Mateo 16

1Aye'tzunju' parisey exqe'ju' sadusey e'pon tk'etz Jesus, ex kyqani tu'n tb'inchante Jesus jun b'a'nq'ob'aj ktzajel toj kya'j, tu'ntzun telkynik' ti'j qa a Dyos tzaj chq'onte, kb'inchaju' lu naqxwit tu'n tkub' tz'aq Jesus kyu'n tojun til. 2Atzunte Jesus xittzaq'we'n kye: Aye'kye' ajkyka'yinteye' qa kyeq t-xe kya'j ajtex q'ij inkyma'ne': lay tzaj jb'al najchi'j, chechije'; 3qatzun ati muj exqa kyeq t-xe kya'j ajtjawu'l q'ij, ex inkyma'ne': Tzul jb'al ja'lo chechije'. Qanatzun in kaneju' techlal inxi' kyka'yine' twitz kya'j toj kwitze' ¿Se'n taq'witzun min nkaneju' techlal toju' tq'ijlalil lu toj kywitze'? 4B'inchal taq'wix qekye' wiq xjal ja'lo ex matz'el kypa'n kyib' ti'j Dyos, inkyqani'n tu'n tb'inchet jun b'a'nq'ob'aj kywitz; lay kub' nb'incha'ntlwe' kywitz, o'kxte techlalju' kye ti'j Jonas ju' t-sanjelal Dyos, chi Jesus. Tetzunj tb'aj tma'n Jesus ja'lu, e'kyaj tq'o'n xjal ex xi'tzuntz. 5Tetzunj kyik'x Jesus kyuk'ilju' t-xnaq'tzb'en jlajxi' njab', tzaj kyna'n qa mixti' kywa iq'i'n. 6Xi'tzun tma'n Jesus kye kjalu: Kyb'intzpe'ye', b'a'nqexe' ex kxq'uqim kyib'e' teju' ttx'amal wab'j najb'en kyu'n parisey ex kyu'n sadusey, chij kye. 7Aye'tzunju' t-xnaq'tzb'en Jesus intoq che yolin kyxolilex ti'ju' tyol Jesus ex intoq kyma'n: —¡Aloju' tu'n mixti' saj qiq'i'n qwa! chechij 8Atzunte Jesus pon toj tnab'l titi'toq in kyolinju' t-xnaq'tzb'en ex xitma'ntzuntz kye: —¿Titiqu'n in kma'naye' qa mixti' kwaye'? ¡Naq ch'i'nju' kyokslab'le' ati! 9¿Ma na'mx tkaneju' nyole' toj knab'le', ma minti' na'n kyu'ne' ti'ju' jwe' wab'j kub' nsipa'ne' kxolju' kab'lajk'al lajnaq (4,000) xjal, ex jte' chi'l kyejten minti' b'aj? 10¿Ex ma minti' na'n kyu'ne' ti'ju' wuq wab'j kub' nsipa'ne' kyxolju' lajk'al xjal, ex jte' chi'l kyejten minti' b'aj? 11¿Se'n taq'wi min xkaneju' nyole' toj kynab'le', myanatzu' nchin yolinawe' tiju' kywaye' min na'n saj? kyxq'uqimkye' kyib' teju' ttx'amal kyu'n parisey ex sadusey, chij kye. 12Kanetzuntz toj kywitzju' t-xnaq'tzb'en qa myatzu' yolina Jesus tu'n kykxq'uqinte kyib' teju' ttx'amal wab'j, xi' yolina'te Jesus tiju' kyxnaq'tzb'il parisey ex sadusey. 13Tetzunj tpon Jesus toju' tx'otx' Sesarey te Pilipo, xitqani'n kye t-xnaq'tzb'en ex tma: —¿Alkyeju' Tk'wal ichan ma chiqe' xjal, ti'nkyma'n wi'je'?, chij. 14Xi'tzun kytzaq'we'n t-xnaq'tzb'en te: —Ate' junjun nkyma'n qa aya Xwan Jawsal a'; junjuntl nkyma'n qa aya Eliy, junjuntl inq'mante qa aya Jeremiy mujqa jun t-sanjelal Dyos ten ojtxi', chechij. 15— Yajtzunkye', ¿alkyeqine' mache' chije'? chi Jesus xitqani'n kye. 16Xi'tzun ttzaq'we'n Simon Luch te kjalu: —Ateju'ya Krist, aj tk'wal Dyos itz' tejumajx, chij. 17Xi'tzun tma'n Jesus te kjalu: —K'i'wlanxi'xta Simon, tk'wal Jonas, qu'n aju' xkane toj tnab'la, mya' jun xjal saj q'mante teya, makane toj twitza qu'n aku' Nmane' toj kya'j saj yek'unte teya. 18Ayintzunwe' kxe'l nma'ne' teya qa aya Luch, ex tib'ajtzunju' pik lu, kjawila' nb'incha'njuye' nglesiye'; ex lay kub'ti'j tu'n tajaw kamik. 19Che kxe'l nq'o'ne' talju' kawb'il te toj kya'j teya; atzunju' kb'el tk'lona twitz tx'otx', ex ikx kb'el k'lo'n toj kya'j, ex atzunju' k'elel tpoq'i'na twitz tx'otx', ex ikx k'elel poq'i'n toj kya'j, chi Jesus. 20Xi'tzun tab'tzi'n Jesus kyeju' t-xnaq'tzb'en tu'n lalun txi' kma'n kye xjal qa ate Krist. 21Atxi'xtzunj tzyet tyolin Jesus kyeju' t-xnaq'tzb'en qa ilt'ij tu'n tanjti'j Jerusalen, exqa kyajtel toj kq'ob'ju' tijwnaq ati kyoklen toj kawb'il, knejel pale exqetzunju' xnaq'tzal ti'j kawb'il. Ex xitma'n qa kb'eltoq b'yo'n kyu'nju' xjal lu, extzunqa kjawil anq'in toj toxi'n q'ij. 22Xi'tzun iq'i'n Jesus tu'n Luch tu'n kyolin o'qekxkye, oktzun ten Luch myolte Jesus, ex xitma'n te: —¡Taye, naqwit tzaj q'aq'an tk'u'j Dyos ti'ja! ¡Tu'n mlalun tzik' tkyaqilju' lu ti'ja! chij. 23Xi'tzun ka'yin Jesus toj twitz Luch ex xitma'n te: —¡Pa'mil tib'a wi'je' Tajaw il, qu'n naq toka te jun takpuje'n weye'! Min nkaneta toj twitz kse'nte Dyos t-xim, axteju'ya tnab'l kse'n kyxim xjal, chij. 24Xi'tzun tma'n Jesus kyeju' t-xnaq'tzb'en kjalu: —Qa ati jun xjal tajb'il tu'n tok te nxnaq'tzb'ene', jk'unku' tib' tib'xtib', iqinktzju' tkurus ex lpek wi'je'. 25Qu'n alkyete' tajb'il tu'n tkletju' tchwinqlal te twitz tx'otx', lay tkanb'aju' tchwinqlal tk'etz Dyos; alkyetzunte matz'el tchwinqlal naqx tu'n npaje', atzunte ktkanb'a tchwinqlalju' tk'etz Qman Dyos. 26¿Ti' k'ajb'ela' te jun xjal qama tkanb'a' tkyaqilju' ati twitz tx'otx', extzun qama naju' tanmi? ¿Mujqa jte' jaku' b'ent tchjonte jun xjal tu'n tlq'etju' tchwinqlal? 27Qu'n ate' Tk'wal ichan tzul jumajtl tuk'i'l tqoptz'ajel nmane' ex kyuk'i'lju' anjl, ex atzuntzu' kxe'la nq'o'ne' tu'me'l t-xel kyeju' xjal se'nxju' kb'inchb'en. 28Axxi'x kxe'l nma'ne' kyeye' qa ati junjunkye' ate' tzalu layx che kyim qa na'mxtoq tok kka'yinju' tk'wal ichan ajtul kawil, chi Jesus kkye.

will be added

X\