Mateo 12

1Tojtzun tq'ijlalil lu, intoq b'et Jesus kxolju' awal toj q'ij te ojlab'l. Tzaj we'yaj kyi'ju' t-xnaq'tzb'en ex eb'je'l kyk'usi'n spiy tu'n t-xi' kywanju' twitz triy. 2Tetzunj kyka'yinteju' parisey, xikyma'n te Jesus: —Ka'yinxpe'ya nkb'incha'nju' t-xnaq'tzb'ena extzun mixti' tu'n tb'inchetju' lu toju' q'ij te ojlab'l, chechij. 3Atzunte Jesus xittzaq'we'n kye: —¿Ma b'ajx jawa' kẍch'i'ne' toj tu'jil titi' tb'incha Dab'i tej ttzaj we'yaj ti'j kyuk'ilju' tuk'i'l? 4Okx toj tja Qman Dyos ex aq'wi walkyeju' wab'j xjansa'n te Dyos, extzun mixti' toj kawb'il tu'n txi' twan exqe'ju' tuk'i'l, naq o'qekxju' pale tu'n kwante. 5¿Ma b'ajxtzun jawa' kẍch'i'ne' toju' tkawb'il Moyses ja ntma'na' qa minti' nche b'inchan ilju' pale toj tja Dyos maskye min nche' ojlan toju' q'ij lu? 6Kxe'ltzun nma'ne' kyeye' qa ati jun nimxi'x toklen kyetwitzju' tja Dyos. 7Ma na'mxtzun tkane toj kwitze' titi' tz'elpuna'ju' yol lu: Awe' wajb'il tu'n ttzaj laqj kk'u'je' kyi'ju' xjal, ex myate' tu'n tkub' kyq'o'ne' chojb'il. Naqwit matxi' kane toj kwitze', mixti'wtlo nkma'ne' qa ati til jun xjal mixti' xb'inchan il. 8Qu'mtzun ate' Tk'wal ichan, ati tipumal tib'aju' q'ij te ojlab'l, chi Jesus kye. 9Extzun Jesus toju' najb'il lu ex pon toju' ja te k'u'lb'il. 10Atitoqtzun jun xjal ma'toq txi' tzqij jun tq'ob'; xi'tzun kqani'n txqantl xjal te Jesus naqxwit tu'n kpoqinte kjalu: —¿Ma ati toj kawb'il tu'n tq'anit jun xjal toju' q'ij te ojlab'l? chechij. 11Atzunte' Jesus xittzaq'we'n kye: —¿Alkye junkye' qa ati jun trit, exqa ma ku'x tz'aq tojun jul toju' q'ij te ojlab'l, ma laytzulo jatztiq'i'n? 12¡Nimxi'xtzun toklen jun rit kyetwitz jun xjal! Qu'mtzun, ati tu'n tb'inchetju' xtalb'il toju' q'ij te ojlab'l, chij. 13Xi'tzun tma'n Jesus teju' xjal tzqijtoq tq'ob': —Nuqpinxa tq'ob'a, chij. Atzunte' xjal ku chij, xitnuqpi'n tq'ob' ex majx q'anitju' tq'ob' se'nxju' juntl. 14Tetzunj kb'jetzu' parisey, e'aq'witzuntz ximil ti'j se'n tu'n tkub'a kb'yo'nju' Jesus. 15Tetzunj tb'inte Jesus ja'lu, xi'tzuntz tojuntl najb'il ex txqanju' xjal eb'jik'lpe ti'j. Intoq che q'anit kkyaqilju' xjal tu'n, 16ex intoq xitma'n kye tu'n lalun che yolin ti'j kxol xjal. 17B'aj tkyaqilju' lu, tu'n tjapunju' kyejni q'ma'n tu'n Isayiy tmajen Qman Dyos, tej tmante: 18Luju' nmajine' ati tzalu, aj xjaw nsk'o'ne', k'u'jlanxi'x wu'ne' ex nchin tzalaje' ti'j. Kb'el nq'o'ne' Xewb'aj Xjan tib'aj, ex kxe'l tpakb'a'nju' tnik'alti'j kye kkyaqilju' nimaqtnam. 19Lay q'ojin ex lay ẍch'in; mix-a'lox jun kb'ilte tq'ojq'ojel twi' toj xkichb'e. 20Lay kub' ttoqi'nju' tqan ptz'an piljnitl ex lay kub' tyupinju' mech mixjun k'entxi'x, tzmaxi'j ajtkanb'an tuk'i'lju' tnik'alti'jil. 21Aye'tzunju' nimaqtnam kqeb'ilxi'x kk'u'j ti'j, chiju' tz'ib'a'n. 22Pon q'i'n jun xjal twitz Jesus moẍ ex me, tzyu'ntoq tu'n tajaw il, q'anit tu'n Jesus ex b'ent tka'yin ex tyolin. 23Kykyaqilju' xjal eb'ajlab'ti ex kyma: ¿Ma atzulo tk'wal Dab'iju' lu? chechij. 24Tetzunj kb'inte pariseyju' yol lu, kymatzuntz: Ate B'eelseb'u, knejel tajaw il nxi' q'onte tipumalju' ichan lu tu'n kyex tajaw il tu'n toj kyanmi xjal, chechij. 25Eltnik' Jesus tiju' nkyxima'n xjal kxolilex, ex xitma'n kye: Alkyexku' jun tx'otx' pa'ntib' exqa mache q'ojin kxolilex, majx che b'el xitj; exqa jun nintnam mujqa jun ja xjal makub' kypa'n kyib' layx che ten nimtoj. 26Ex ikxtzu'n, qa aju' tajaw il sex xla'jinteju' tajaw ilx, ax kb'el pa'nte tib'; ¿Se'ntzun tten tu'n tch'iyju' tkawb'il? 27Aye'tzunkye' nkma'ne' qa tu'nju' tipumal B'eelseb'u nche ela' tajaw il kyi'j xjal wu'ne'; qatzun ikju' se'n kma'ne' ¿alkyetzun ntzaj q'onte kyipumalju' kxnaq'tzb'ene' tu'n telju' tajaw il kyu'n toj kyanmi xjal? Qu'mtzun aye'x nche q'mante qa mya' tu'me'lju' nkma'ne'. 28Ayintzuwe' nche etzwe' tajaw il wu'n toj kyanmi xjal tu'n Xewb'aj Xan te Dyos, atzun tz'elpuna'ju' qa matxi' tzulju' tkawb'il Dyos kxole'. 29¿Se'ntaq'wi tu'n tokx jun xjal alq'al toj tja juntl xjal kuw qa minti' xkub' tk'lo'n nej? naq o'kx qama kub' tk'lo'n kb'entela' talq'an. 30Alkye jun xjal min q'o'ntib' wuk'i'le', ajq'oj wi'je'; ex alkyete min nonin wuk'i'le' tu'n tjaw b'u'yitju' twitz awal, naq tok chitulte. 31Qu'mtzun kxe'l nma'n kyeye' qa ate Dyos kb'el tnajsa'n tkyaqil kyilju' xjal exju' taq'wix inkyma'n, qatzun xi' nche' yolina' taq'wix tiju' Xewb'aj Xjan, layx kub' najsa'n kyil tu'n Dyos. 32Expe' kb'el najsa'n tilju' xjal ntma'n tyol taq'wix ti'ju' tk'wal Dyos; atzunju' nyolin taq'wix ti'ju' Xewb'aj Xjan, layx kub'najsa'nju' til toju' tq'ijlalil ja'lo ex toju' tq'ijlalil tzul, chi Jesus. 33Qa b'a'nju' tze, b'a'nju' twitz nel; qatzun taq'wixju' tze ex taq'wixju' twitz nel; atzu' nelate' qnik' tiju' tze qa b'a'n naqx tu'nju' twitz. 34¡Tyajajil q'antin! ¿Se'ntaq'wi tu'n kmanteye' b'a'n, extzun mya' b'a'nqeye'? qu'n tkyaqilju' netz toj ttzi xjal atzu' ntzaj anq'ina' toj tanmi. 35Aju' b'a'n xjal intma'nju' b'a'n, qu'n b'a'n ati toj tanmi, atzunju' xjal myab'a'n intma'nju' ti'xti' myab'a'n, qu'n taq'wixil ati toj tanmi. 36Oktzun kxe'l nma'ne' kyeye' toju' tq'ijlalil ajkyok xjal toj xjel, kykyaqilju' xjal tzul kma'n titi' yol mixti'x tajb'en xkma. 37Qu'n tu'nxju' tyola k'okyela'ya toj xjel, atzuntzu' k'elela' tnik'tzil qa ati tila mujqa mixti', chi Jesus. 38Aye'tzun junjun parisey ex xnaq'tzal kawb'il xikyma'n te Jesus: —Xnaq'tzal, qajb'ile' tu'n tb'inchanteya jun b'a'nq'ob'aj qwitze', chechij. 39Atzunte Jesus xittzaq'we'n kye: —Ayeju' xjal lu mya' b'a'nqe' ex matxi' tz'el kypa'n kyib' ti'j Dyos, atzun ja'lo in kqani'n jun b'a'nq'ob'aj tu'n tb'inchet kwitz, extzun lay txi' yek'it jun b'a'nq'ob'aj kye, naq o'kx kxe'l nma'nju'ye' kye tib'aju' b'a'nq'ob'aj tb'incha Qman Dyos te Jonas. 40Qu'n ikse'nte Jonas ten oxe' q'ij ex oxe' qonik'an toj tk'u'j jun nimin kyiẍ, ikxtzunte Tk'wal ichanju' ktenb'il oxe' q'ij ex oxe' qonik'an toj tx'otx'. 41Ajkyokju' xjal toju' tq'ijlalil ja'lo toj xjel, che jawil we' xjal aj Ninib'e xjelul kye ex kb'el kytz'e'ysa'n kywitz; qu'n anjtzti'j kyanmi aj Ninib'e tej kyb'inte tpakb'ab'l Jonas, nimxi'xtzunte' toklen ati tzalu ja'lo kyetwitz Jonas. 42Ex ikx kjawil we'ju' qya nimaqkawil tzaj toj tnayajkya'j toju' tq'ijlalil ajkyok xjal toj xjel, ajkyokju' xjal toju' tq'ijlalil ja'lo toj xjel, ex kb'el tz'e'ysa'n kwitz, qu'n tzaj toj jun tx'otx' najchaq b'ilteju' nimaq nab'l tk'etz Salomon, nimxi'xtzunte' toklenju' ati tzalu kyetwitz Salomon, chi Jesus. 43Naqa setzju' tajaw il toj tanmi jun xjal, inxi' b'et toj junjun najb'il tzqij ex ntjyo'n jatu'n tojlana' ch'i'n; extzunqa mixti' nelyal tu'n, nkub' t-xima'n: 44K'anjel jumajtlwe' wi'j toj njaye' jaẍin netza'ye'. Naqatzun sanjtztl ti'j, nel yalju' tanmi xjal tu'n kse'n jun ja mixti' toj, ẍnu'l ex b'i'ncha'n b'a'nxi'x. 45Kxe'ltzuntz ex che tzajel tb'u'yi'n wuqtl tajaw il taq'wixi'xtl kyetwitz, che okyextzuntz kkyaqil toju' tanmi xjal ja etznqe' ex atzuntzu' kb'el b'o'lja' xjal nimxi'x kyu'n se'nju' tnejel. Ikxtzun kb'ajelju' kyi'ju' xjal mya b'a'nqe' toju' tq'ijlalil ja'lo, chi Jesus. 46Inxtoqtzun yolin Jesus kyeju' xjal, tej tponju' ttxu exqe'ju' titz'in, kyajb'iltoq tu'n kyolin tuk'i'l. Ekyejtzun we' twi' pe'n, 47tzaju' jun xjal ex xitma'n te Jesus: —Luju' ttxuya exqe'ju' titz'ina ateqe' twi' pe'n, kyajb'il tu'n kyolin tuk'i'la, chij. 48Atzunte Jesus xittzaq'we'n te xjal lu kjalu: —¿Alkyetzu'n ntxuye' ntma'na ex alkyeqe' witz'ine'? chij 49Exi'tzun tyek'u'nju' t-xnaq'tzb'en ex tma kjalu: —Aye'we' ntxu ex witz'in lu. 50Qu'n alkyexku' qa nxi' tb'incha'n tajb'il Nmane' Dyos ati toj kya'j, aye'tzun witz'injuye', wanab'e' ex ntxuye', chij.

will be added

X\