Mateo 13

1Tojxtzunju' q'ij lu etz Jesus toju' ja ex kub' qe ttziju' njab'. 2Tu'ntzunju' txqan xjal chmet tk'etz Jesus, jax toj jun b'ark ex kub' qe, aye'tzu'n xjal eb'aj kub' we' ttziju' njab'. 3Aq'witzuntz yolil ti'j txqan ti'xti' kyeju' xjal tuk'i'l techlal. Xitma'ntzuntz kye: Ati jun xjalxi' awal. 4Tetzunj txi' tchto'nju' ij, jun tnej pon tz'aq toj b'e, eb'aj pon lipanju' pich' toj b'e ex jaw kwan. 5Atzun jun tnejtl pon tz'aq kxol ab'j, jamixti'ya' tchib'jil tx'otx'; aju' ij lu ja'loxi'x jawu'l twi', qu'n mixti' tchib'jilju' tx'otx' nim; 6tetzunj tjawulju' q'ij kub' tz'e'y tu'n ex kub' tzqij tu'n tpaj mixti'ju' tlok'. 7Atzun jun tnejtl kub' tz'aq kxol ch'i'x, tetzunj kb'aj ch'iyju' ch'i'x e'kub' ẍk'ostiju' awal tu'n. 8Atzunju' jun tnejtl ij kub' tz'aq toj b'a'n tx'otx', atzunte' iju' lu ch'iy ex witzan b'a'nxi'x; ate'pe' junjun spiy taq' jo'naq (100) twitz triy toj, atzun junjuntl oxnaq (60) ex junjuntl junaq lajoj (30). 9Alkyeqeju' ati kẍkyin, kb'inx b'a'nxi'x, chi Jesus. 10Epontzun lq'eju' t-xnaq'tzb'en Jesus tk'etz ex xikyqani'n te titiqu'n tuk'i'l techlal nyolina kyeju' xjal. 11Xi'tzun ttzaq'we'n Jesus kye: Matxi' tzaj tq'o'n Dyos kyeye' tu'n telkynik'e' ti'ju' ti'xti' toj ewaj toju' kawb'il te toj kya'j; aye'tzunkye' xjalxi' minti' nelkynik' ti'j. 12Qu'n aju' ati tojtzqib'l kxe'l q'o'n txqantl te, tu'n telxi'xtl tnik' ti'j; atzunju' min tojtzqi'n, xi'pe' k'ik'ela' tna'lju' ch'i'n b'i'n tu'n. 13Qu'mtzun nxi'ya' nma'ne' kye tuk'i'l techlal, qu'n in ok kyka'yi'n extzun min nknet kyu'n, inxikyb'i'n extzun inche kyejten nakuj min nkyb'i'n ex min kane toj kywitz. 14Tu'ntzun ja'lu in japun kyi'j aju' tmaju' Isayiy t-sanjelal Dyos kjalu: Inkyb'i'n b'a'nxi'x extzun min nkane toj kwitz, In okkyka'yi'n b'a'nxi'x extzun minti' nelkynik' ti'j. 15Qu'n aju' kyanmi xjal lu matxi' txi' ch'u'ẍix, matxi' tz'ok kyjpu'n kẍkyin tu'n lalun txi' kb'i'n ex matxi' tz'ok kyjpu'n kwitz tu'n lalun txi' kka'yi'n, tu'ntzun lalun kane toj kwitz ex tu'n lalun tz'anjtz kyi'j nk'etze', tu'ntzun lalun che kub' nq'a'na'ne', chi Isayiy. 16Aye'tzunkye' k'iwlanqexixe', qu'n atiju' kwitze' nche' ka'yin ex kẍkyine' nche' b'in. 17Axxi'x kxe'l nma'ne' kyeye', qa nimqeju' t-sanjela Dyos exqe'ju' xjal tnik'alkyi'j kyajb'iltoq tu'n tok kka'yinju' aju' nok kka'yine' ja'lo, extzun minti' sok kka'yi'n; kyajb'iltoq tu'n tok kb'i'n aju' nkb'i'ne', extzun mixti' sok kb'i'n. 18Kyb'inxe' b'a'nxi'x titi' tz'elpuna'ju' techlal tib'aju' xjalxi' awal: 19Ayeju' nxi' kb'inju' yol ti'ju' tkawb'il Dyos extzun min nkane toj kwitz, ikqeju' se'nju' ij kub' tz'aq toj b'e; ajttzaju' tajaw il inel tiq'i'nju' yol ojetoq ku'x awa'n toj tanmi, ikju' se'n ij nxi' wan kyu'n pich'. 20Atzunju' ij kub' tz'aq toj ab'j atzu' nyolina' kyi'ju' xjal nkyk'mo'n tyol Dyos tuk'i'l tkyaqil tzalajb'il, 21ajtzun ttzaj jun joyb'ilkyi'j ex ajkyel ik'un kyu'n xjal tu'n tpaj tyol Dyos, lwiy nche kub' tz'aq, ikqeju' se'nju' awal mya' najchaq tku'xa' klok', lwiy nche' jatz xb'oql. 22Atzunju' ij pon tz'aq toj ch'i'x atzu' nyolina' kyi'ju' xjal nxi' kb'inju' tyol Dyos, naqtzun aju' xi' nb'ajxa' kyk'u'j ti'ju' ti'xti' te twitz tx'otx' ex axju' kyq'inumal nkub' sb'unkye'. Qu'mtzun minti' nch'iyju' tyol Dyos toj kyanmi, ex minti' nche' witzan. 23Atzu'nte' ij pon tz'aq toju' b'a'n tx'otx' atzu' nyolina' kyi'ju' xjal nxi' kb'inju' tyol Dyos, in kane toj kwitz ex nche' witzan b'a'nxi'x, se'nju' spiy taq' jo'naq (100) twitz, oxnaq (60) mujqa junaq lajoj (30) twitz, chi Jesus. 24Xi'tzun tma'n Jesus juntl techlal kjalu: Ik tkawb'il Qman Dyos toj kya'j kse'n jun xjal xitawa'n tijaj tb'anilxi'x toj ttx'otx'; 25tetzunj intoq che wtan kkyaqil, ponju' jun tajq'oj awal twitz k'ul taq'wix toju' ttriy. 26Tetzunj tch'iyju' triy ex tej taq' spiyil, exju' taq'wix k'ul ch'iy tmuj. 27Aye'tzunju' majen tej kka'yinteju' lu exi' q'malte teju' tajaw awal, ex xikyma'n te: Taye, tb'anilnate' tijaja tej tku'x tawa'na, ¿jatzun saja' tijajilju' taq'wix k'ul lu? 28Atzunte tajaw awal xitma'n kye: Junlo ajq'ojte' wi'je' xb'inchante lu. Aye'tzunju' tmajen xikyqani'n te kjalu: ¿Ma tajb'ila tu'n qxi'ye' xb'oqilteju' taq'wix k'ul lu? 29Atzunte tajaw awal xittzaq'we'n kye: Lay, qu'n ajtjatz kxb'onqinjuye' taq'wix k'ul majx jaku' jatz xb'oqliju' ntriye' kyu'ne'. 30Xtenku'j ch'iyku'j tuk'ilju' triy, tzmaxitzunj ajtjaw joyit, kxe'l nma'ne' kyeju' nmajine' tu'n tjaw kb'uyinju' taq'wix k'ul nejxi'x, tu'n tkub' kk'lo'n, tu'ntzun tokx q'et toj q'aq', atzunju' triy tu'n txi' k'uyit toj nk'ujaye', chi Jesus b'aj tma'n tiju' tajaw awal, chi Jesus. 31Xi'tzun tma'n Jesusju' juntl techlal kjalu: Aju' tkawb'il Dyos te toj kya'j ikju' se'n jun ij te ẍmostas nxi' awa'n toj tx'otx' tu'n jun xjal. 32Axxi'x aju' twitz ẍmostas atzun b'o'sxixju' kxolju' txqantl ij, ajtzun tch'iy niminxi'xpe'tl npona' kyekwitzju' txqantl itzaj, ex in ch'iy nakuj jun tze, jun tze nintzku' ja kub'a' kyb'incha'na' tal pich' kypaqb'il kyxolju' tq'ob', chi Jesus. 33Ex ikx xitma'nju' techlal lu kye: Aju' tkawb'il Dyos toj kya'j ikju' se'nju' ttx'amal wab'j nb'aj t-smo'n jun qya tuk'i'l oxe' mlon arin tu'ntzun tmal twitzju' wab'j b'a'nxi'x, chij. 34Tkyaqilju' lu xitma'n Jesus kye xjal tuk'i'l techlal, ex minti' yolin qa mixti'wt techlal tu'n. 35B'aj tkyaqil ja'lu tu'n tjapunju' q'manjtz tu'nju' t-sanjelal Dyos kjalu: Ok chin yolile' kye xjal tuk'i'l techlal; che kxe'l nchik'b'a'ne' ti'xti' e'wanqe' atxi'x tej tb'ent twitz tx'otx', chij. 36Eb'ajkyajtzun tq'olb'e'n Jesus kyuk'i'lju' xjal ex okx tuja, atzuntzu' epona' lq'eju' t-xnaq'tzb'en tk'etz ex xikyqani'n te titi' tz'elpuna'ju' techlal tib'aju' taq'wix k'ul toju' triy. 37Xi'tzun ttzaq'we'n Jesus kye: Ayinwe' Tk'wal ichan nchin ku'x awanteju' ij tb'anilxi'x, 38Atzunju' ttx'otx' xjal a ntechla'nju' tkyaqil twitz tx'otx'. Aju' ij tb'anilxi'x atzu' nyolina' kyi'ju' xjal ati kyoklen tiju' tkawb'il Dyos, ex atzunju' taq'wix k'ul atzu' nyolina' kyi'ju' xjal te taq'wixilqe', 39atzunju' ajq'oj ku'x awante taq'wix k'ul atzu' nyolina' ti'ju' tajaw il. Atzunju' ajtjaw joyitju' triy atzu' nyolina' tiju' mankb'il q'ij, ex aye'tzunju' majen b'uyilteju' triy atzu' nyolina' kyi'ju' anjl. 40Ikxtzu'n se'n njaw b'u'yitju' taq'wix k'ul ex nokx q'et toj q'aq' tu'n tb'aj, ikxtzun kb'ajelju' kyi'ju' xjal toj mankb'il q'ij. 41Aju' Tk'wal ichan che ul tchq'o'nju' anjl toj tkawb'il tu'n kb'uyit kkyaqilju' xjal nche kub' tz'aq txqantl kyu'n toj il ex aye'ju' nche b'inchan taq'wixil. 42Ok che okyex q'o'n toj txqan q'aq' inxi'x jayun toj chuj, atzuntzu' che oq'ela' ex okxi'x kjach'ub'tel t-xe kywitzte. 43Aye'tzunju' xjal tnik'alkyi'j okxi'x che qoptz'ajeb'il nakuj q'ij toju' tkawb'il Qman Dyos. Alkyeju' ati t-ẍkyin b'inxju' yol lu, chi Jesus. 44Aju' kawb'il toj kya'j ikju' se'n jun k'uwenj muqu'n toj tx'otx'. Aju' q'inumal lu okyal twitz jun xjal, atzunju' xjal lu axtzu' kyej tewana' jumajtl; tzalajxi'xtzun ti'j, xitk'a'yi'n tkyaqilju' ati te ex tlaq'ju' tx'otx' aju'. 45Ikx tkawb'il Dyos toj kya'j se'n b'aj ti'j jun xk'aẍlel ntoq tjyo'n tb'anil xlik sq'ib'un; 46tetzunj tel yal jun tu'n twi' wi'yal, b'aj tk'ayi'n tkyaqilju' ati te ex tlaq'ju' tb'anil xlik lu, chi Jesus. 47Ex ikx nb'aj ti'ju' tkawb'il Dyos toj kya'j se'nju' pa tzyub'l kyiẍ ajtku'x q'et toj a' in jatz tb'uyi'n chukchaq kyiẍ. 48Aj tnoju' pa tzyub'l kyiẍ, aye'ju' kyiẍil njatz kyi'n ttzi a', atzuntzu' nche kub'a' qe sk'olkyeju' kyiẍ, nche ku'x kq'o'nju' b'a'n kyiẍ toj chi'l ex nxi' kxonju' taq'wix kyiẍ. 49Ikxtzun kb'ajilju' ajttzaj mankb'il q'ij: kche b'je'letzju' anjl pa'lkyeju' myab'a'n kyi'ju' b'a'nqe', 50ex ok che okyex kq'o'nju' taq'wix xjal toj q'aq'. Atzuntzu' che oq'ela' ex majx kjach'ub'tel t-xe kwitzte, chi Jesus. 51Xi'tzun tqani'n Jesus kye t-xnaq'tzb'en ex tma: —¿Ma nkane tkyaqilju' lu toj knab'le'? chij —Makaneqe' toj qwitz, chechij. 52Xi'tzun tma'ntl Jesus kye: —Qa ati jun xnaq'tzal ti'j kawb'il mat-xnaq'tza tib' ti'ju' tkawb'il Dyos te toj kya'j, ikju' se'n jun tajaw ja inetz tiq'inju' ak'a'j ex ojtxi' ti'xti' toju' tk'uwen, chi Jesus. 53Tetzunj tb'aj yolin Jesus tib'aj tkyaqilju' techlal lu, ik'tzuntz ttziju' njab' 54ex pon toju' ttx'otx', ex okxtzuntz toju' ja te k'u'lb'il tu'n t-xnaq'tzan kyeju' xjal. Intoqtzun che lab'tiju' xjal ti'ju' t-xnaq'tzb'en ex intoq kma'n: —¿Jatzun saj xnaq'tza'naju' xjal lu tu'nju' nimxi'x tojtzqib'l? ¿Se'n taq'wi nb'ent tkyaqilju' b'a'nq'ob'aj lu tu'n? 55¿Ma mya'tzun tk'wal Jse lu, aj naq'unan ti'j tze ex tal Mariy? ¿Ma mya'tzun ktzik Santyayju' lu, tuk'i'l Jse, Simon ex Judas, 56ma mya'yetzun tanab'ju nche anq'in tzalu qxol? ¿Jatzun saja' tkyaqilju' tnab'l lu? chechij. 57Mitzun jun elb'a'nju' tyol toj kwitz xjal. Qu'mtzun xitma'n Jesus kye: —Atzu' nche' laqjakye' xjal ti'j jun t-sanjelal Dyos te najchaq toj tkyaqil twitz tx'otx', myatzu' kyi'ju' najlqe' tojxju' ktx'otx' mujqa toj kyja kyib' kyuk'i'l, chij. 58Tu'n tpajtzu'n minti' nche okslanju' xjal te, mixti' tb'incha nim b'a'nq'ob'aj atzu'.

will be added

X\