Mateo 20

1Ikyte tkawb'il Dyos toj kya'j kse'n jun tajaw awal ub'a, ex jyol tmajen te prim, tu'n kyxilun twitz ub'a. 2Yolin kyuk'i'lju' tmajen tu'n t-xitchjo'n te jun kyq'ij, ex exi' tchq'o'ntzuntz aq'unal toju' tqan t-ub'a. 3Tetzunj ttzaj b'eljoj te prim ex jumajtlu' tajaw aq'untl jyol tmajen, ex e'okyal jte'tl xjal tu'n kyxolju' xjal naq teqe' mixti'toq nche' aq'unan. 4Ex xitma'n kye: Ex ikxkye' kukyxi'ye' aq'unal toj waq'une', atzun nchjonxe' twi' kyk'u'je', chij. Aye'tzunju' xjal ku chechij, exi' aq'unal toj taq'un. 5Etztzun jumajtlu' tajaw aq'untl jyol tmajen tej ttzaj wanq'ij, ex tej ttzaj oxe' te qale, ex ikx tb'inchaju' se'nxju' nejtl. 6Xi' jumajtl ja teqe' xjal minti' nche' aq'unan tej ttzaj jwe' te qale, ex eb'jo'k yal junjuntl tu'n mixtoqti' nche' aq'unan. Ex xitqani'n kye: ¿Titiqu'n naq nex kyq'ije' tzalu ex minti' nche aq'unane'? chij. 7Aye'tzunkye' xjal xikytzaq'we'n te kjalu: Mix-a'loxna' jun ntzaj q'mante qaq'une', chechij. Xi'tzun tma'nju' tajaw aq'untl kye: Kuxna' kyxi'ye' aq'unal toj waq'une' ex kxe'l nchjo'nwe' twi' kyk'u'je', chij. 8Tetzunj qok yupj, xitma'nju' tajaw aq'untl teju' nejenel ti'j aq'untl kjalu: Txkonqetza majen ex chjonxa twi' kyk'u'j, nejxi'x chjonxa twi' kyk'u'ju' ẍe' ul mankb'il, atzun mankb'ilxi' q'onxa twi' kyk'u'ju' ẍe' ul nejtl, chij. 9Aye'tzunju' xjal tzyet kyaq'unan tej ttzaj jwe' te qale, e'pon ex xichjo'n twi' kyk'u'j te jun q'ij. 10Tetzunj tpon kanun tu'n kyponju' xjal aye'ju' tzyet kyaq'unan nejtl, kub' kyxima'n qa nimkye twi' kyk'u'j kxe'l q'o'n; kuchaqa axte' twi' kyk'u'ju' xichjo'n kse'nkye' e'pon aq'unal yajxi'tl. 11Tetzunj kyk'monte twi' kyk'u'j, e'aq'witzuntz wulil ti'ju' tajaw aq'untl, 12ex xikyma'n te: Aye'ju' ẍe' b'ju'l yajxi'tl naq jun kmuj ẍe' aq'unan, extzun kyinx twi' kyk'u'ju' xxitq'o'na se'nqe', extzun mab'ajqe' q'ij qu'n ex matzik'x tq'ob' q'ij kuwxi'x qu'ne', chechij. 13Atzunte' tajaw aq'untl xittzaq'we'n te jun majen: Aya wamiw, mixti'we' myab'a'n nb'incha'n teya. ¿Ma mitzunjunti' xb'ent ti'j qu'n tu'n tchjetju' twi' tk'u'ja te jun q'ij? 14K'monxju'ya twi' tk'u'ja ex kutxi'ya. Wajb'ilwe' tu'n txi' nq'o'n kyinxju' se'n twi' tk'u'ja teju' sul mankb'il, 15qu'n ayinwe' chin q'malte titi' knb'incha'ye' tiju' npwaqe'. ¿Mujqa ntx'a'lti'j tk'u'ja wi'je' tu'n b'a'n xjal qine'? chij. 16Qu'mtzun aye'ju' ate' mankb'il ja'lo che okyel nejtl; aye'tzunju' ate' te tnejel ja'lo che okyel mankb'il, chi Jesus. 17Tetzunj xi'toq tjax Jesus tu'n tjapun toju' tnam Jerusalen, eltpa'n tib' kyuk'ilju' kab'lajoj t-xnaq'tzb'en ex xitma'n kye: 18— Kyb'intzpe'ye', maqo'x Jerusalen, ja kxe'la' q'o'n Tk'wal ichan toj kyq'ob'ju' kynejel pale exqe' xnaq'tzal ti'j kawb'il tu'n tkub' kyb'yo'n 19kxe'l kyq'o'n toj kyq'ob'ju' xjal te junxi'tl tnam tu'n tb'aj kxmayi'n, tu'n tb'aj kk'ixb'sa'n ex kjawil kq'o'n twitz krus; tb'ajlenxi'tzun oxe' q'ij tku'xlen mqu'n kjawil anq'in jumajtl kxol kyimni, chi Jesus. 20Pontzun lq'e t-xu'jil Seb'edey, kyuk'i'lju' tal aye' Santyay ex Xwan tk'etz Jesus ex e'kub' meje twitz tu'n t-xi' kyqani'n jun xtalb'il te. 21Xi'tzun tqani'n Jesus te: —¿Titi' tajb'ila? chij Atzunte qya xitma'n te: —Q'ontza kyoklenju' kab'e' wale' lu tu'n kykub' qe tk'etza toju' tkawb'ila, jun toj tb'a'nq'ob'a atzun juntl toj tnayaja, chij. 22Atzunte' Jesus xittzaq'we'n te: —Mixti' nkanekye' toj knab'l aju' ntzaj kqani'ne' weye'. ¿Ma jakutzun txi' kk'wa'ne' jun k'wab'j k'a kxe'l nk'wa'ne'? chij. Aye'tzunkye xikytzaq'we'n: —Jaku' txi' qk'wa'nqe', chechij. 23Xi'tzun ttzaq'we'ntl Jesus kye: —Oklo kxe'l kyk'wa'ne' k'wab'j k'a se'nwe', atzunju' tu'n kykub' qeye' toj nb'a'nq'ob'e' mujqa toj nnayaje' myayinwe' chin q'malte, o'kxte' Nmane' Dyos otzqilte alkye kxe'la' tq'o'nju' oklenj lu, chi Jesus. 24Aye'tzunju' lajojtl t-xnaq'tzb'en tej kb'inteju' lu, tzaj ktx'u'jil kyi'ju' kab'e' kyuk'i'l kyitz'inkyib'. 25E'tzajtzun txko'n tu'n Jesus, ex xitma'n kye: —Ojtzqi'nkye' kyu'n, aye'ju' nche' kawin majx nok kyq'o'n kyib' te tajaw tnam, aye'tzunju' nimaq kyoklen majx nche kub' kyajunju' xjal tu'nju' kykawb'il. 26Atzunkye' kyxol mikxa'te' kb'ajelju'. Ape' kyb'incha'juye', qa ati jun tajb'il tu'n tok te nimaq toklen, ati tu'n tajb'en kyeju' txqantl; 27atzunju' tajb'il tu'n tok te nejenel kyxole', atzunte k'okyelju' te kymajene'. 28Kse'nwe' ayine' Tk'wal wnaq min ẍin ule' tu'n kyajb'en xjal weye', ayin pe'we' ẍin nul ajb'el kye xjal ex tu'n nq'onte nchwinqlale' te kolb'il kye txqan xjal, chi Jesus kye. 29Txqan xjal eb'jo'k lpe ti'j Jesus tej tetz toj Jeriko kyuk'i'lju' t-xnaq'tzb'en. 30Ate'toq kab'e' xjal moẍ q'uqlqe'toq ttzi b'e, tetzunj kb'inte qa xi'toq tik' Jesus atzu', e'jaw ẍch'in ex kyma: —¡Taye, aya Tk'wal Dab'i, q'aq'antz tk'u'ja qi'je', chechij! 31Aye'tzunju' xjal eb'jo'kten myolkye ex xikyma'n kye tu'n lalun che ẍch'in, aye'tzunkye' moẍ e'jaw ẍch'inxi'xtl kuw kjalu: —¡Taye, aya tk'wal Dab'i, q'aq'antz tk'u'ja qi'je', chechij! 32Atzunte Jesus kub' we', e'tzaj ttxko'nju' moẍ ex xitqani'n kye: —¿Titi' kyajb'ile' tu'n nb'inchateye' kyeye'? chij. 33Aye'tzunju' moẍ xikytzaq'we'n te: —Taye, qajb'ile' tu'n tjqetju' qwitze' ex tu'n qka'yine', chechij. 34Tzajtzun q'aq'antk'u'j Jesus kyi'j, ok tmko'n kywitz. Textzu'n kmuj tok mko'n kywitz, b'aj jqet kywitz ex e'ka'yin, ex majx exi'lpe ti'j Jesus.

will be added

X\