Mateo 17

1Tb'ajlenxi'tzun waqaq q'ij tej tmante Jesusju' lu, exi' tiq'i'n Luch, Santyay ex Xwan axju' titz'in Santyay twi' jun witz nimin twe'. 2Twi'tzunju' witz tch'exb'eya' tib'ju' tilb'ilal Jesus kywitz. Aju' twitz intoq qoptz'aj se'nju' q'ij, atzunju' t-xb'alun majxkub' saqax nakuj t-spik'umal q'ij. 3Textzu'n kmoj lu xikyka'yi'n intoq che yolin Moyses ex Eliy tuk'i'l Jesus. 4Atzunte Luch xitma'n te Jesus: —Taye, ¡b'a'nxpetzulo ato'qo' tzalu! Qa tajb'ila b'a'n tu'n tjaw qb'incha'ne' oxe' pach kyeye': jun tu'n tajb'en teya, jun te Moyses ex jun te Eliy, chi Luch. 5Tetzunj inxtoq yolin Luch, ku'tzju' nakuj muj kyib'aj inxi'x qoptz'aj, ex tojtzunju' muj xikyb'i'n jun tzaj yolin, intoq tma'n: Ate nk'walju'ye' lu k'u'jla'nxi'x wu'ne', aj xjaw nsk'o'ne': kb'inxju'ye' tyol, chij. 6Tetzun kyb'inte t-xnaq'tzb'en Jesusju' yol lu, tzaj xob'el kyi'j ex majx e'kub' joqe twitz tx'otx'. 7Pontzun lq'e Jesus kk'etz e'oktmko'n ex xitma'n kye: —Che' we'ktze'; ex lalun che xob'e', chij. 8Tetzunj kjaw ka'yin, mixti'tl jun xjal kyil o'kxte' Jesus atitoq. 9Tetzunj kku'tz twi'ju' witz, xitma'n Jesus kye kjalu: —Lalun txi' kma'ne' te jun xjal aju' xkyile', tzmaxi'j ajtjaw anq'intlju' Tk'wal ichan, chij. 10Xi'tzun kqani'n t-xnaq'tzb'en Jesus te: —¿Tiqu'ntzun nkyma'na' xnaq'tzal kawb'il qa a Eliy ati tu'n tul nejtl? chechij. 11Xi'tzun ttzaq'we'n Jesus kye: —Axte' ate Eliy tzulnej, ex ate kb'inchalte tten tkyaqil. 12Atzunwe' kxe'l nma'ne' kyeye', oje tzulte Eliy, aye'tzun xjal min sel kynik' te, mape' kyb'incha tkyaqilju' ti'xti' myab'a'n te. Ikxtzun kb'ajelju' ti'ju' Tk'wal ichan qu'n okxi'x kyajtel toj kyq'ob', chij kye. 13Kanetzun toj kywitzu' t-xnaq'tzb'en qa atzu' nyolina' Jesus ti'ju' Xwan Jawsal a' tej tb'aj tma'nju' yol lu. 14Tetzunj kypon ja ta'qe' txqan xjal, pon lq'eju' jun ichan tk'etz Jesus, kub' meje twitz ex xitma'n te: 15— Taye, q'aq'antz tk'u'ja tiju' nk'wale', qu'n intzaj tak ti'j ex inxi'x yajt b'a'nxi'x; b'a'npun maj nxi' tz'aq toj q'aq' ex ati maj toj a'. 16Ma'tzun tzaj wi'ne' kwitzju' t-xnaq'tzb'ena, ex minti' nq'anit kyu'n, chij te Jesus. 17Xi'tzun tma'n Jesus kye: —¡Aye'ye' xjal mixti' kyokslab'le' ex b'inchal myab'a'n qe'ye'! ¿Jte'tzun q'ij tu'n ntene' kyuk'i'le'? ¿Jte'tzun q'ij ati tu'n kyik'xe' wu'ne'? Kyiq'intzjuye' yab' tzalu, chi Jesus. 18Xi'tzun ttzak'u'n Jesusju' tajaw il ex tb'incha tu'n tetz toj tanmiju' q'a, ex texju' kmuj majx q'anitju' q'a. 19Yajxitzuntel tej ate'toq Jesus o'qekxkye kyuk'ilju' t-xnaq'tzb'en, xikyqani'n te Jesus: —¿Titiquntzun minti' xb'ent tetzju' tajaw il toj tanmiju' q'a qu'ne'? chechij. 20Atzunte Jesus xitma'n kye: —Minti' xb'ent kyu'ne' qu'n mixti' kyokslab'le'. Axxi'x kxe'l nma'n kyeye' naqwit ati kyokslab'le', k'ixpe'wt kyinju' se'n twitz ẍmostas, jaku' b'ent kyu'ne' tu'n kmanteye' teju' witz lu: Kutik'a tzalu ex tenkuya tojun plajtel chechiwte', ex jaku' tzik'te' witz tjunalx. Mixti'xte' jun ti'xti' ch'uẍ qa ati kyokslab'le' ti'j Dyos. 21Ate' tyajajil tajaw il lu, tu'n na'j Dyos ex mewayi'n nexa'te', chi Jesus. 22Tetzunj intoq b'et Jesus kyuk'ilju' t-xnaq'tzb'en toju' tx'otx' Kaliley, xitma'n kye: —Kxe'l q'o'nte' Tk'wal ichan toj kyq'ob'ju' xjal, 23ex kb'el b'yo'n kyu'n, ajtzun tb'aj oxe' q'ij kjawil anq'in, chij. Aye'tzunju' t-xnaq'tzb'en tej kb'inteju' yol lu majx tzaj b'is toj kyanmi tu'n tpaj. 24Tetzunj kpon Jesus kyuk'ilju' t-xnaq'tzb'en toju' tnam Kaparnawum, eponju' peyul pwaq chojb'il toj tja Dyos tk'etzju' Luch, ex xikyqani'n te: —¿Yajtzunju' kxnaq'tzale' ma ntq'o'nju' pwaq chojb'il toj tja Dyos? chechij. 25— Ikna'tzu'n, in tchjo'nte', chiju' Luch xittzaq'we'n. Atzunj tokx Luch tuja tk'etz Jesus, nej xi' yolin Jesus te ex tma kjalu: —¿Yajtzunta Simon, titi' nt-xima'na ti'j? ¿Ja nela' kyqanina' nimaqkawilju' chojb'il te tnam ex unb'ab'l: ma kyeju' kwitze'l mujqa kyeju' najchaq xjal? chi Jesus. 26Atzunte Luch xittzaq'we'n kjalu: —Aye'kye' tu'n kychjonte chojb'il te tnam ex unb'ab'l aye' najchaq xjal, chij. Xi'tzun tma'ntl Jesus te Luch: —Qu'mtzun aye'ju' twitze'l nimaqkawil mixti' tu'n kychjonte. 27Tu'ntzun lalun qo' ok te trakpuje'n, kuxtxi'ya ttziju' njab', q'onku'xa tzyub'l kyiẍ ex q'inktza tnejel kyiẍ matz'elyal tu'na, jqonxa ttzi ex kjawitz yalju' jun pwaq k'ajb'el te chojb'il te tnam, weye' ex teya; q'inxtzuna ex chja'ka, chi Jesus.

will be added

X\