeju' t-xu'jil teju' titz'in. 26Ex ikx b'aj tiju' tkab' k'wa'lb'aj, ex ikxju' toxi'n, ex ikx b'aj kyi'j kwuqil, eb'aj kyim. 27kyb'ajlenxi'tzun kyim kykyaqil, ikx kyimju' qya. 28Qatzun ikju', qa che jawil anq'intlju' kyimni, ¿Alkyetzun jun kxolju' wuq ichan k'okyel te tchmilju' qya, qu'n mjena' kyuk'i'l kkyaqil? chechij te Jesus. 29Atzunte Jesus xittzaq'we'n kye ex tma: —¡Matxi' che kub' tzpete', tu'n tpaju' minti' nkaneju' tu'jil tyol Dyos toj knab'le' ex minti' nelkynik'e' tiju' tipumal Dyos! 30Qu'n ate' toj tq'ijlalil ajkyjaw anq'intlju' kyimni, mlay che mjetlkye' xjal, qu'n che okyel kse'nqe' anjl tqe' toj kya'j. 31Atzun ti'ju' tu'n kjaw anq'in kyimni, ¿Ma b'ajxtzun jawa' kẍch'i'ne' aju' tma Dyos kyeye': 32Ayinwe' Kydyos Ab'raam, Isaak ex Jakob'? ¡Ex mya' jun Dyos kye kyimni, qu'n ate Dyos kyeju' itz'qe'! chi Jesus. 33Tetzunj kyb'inte xjal b'aj tma'n Jesus, ojexi'x che lab'ti ti'ju' xnaq'tzb'il tu'n. 34Aye'tzunju' parisey tej kb'inte qa majx kyej jpet ktziju' sadusey tu'n Jesus, b'aj kb'u'yi'n kyib', 35Atzun jun kxol xnaq'tzal ti'j kawb'il, oktq'o'n Jesus toj joyb'ilti'j, ex xitqani'n te: 36— Xnaq'tzal, ¿Alkyeju' chaq'b'il nimxi'x toklen toju' kawb'il? chij. 37Atzunte Jesus xittzaq'we'n te: —K'u'jlama Qman Dyos tu'n tkyaqil tanmiya, tu'n tkyaqil tk'u'ja ex tu'n tkyaqil tnab'la. 38Atzun chaq'b'ilju' lu nimxi'x toklen ex a tnejel chaq'b'ilju'. 39Ex ati jun tkab' chaq'b'il, ax tnab'lju' se'nju' tnejel; aj ntma'n kjalu: K'u'jlama alkyexku' xjal se'nxju' aya ntk'u'jla'n tib'a. 40Kyojtzu'n kab'e' chaq'b'il lu, ta'ya' ttxu kawb'il ex ttxu xnaq'tzb'il kyu'n t-sanjelal Dyos, chi Jesus. 41B'u'yinxtoq kyib'ju' parisey, 42xitqani'n Jesus kye: —¿Titi'kye' nkma'n ti'ju' Krist? ¿Al qk'waltzulo? chi Jesus kye. Aye'tzunkye xikytzaq'we'n te: —Tk'wal Dab'ite' Krist, chechij. 43Atzunte Jesus xitma'n kye: —¿Se'n taq'witzun tma Dab'i ti'j toj Xewb'aj Xjan qa aju' Krist Tajaw? Qu'n chi Dab'i kjalu: 44Xitma'n Qman Dyos teju' Wajawe' kjalu: Qekuya toj nb'a'nq'ob'e', tzmaxi'j ajkykub' nq'o'ne' tajq'oja tjaq' tqana, chij. 45¿Se'n taq'witzun nkyma'ne' qa tk'wal Dab'iju' Krist, extzun axju' Dab'i nok q'onte te Tajaw? chi Jesus. 46Mixtzun a'lo'x jun b'ent ttzaq'wente jun yol te Jesus, ex atxixtzunj mix-a'lox juntl okten b'inchal txqantl xjel te Jesus.

will be added

X\