Mateo 18

1Textzunju' kmuj lu e'pon lq'eju' t-xnaq'tzb'en Jesus tk'etz ex xikyqani'n te: —¿Alkyeju' nimxi'x toklen toju' kawb'il te toj kya'j? chechij. 2Atzunte Jesus tzaj ttxko'n jun k'wal, kub' twab'a'n kyxol 3xitma'ntzuntz kye: —Axxi'x kxe'l nma'n kyeye' qa min xkytx'exb'e kyib'e' exqa min ẍe'okye' se'n jun k'wal, layx b'ent kyokxe' toju' kawb'il te toj kya'j. 4Ate' nimxi'x toklenju' toju' kawb'il te toj kya'j aju' nkub' tme'ssa'n tib' ex in ok se'n jun k'wal. 5Ex alkyete matk'am jun k'wal ikse'n ja'lu toj nb'iye', ayine' nchin tk'am, chi Jesus. 6Qa ati jun xjal makub' tz'aq jun b'o's okslal wi'je' tu'n toj il, b'a'n tu'n tok k'let jun ab'j nimin cheb'l triy ti'j tqul ex tu'n tku'x mulq'et tzmax t-xexi' ninnjab'. 7¡Taq'wixi'xte' twitz tx'otx' tu'nju' txqan trakpuje'n toj, ex atzu' nche kub'a' tz'aqju' xjal tu'n tpaj! ilti'j tu'n ttenju' trakpuje'n twitz tx'otx', extzun ¡qab'anx twitzju' xjal nb'inchante tu'n kkub' tz'aqju' txqantl toj il! 8Qu'mtzun, qa tu'nju' tq'ob'a mujqa tqana nb'inchana' ila, tx'emumila ex xonxa najchaq tk'etza; b'a'nxi'xpe' teya tu'n tokxa tuk'i'l jun tq'ob'a mujqa jun tqana toju' chwinqlal tejumajx, kyetwitzju' tuk'i'l kab'e' tq'ob'a ex kab'e' tqana ajt-xi' xona toj q'aq' milo kyupjila'. 9Ex qa tu'nju' tb'aq' twitza nb'inchana' ila, q'imetza ex xonxa najchaq tk'etza; b'a'nxi'xpe' teya tu'n tokxa tuk'i'l naq jun tb'aq' twitza toju' chwinqlal tejumajx, kyetwitzju' tuk'i'l kab'e' tb'aq' twitza tu'n txi' xona toj q'aq', chi Jesus. 10Lalun che elkyik'o'ne' tal b'o's okslal lu. Qu'n kxe'l nma'n kyeye' qa aye'ju' kyanjl ate' toj kya'j nche' ka'yink ti'ju' twitz Qman Dyos tkyaqil q'ij. 11Qu'n aju' Tk'wal ichan matzul klolkyeju' tzpetnqe'. 12¿Se'nkye' toj kwitz? qa ati jun xjal ati jo'naq trit extzun matxi' tz'aq jun tu'n, ¿Ma laytzun che kyej ttzaqpi'nju' oxjnaq b'eljlajoj toj k'ul, tu'n txi' jyolteju' rit xkyej tz'aq? 13Extzun qama tz'el yal tu'n, axxi'x ktzalajelxi'x ti'j kyetwitz kyi'ju' txqantl minti' ẍe'x tz'aq. 14Ikxtzunte Qman Dyosju' ati toj kya'j minti' tajb'il tu'n tkyej tzpet junkye' maskye tal b'o'sqeye', chi Jesus. 15Qama tz'ok b'incha'n jun taq'wix teya tu'n jun titz'ina mo ttzika, yolina tuk'i'l ex q'manxa te aju' myab'a'n xtb'incha teya. Qama kub' b'i'na tu'n matxitzun kanb'antza. 16Qatzun minti' sel b'a'n tyola toj twitz, iq'inx juntl mo kab'e' tuk'i'la, tu'ntzun tel chik'exi'xu' tkyaqilju' yol kyu'n kab'e' mujqa oxe' tziyalte. 17Ex qa minti' ẍekub' tb'i'nju' che pomil tuk'i'la, q'maxtzuntziya kyeju' kkyaqil okslal; exqa minti' sel b'a'nju' kyol toj twitz, xtenku'tzunj ex kq'onkye' nakuj jun xjal min nokslan te Dyos mujqa jun peyul chojb'il pwaq te Rom. 18Axxi'x kxe'l nma'n kyeye' qa tkyaqilju' ti'xti' makub' kk'lo'ne' twitz tx'otx', ex ikx kb'el k'lo'n toj kya'j, ex tkyaqilju' matz'el ktzaqpine' twitz tx'otx', ex majx k'elel tzaqpi'n toj kya'j. 19Ex okxe'l nma'ne' kyeye': qa ati kab'ekye' tzalu twitz tx'otx' exqa mamuje kyole' tu'n txi' kqani'n jun ti'xti'ye' toj kna'j Dyose', ktzajel q'onte' kyeye' tu'n Qman Dyos ati toj kya'j. 20Qu'n jama kyb'uyi'ya' kyib' kab'e' mujqa oxe' toj nb'iye', chin tenb'ilwe' kxol, chi Jesus. 21Atzunte Luch xi' lq'e tk'etz Jesus ex xitqani'n te: —Taye, ¿Jte'tzunlo maj kb'el nnajsa'ne' tilju' witz'ine' mujqa ntzike', qama tb'incha taq'wix weye'? ¿Naq wuq maj? chij. 22Atzunte Jesus xittzaq'we'n te: —Minti' nxi' nma'nwe' teya qa o'kxu' wuq maj, ati tu'n tkub' tnajsa'na wuq maj oxnaq lajoj, chi Jesus. 23Ikx nb'aju' ti'ju' kawb'il te toj kya'j se'n jun nimaqkawil kub' t-xima'n tu'n tjaw ti'n tajlalju' kk'asju' tmajen te. 24Tetzunj tjawtiq'i'n tajlalju' k'as pon q'inju' jun majen tk'etz atitoq txqan tk'as te. 25Mixtoqtzunti'x tu'me'l tu'nju' tmajen tu'n tchjonteju' tk'as te, tchaq'ju' nimaqkawil tu'n txi' ka'yi'n tuk'i'lju' t-xu'jil, kyuk'i'lju' tk'wal ex tkyaqilju' ati te, tu'ntzun tchjetju' tk'as. 26Atzunju' tmajen kub' meje twitzj ex xitma'n te: Tenku' tpasensiya wi'je' ex ok kxe'l nchjo'nwe' nk'as teya tkyaqil, chij. 27Tzajtzun laqj tk'u'ju' nimaqkawil ti'ju' tmajen; kub' tnajsa'nju' tk'as ex xittzaqpi'n. 28Tetzunj tetz tjaju' nimaqkawil kub'najsante tk'as, elyal jun tuk'i'l twitz atitoq jte' tk'as te. Xi'tzun ojqelan jtz'olte tqulju' xjal lu ex xitma'n te: ¡Chjontza tk'asa weye'! chij. 29Atzunju' tuk'i'l kub' meje twitz ex xitma'n te: Tenku' tpasensa wi'je' ex kxe'l nchjonwe' tkyaqil teya, chij. 30Atzunte mixti'x taj, ape' tb'inchaju', xitiq'i'n ex okx tjpu'n tzmax aj tchjonteju' tk'as. 31Aye'tzunju' txqantl majen eka'yinte, majx exch'yon toj kyanmi, ex exi' q'malte teju' nimaqkawil tkyaqilu' tb'inchaju' xjal ti'ju' tuk'i'l. 32Tetzunj tb'inte nimaqkawilju' tb'incha, tchaq' tu'n txi' txkob'aj, tetzun tponju' xjal lu xitma'ntzuntz te: ¡Taq'wix majen! Makub' nnajsa'ne' txqan tk'asa naqx tu'nju' makub'sana nwitze'. 33Ikxwittzulota xtb'incha, ma'wtlo tzaj laqj tk'u'ja ti'ju' tuk'i'la, ik se'nwe' matzaj laqj nk'u'je' ti'ja, chij. 34Tzajtzun ttx'u'jilju' nimaqkawil ti'j, ex tchaq' tu'n tkub' tz'e'ysa'n twitz tzmaxi'j aj tchjonte tkyaqilju' tk'as, chi Jesus. 35Tetzunj tb'aj tma'n Jesus ja'lu, xitma'ntzuntz kye: —Iktzun ktb'incha' Dyos ati toj kya'j kyi'je' qa min xkub' kynajsa'ne' kyilju' kyitz'ine' mujqa ktzikye' tu'n tkyaqil kyanmiye', chi Jesus.

will be added

X\