Mateo 11

1Tetzunj tb'aj tma'n Jesus tkyaqil tu'n txi' kyb'incha'nju' t-xnaq'tzb'en, extzuntz toju' tnam ex xi' pakb'al ex xnaq'tzal kyoju' txqantl tnam. 2Tb'itzun Xwan jawsal a' aju' intoq tb'incha'n Krist, tej jpu'ntoq. Exi'tzun tchq'o'n kab'e' t-xnaq'tzb'en tk'etz 3tu'n txi' kyqani'n te qa aju' ati tulel mujqa kb'el ayet juntl. 4Xi'tzun ttzaq'we'n Jesus kye: Kuxkxi'ye' ex kymanxe' te Xwan aju' matxi' kyb'iye' ex matxi' kyile'. 5Kytx'olb'anxe' te qa in jqet kywitzju' moẍ, in che jaw b'etju' kox, in che q'anetju' ati xlemtx'a'k kyi'j, in jqet kyẍkyinju' chkyinqe', in che jaw anq'intlju' kyimni ex in pakb'etju' b'a'n tqanil kyeju' prow. 6¡K'i'wlanxi'xte' xjal minti' njawje tk'u'j wi'je', chi Jesus kyeju' t-xnaq'tzb'en Xwan! 7Tetzunj ma'toq che anju' t-xnaq'tzb'en Xwan, aq'wi Jesus yolil ti'ju' Xwan jawsal a' kyeju' xjal, kjalu: ¿Titi' etx'anje' ka'yilte toj chq'ajlaj? ¿Ma ikyxjalu' kyile' se'n jun tqan ptz'an nxtunin toj kyq'iq'? 8¿Titi'tzun exiye' ka'yilte? ¿Jun ichan tok jun t-xb'alun tb'anilxi'x? B'i'n kye'kyu'n qa aye' xjal tok kyxb'alun tb'anilxi'x atzu' teqe' toju' kyja nimaqkawil. 9¿Titi'xi'xtzun xiklaye'? ¿Ma ka'yil jun t-sanjelal Dyos? Iku', axxi'x jun t-sanjelal Dyos nimxi'x toklen kyekywitzju' txqantl t-sanjelal. 10Atzu' nyolina'ju' tz'ib'a'n toj tyol Dyos ti'j Xwan kjalu: Kxe'l nchq'o'nwe' jun nmajine' nejxi'x twitza, tu'ntzun tkub'nej twitza b'inchalte tb'eya chij. 11Axxi'x kxe'l nma'ne' kyeye' qa b'ajx najana' jun xjal nimxi'x toklen se'nju' Xwan jawsal a'; expe' aju' b'o'sxi'x toju' tkawb'il Dyos toj kya'j nimxi'x toklen kyetwitz. 12Atxi'x toj tq'ijlalil Xwan jawsal a', nche' q'ojin xjal ti'ju' tkawb'il Dyos, ex aye'ju' nim kyipumal kyajb'il tu'n tkub'ti'j kyu'n. 13Kykyaqilju' t-sanjelal Dyos exju' tkawb'il Moyses e'yolin tiju' tkawb'il Dyos tzmaxi'j tulju' Xwan jawsal a'; 14qa kyajb'ile' tu'n txi' kyoksla'ne' lu, ate' Xwanju' Eliy t-sanjelal Dyos ati tulel. 15Alkyeqe'ju' nche' b'in, kb'inx. 16¿Se'n che okyel nq'o'na'ye' xjal toju' tq'ijlalil ja'lo? ikqeju' se'nqe' k'wal nche kub' qe toj k'wik ex nxi' kẍch'i'n kyeju' kyuk'i'l kjalu: 17Xiqq'ajtzane' chun aye'tzunkye' minti' eb'ixane'; xiqb'itzane' b'itz b'isb'ajilx, aye'tzunkye' min e'oq'e'. 18Qu'n ulju' Xwan, mixti' nwan ex mixti' nk'wan, extzun nkma'ne' qa ati tajaw il tuk'i'l. 19Atzun ja'lo ma chinule' ayine' Tk'wal Dyos, inchin wane' ex nchin k'wane', aye'tzunkye' nkyma'ne' qa kuw chin wane' ex kuw chin k'wane', wamiw wib'e' kyuk'i'l xjal peyul pwaq ex aj il. Kyna'ku'ye' ate' tnab'l Qman Dyos nel tnik'tzil tu'nju' tb'inchb'en, chi Jesus kye xjal. 20Oktzun ten Jesus tzak'ulkyeju' tnam ja matxitoq tb'inchaya' txqan b'a'nq'ob'aj, qu'n mixjunti' nanjtzti'j kyanmi. Intoq xitma'n Jesus kye: 21¡Qab'anx kywitze', aj Korasin! ¡Qab'anx kywitze' aj B'etzayda! Qu'n naqwit toj Tiro ex Sidon xb'entaju' txqan b'a'nq'ob'aj xb'inchet kyxole', ojtxi'wtlo tanjtzlen ti'j kyanmi ex ojewtlo tz'ok kyq'o'n kyi'j te b'is ex matxi'wtlo jax kychto'n tza'j toj kywi'. 22Oktzun kxe'l nma'ne' kyeye' qa nimxi'x tz'e'ysb'il kywitze' tzul toju' tq'ijlalil ajkyok xjal toj xjel kyekywitzju' aj Tiro ex aj Sidon. 23Yajtzunkye' aj Kaparnawum, ¿Mache japumele' tzmax toj kya'j toj kywitze'? ¡Xi'pe' che b'elixa'ye' tzmax t-xe kynajb'il kyimni! Qu'n naqwit toj Sodom eb'incheta' b'a'nq'ob'aj xb'inchet toja, ttenxwitlote' nintnamju' lu ja'lo. 24Qu'mtzun kxe'l nma'ne' kyeye' qa nimxi'xju' tz'e'ysb'il witzb'aj ktzajel kyib'aje' kyekwitzju' najlqe' toj Sodom, chi Jesus. 25Tojtzunju' tq'ijlalil lu tma Jesus kjalu: Kjawil nnima'ne' tb'iya Nman Dyos, aya Taye tajaw kya'j ex tajaw tx'otx', tu'nju' matxi' tzaj tyek'u'na ti'xti' kyeju' mixti' b'a'n kyu'n ex makub' tewa'na kyeju' atixi'x kynab'l ex nche' kane ti'j. 26Iku' Taye, qu'n ikna' tajb'iliya tu'n tb'inchanteya, chi Jesus te Dyos Manb'aj. 27Tkyaqilju' ti'xti' matxi' tzaj tq'o'n Nmane' Dyos weye'. Mix-a'lox jun ojtzqi'nqinxi'xe' tu'n, naq o'kx Nmane' Dyos; ex mix-a'lo' ojtzqilte Manb'aj, naq o'kxju' K'wa'lb'aj exqetzunju' kxe'l q'o'n anb'il kye tu'n kyojtzqinte. 28Kuktzaje' nk'etze' kkyaqile' matxi' che siktiye' toj aq'untl ex tjaq' iqtz, kxe'l nq'o'nwe' ojlab'l kyeye'. 29Kyq'onkxe' yuw ti'j kqule', ex kyxnaq'tzam kyib'e' wuk'i'le' qu'n nimwe' npasens ex me's qinwe'; tu'ntzun tel yalju' ojlab'l kyu'ne'. 30Qu'n awe' yuw njax nq'o'n ti'j kyqule' exju' iqtz nxi' nq'o'ne' kyeye' mya alqe', chi Jesus.

will be added

X\