Mateo 10

1E'tzajtzun ttxko'n Jesus kab'lajoj t-xnaq'tzb'en, ex xitq'o'n kyoklen tu'n kyetz tajaw il kyu'n toj kyanmi xjal ex tu'n kq'anit alchaqkyex yab'il ex k'ixk'oj kyu'n. 2A kyb'i kab'lajoj x-naq'tzb'enju' lu xiq'o'n kyoklen tu'n Jesus: tnejelxi'x a Simon, ax tb'iju' Luch, ex Leẍ ju' titz'in Luch; aju' Santyay ex Xwan ju' titz'in, tk'wal Seb'edeyqe'; 3Ajun Lip ex B'artolome; ex a junju' Tomas exju' Matey intoq peyun pwaq chojb'il te Rom; ax juntlu' Santyay tk'wal Alpey, ex Tadey; 4Atzu'n juntl a Simon aj Kananey, atzu'n juntl aju' Judas Iskaryot aju' okmiltz'uj ti'j Jesus ex xik'ayinte. 5Exi'tzun tchq'o'n kab'lajoj xnaq'tzb'en ex b'ajx tma'n tu'me'l kye kjalu: Lalun che'xe' toju' kytx'otx' xjal min nche okslan te Dyos expe' lalun che okxe' kyoju' tnam te Samarya; 6Xi' kukyxa'ye' pakb'al kye' aj Israel tzpetjniqe' naku'j tal rit. 7Kukxi'ye' ex kymanxe' kye qa matxi' tzul kanunju' tkawb'il Qman Dyos. 8Che' q'anet-xju' yab' kyu'ne', che jaw itz'jiju' kyimni kyu'ne', che q'anet-xju' xjal ati xlemtx'a'k kyi'j ex che elxju' tajaw il kyi'j xjal kyu'ne'. Naqkukx xi'nq'o'ne' oklenj kyeye', ikxtzunkye' lalun kyqaniye' chojb'ilte. 9Lalun txi' kyine' q'anpwaq, saqpwaq ex q'ank'uxb'il, 10ex lalun txi' kyine' jun pa tkb'el ti'xti' toj b'e. Lalun txi' kyi'ntl kyi'je' te toj b'e, lalun txi' kyi'n kyxajab'e' ex kytzeye', qu'n aju' xjal naq'unan ilti'j tu'n twan ti'xju' taq'un. 11Ajtzun kyokxe' toj jun tnam mo kojb'il, kyjyom jun xjale' q'uqlixi'x tk'ujlalil, ex axtzu' che kyaja' tene' tja tzmaxi' aj kyanjtze'. 12Ajkyokxe' tuja, che q'olb'enqeye' kyeju' ate'qe' toj ex kymanxe' kjalu, che tenxwite' toj nak'b'il, chechikuye'. 13Qama che k'amliye' kyu'n, ktenb'il nak'b'il kyja, exqa min ẍe' k'amliye' kyu'n, k'anjitz ti'ju' k'i'wb'il kyuk'i'le'. 14Jamin ẍek'amliye' ex jamin ẍe'xa' b'i'ne', kukyetze' toju' kyja mujqa toj kytanam ex kychtonkje' quq ti'j kyqane' te ye'k'b'ilte qa myab'a'nqe' xjal lu. 15Qu'n axxi'x kxe'l nma'ne' kyeye', toju' q'ij ajkyok xjal toj xjel, nimxi'x tz'e'ysb'il twitzju' tnam lu tzul kyetwitz Sodom ex Komor. 16¡Kyb'intzpe'ye'! che kxe'l nchq'o'ne' nakuj ritqeye' kyxol txqan xo'j. Che okxe' b'a'n che ximane' kse'nqe' kan ex che okxe' me's kse'nqe' paloms. 17B'a'nqexe', qu'n che kxe'l q'o'ne' toj kyq'ob' tzyul kawb'il, ex che kb'ajel jiku'ne' toj asyal kyu'n kyoju' ja te k'u'lb'il 18expe' che kxe'lq'i'ne' kwitzju' kawil ex nimaqkawil naqx tu'n npaje'; atzuntzu' che okyela'ye' tziyalweye' kye ex kyeju' xjal mya aj Judaqe'. 19Ajtzun kypon q'i'ne' kywitz tzyul kawb'il, lalun che ximane' ti'ju' kxe'l kyma'ne' mujqa se'n kxe'la' kyma'ne', qu'n ate Qman Dyos ktzajel q'onte kyole' ajtpon kmuj tu'n kyoline'. 20Qu'n myaye'kye' kche yolil, ate' Xewb'aj Xjan kyolil kyi'je'. 21Kxe'l kyq'o'nkye xjal kytzik mo kyitz'in tu'n kykyim, aye'tzu'n manb'aj kxe'l kyq'o'n kyk'wal; aye'tzuntlju' k'walb'aj che jawil miltz'uj kyi'ju' kyman ex che kb'el kyb'yo'n. 22Kykyaqil xjal twitz tx'otx' che elel ik'unkyeye' naqx tu'n npaje', alkyetzunte' matzik'x tu'n ajxi' tjapun mankun, atzunte kkletelju'. 23Qama ljonjtz toj kyq'ije' toj jun nintnam, kukyxi' oqe' tojuntl, qu'n axxi'x kxe'l nma'ne' kyeye' na'mxtoqpe' tb'aj kyb'eti'ne' kykyaqil nimaqkytanam aj Israel ajtul jumajtlu' Tk'wal ichan. 24Mix-a'lox jun xnaq'tzb'en nimxi'x toklen kyetwitzju' xnaq'tzalte, ex mix-a'lo' jun majen nimxi'x toklen kyetwitzju' tajaw aq'untl. 25Ilti'j tu'n tik'xju' yajb'il tu'n xnaq'tzb'en se'nxju' xnaq'tzalte, ex aju' majen se'nju' tajaw aq'untl. Qama tz'ok q'o'n tb'iju' tajaw ja te B'eelseb'u, ¿Titi'tzun kq'manjtzel kyi'ju' toj tja? 26Lalun che xob'e' kye xjal, qu'n mixti'x jun ti'xti' toj ewaj miwtjunti' nelyal, ex mixti'x jun ti'xti' e'wa'n miwtjunti' nb'injtz. 27Aju' nxi' nma'ne' kyeye' toj qlolj, kymanxe' toj tqan q'ij kye xjal; atzunju' nxi' nma'ne' kyeye' toj ewaj, kyẍch'inxe' kye xjal tzmax kyib'aju' ja. 28Lalun che xob'e' kyeju' nche kub' b'yonte kyxmilale', qu'n layna' kyimte kyanmiye' kyu'n; atzu' che xob'a'kye' te Qman Dyos, qu'n ati tipumal tu'n kykub' xitu'ne' toj q'aq' tu'n. 29¿Ma myatzun naq jun sentab' ti'j kab'e' pich'? extzun minti' nku'tz tz'aq jun twitz tx'otx' qa minti' xtaj Qman Dyos ati toj kya'j. 30Ajla'npenakye' t-xya'mal kywi' junjunal tu'n Qman Dyos. 31Qu'mtzun lalun che xob'e': qu'n nimxi'xpe'nakye' kyoklen kyekywitz txqan tal pich'. 32Qa ati jun xjal minti' xkub' tewa'n qa okslal weye' kywitz txqantl, ex ikxwe' lay kub' wewane' twitzju' Nmane' ati toj kya'j; 33ex alkyetzunte machin kub' tewane' kywitz xjal, ex kb'el wewane' twitz Nmane' ati toj kya'j. 34Lalun kyximaye' qa q'ol nak'b'il ẍinulaye' twitz tx'otx'; min ẍinulwe' q'ol tzalajb'il kye xjal, tu'npe' npaje' tzula' pa'jtib'il kyxol. 35Tu'npe' npaje' kjawila' ti'ntib'ju' k'walb'aj tiju' manb'aj, exju' txin tiju' txub'aj extzunju' lib'j tiju' lib'un qya; 36ikytzunju' aye'xju' toj kyja kyib' che okyel te kyajq'oj. 37Alkyete' nlaqj tk'u'j b'a'nxi'x tij ttxu mujqa tman kye nwitze' lay b'ent tajb'en weye', ex alkyete nlaqjxi'x tij tk'wal mujqa tmyal kye nwitze' lay b'ent tajb'en weye'; 38ex alkyete min xjaw tiqa'n tkurus ajtok lpe wi'je', layx tz'ok te nk'wale'. 39Alkye jun o'kxtzu' toka tk'u'j ti'ju' tchwinqlal twitz tx'otx', layx tkanb'aju' tchwinqlal tk'etz Dyos, alkyetzunte' nel tchwinqlal tu'n npaje', ktkanb'aju' tchwinqlal tk'etz Dyos. 40Qama che k'monjtze' kyu'n xjal, ayinwe' nchin k'monjtz kyu'n; exqa machin k'monjtze' kyu'n, aju' saj chq'onweye' inkyk'mo'n. 41Alkyete ntk'mo'n jun t-sanjelal Dyos, naqx tu'n t-sanjelal Dyos, ktzajel q'o'n jun oyaj te ikxju' se'n kxe'l q'o'n teju' t-sanjelal Dyos; ex alkye mak'monte jun xjal tnik'alti'j ktk'moju' jun oyaj ikxju' se'nte tnik'alti'j. 42Ex alkyexku' matxi' q'onte maskye naq jun b'as a' te junju' nokslan weye', axxi'x ktzajel q'o'n tu'me'l t-xel te, chi Jesus b'aj tma'n kye t-xnaq'tzb'en.

will be added

X\