Lucas 9

1Etb'u'yi Jesus kab'lajoj t-xnaq'tzb'en, ex xitq'o'n kyipumal ex kyoklen tu'n kyex kxla'ja'n tkyaqil ch'ix tajaw il ex tu'n kq'anan kye yab'. 2Exi' tchq'o'n q'malte tqanil tkawb'il Dyos ex q'analkye yab'. 3Xitma'n kye: —Mixti'te tu'n t-xikyiq'i'ne' toj kb'eye': lalun txi' kyine' tze, ch'u'ẍ, wab'j, pwaq mo xb'alun te kych'ixpub'le'. 4Alqjaxku' mache okxa'ye', axtzun che tenkja'ye' tzmax ajkyik'e' toju' najb'il. 5Qatzun mixti'x ẍek'amliye' tojun tnam, kukyik' b'ete' ex kychtomile' quq ti'j kqane', te yek'b'il kye qa myab'a'n qe'. 6Eb'je'xtzuntz, eb'ajx kyoj kkyaqil kojb'il, intoq xikma'n tpakb'al b'a'n ex nche q'anan. 7Tb'i nimaqkawil Erodes tkyaqilju' ntoq b'aj; ex mixtoqti'x nkane toj twitz, qu'n junjun intoq kma'n qa a Xwan matxitoq jaw anq'in, 8junjuntl nkma'n qa matxitoq tzul Eliy, junjuntl ntoq kma'n qa jun kxolju' ojtxi' t-sanjelal Dyos. 9Atzunte Erodes tma: —Ayinku'ye' inq'mante tu'n tel q'i'n twi' Xwan. ¿Alkyetzun xjal lu, inxi'x yolinjtz txqan ti'xti' ti'j? chij. Qu'mtzun tajb'iltoq Erodes tu'n tok tka'yi'n Jesus. 10Tetzunj tanjtzkyi'ju' exichq'o'n, b'ajx kma'n te Jesus jni'xju' b'ajb'ent kyu'n. Exi' tiq'i'ntzuntz kjunalx, exi' tiq'i'n tojun tnam B'etzayda tb'i. 11Tetzunj kb'inte xjal, exilpe kyi'j, ex etk'am Jesus, okten q'malte tkawb'il Dyos kye ex etq'a'naju' yab'. 12Tetzunj tok qale, e'pon lq'eju' kab'lajoj xnaq'tzb'en tk'etz Jesus ex xikma'n te: —Q'manxa kye xjal tu'n kyanj ojlal ex tu'n kxi' jyol kwa kyoj kojb'il ex najb'il nqayin, mixti'xte wab'j tzalu, chechij. 13Xi'tzun tma'n Jesus kye: —Kq'onxkye' kwa, chij. Xi'tzun ktzaq'we'n te: —Naqna' jwe' wab'j ati qk'etzqe' ex kab'e' kyiẍ, o'kxtzun qa maqo'xe' lq'olte kwa kkyaqilju' xjal lu, chechij. 14Kab'lajk'al lajnaqlo (5,000) ichan. Atzunte Jesus xitma'n kye t-xnaq'tzb'en: —Kmanxe' tu'n kkub' qe toj tneji'n te kab'naqlajoj chaq, chij. 15Xi'tzun kb'i'n ex eb'ajkub' qe kkyaqil kyu'n. 16Jawtzun ttzyu'n Jesus jwe' wab'j exju' kab'e' kyiẍ, ex jaw ka'yin twitz kya'j, xitqani'n k'i'wb'il tib'aj, kub' taq'pu'n ex xitq'o'n kye t-xnaq'tzb'en tu'n t-xiksipa'n kye xjal. 17Eb'ajwan kye xjal ex eb'aj noj, ex jaw kyb'u'yi'ntlju' min b'aj, kab'lajoj chi'l b'ant. 18Jun q'ij intoq na'n Dyos Jesus tjunal, ex ate'toqju' t-xnaq'tzb'en tuk'i'l, xitqani'n kye: —¿Alkye qine' toj kwitz xjal? chij. 19Xi'tzun ktzaq'we'n: Ate' junjun nkma'n qa aya Xwan jawsal a', junjuntl nkma'n qa aya jun ojtxi' t-sanjelal Dyos majaw anq'in, chechij. 20—Yajtzunkye', ¿Alkye qine' toj kywitze'? chi Jesus xitqani'n kye. Xi'tzun ttzaq'we'n Luch te: —Ateju'ya Krist chq'o'n tu'n Dyos, chij. 21Atzunte Jesus xi'xi'x tab'tzi'n kye tu'n lalun txi' kyoli'n. 22Ex xitma'n kye: —Chin yajtele' nimxi'x ayine' Tk'wal Dyos ex chin elelkyik'o'ne' tijwnaq, e'kynejel pale exqe' xnaq'tzal kawb'il. Chin b'el kyb'yo'ne', tojtzun toxi'n q'ij chin jawil anq'intle', chij. 23Yajxi'tzuntl xitma'n kye kykyaqil: —Qa ati jun tajb'il tu'n tok te nxnaq'tzb'ene', lalun tb'inchaju' tajb'il, iqanktz tkurus junjun q'ij ex lpek wi'je'. 24Qu'n alkyete o'kx tajb'il tu'n tklontetib' twitz tx'otx', lay tkanb'a tchwinqlal; alkyetzunte matz'ok lpe wi'je' maskye makub'yo'n tu'npaje', kkletel. 25¿Titi' k'ajb'ela' teju' xjal qama tkanb'a tkyaqil twitz tx'otx', extzun qama tzpet mujqa matxi' toj kamik? 26Alkye makub' ch'ixwi wi'je' ex ti'ju' nyole', ex chin b'el ch'ixwiye' ti'j ajwule' toj wajwalile' ex toj tajwalil Nmane' kyuk'i'lju' tanjl. 27Axxi'x kxe'l nma'ne' kyeye', ate' junjun xjal ate' tzalu k'okyel kyka'yi'n tkawb'il Dyos na'mxtoq kykyim. 28Tb'ajlenxi' wajxaq q'ij tb'ajlen tma'n Jesus ja'lu, jawx Jesus na'l Dyos twi' jun witz, lepchqe'k Luch, Santyay ex Xwan ti'j. 29Intoqtzun na'n Dyos, ch'ixpuju' ka'yin, ex b'entju' t-xb'alun saqxi'x ex nqoptz'aj; 30ex kub' kyek'u'n kyib' kab'e' ichan nche yolin tuk'i'l. Aye'toq Moyses ex Eliy, 31intoq qoptz'aj jun spik'un tb'anilxi'x kyi'jile ex ntoq che yolin ti'ju' tik'el Jesus twitz tx'otx', qa Jerusalen kkyimela'. 32Maskye atitoq txqankye Luch kywatl, min ektan, kyilju' tajwalil Jesus exqe' kab'e' ichan ate'toq tk'etz. 33Tetzunj xi'toq tel kypa'n kyib'ju' ichan tk'etz Jesus, xitma'n Luch te Jesus: —Xnaq'tzal, ¡b'a'nte' tu'n qten tzalu! Che jawil qb'incha'ne' oxe' pach: jun teya, juntl te Moyses ex juntl te Eliy, chij. Naqtzun eltma'nte' Luch, mixtoqti' nkane toj twitz titi' nxitma'n. 34Intoqtzun yolin, o'kx tkub' jupe' muj kyib'aj, ex eb'ajxob' tkub' jupe' muj kyib'aj. 35Tzajtzun jun tq'ojq'ojel wi'yj toju' muj, tma: Ate Nk'walju'ye' lu, sk'o'n wu'ne': kyb'inku'ye' tyol, chij. 36Tetzunj kyb'i'nte tq'ojq'ojel wi'yj lu, kyejten Jesus tjunal. Aye'tzunkye kub' kyewa'nju' lu ex mix-a'lo'qe xa'kyma'na'ju' kyil lu. 37Tetzun juntl q'ij tej kku'tz twi' witz, nim xjal eb'je'tz k'lulte Jesus. 38Atzun jun ichan kxolju' xjal jawtma'n kuw kjalu: —Xnaq'tzal, b'inchama xtalb'il, ka'yink pech'i'na nk'wale', qu'n o'kxku' jun nk'walju'ye'; 39intzyet tu'n jun tajaw il, njaw ẍch'in ex nkub' tz'aq, ex nb'je'tz woqot toj ttzi tu'n. Nb'aj tyaju'n ex min nkyaj ttzaqpi'n. 40Matxi' chin kub'sane' kywitzju' t-xnaq'tzb'ena tu'n tex kyxla'ja'n tajaw il lu, ex min nb'ent tex kyu'n, chij. 41Xi'tzun ttzaq'we'n Jesus te: —¡Xjal mixti' kyokslab'le' ex myab'a'n qe'ye'! ¿Ma kukxtzun weju'ye' nten kyuk'i'le' tu'n tik'x wu'ne' kyxole'? Q'intza tk'wala tzalu, chij. 42Tetzunj xi'toq tul lq'eju' q'a, kub' xon twitz tx'otx' tu'n tajaw il ex tzaj tq'o'n juntl tak ti'j; atzunte Jesus xi'tmyo'n tajaw il, q'anetju' ku'xun tu'n ex xitq'o'n teju' tman. 43Kykyaqilju' xjal e'jaw lab'ti tu'nju' nimxi'x toklen Dyos. Intoqtzun che lab'ti kykyaqil ti'ju' ntoq tb'incha'n Jesus, xitma'n Jesus kye t-xnaq'tzb'en: 44—Kyb'intzpeye' kxe'l nma'ne' kyeye' ex lalun tzik'tna'l kyu'ne': chin xel q'o'ne' ayine' Tk'wal Dyos toj kyq'ob' xjal, chij. 45Aye'tzunkye min kane toj kywitz, na'mxtoqna' tjqet kynab'l tu'n tkane toj kywitz; expe' ntoq che xob' tu'n t-xi'kyqani'n teku' Jesus tu'n txi' tchik'b'a'n kye. 46E'aq'witzun xnaq'tzb'entz wuljel alkyetoqju' nimxi'x toklen kxol. 47Tetzunj teltnik' Jesus ti'ju' ntoq kyxima'n, tzaj ttxko'n jun k'wal, kub' tq'o'n tk'etz 48ex xitma'n kye: —Alkye mak'monteju' k'wal lu toj nb'iye', ayine' nchin tk'mo'n; ex aju' ma k'mon weye', ex intk'mo'nju' saj chq'onweye'. Qu'mtzun aju' mixti'x toklen kyxole', atzunte nimxi'x toklenju', chi Jesus. 49Xitma'n Xwan te kjalu: —Xnaq'tzal, ati jun xjal xqile' ntoq che ex t-xla'ja'n tajaw il toj kyanmi xjal toj tb'iya; ma'tzun txi' qmyo'ne' qu'n min nb'et quk'i'l, chij. 50Xi'tzun ttzaq'we'n Jesus te: —Lalun txi'kymyo'ne', qu'n ate' min nq'ojin qi'j, quk'i'lte', chij. 51Tetzunj xi'toq tulkanun tu'n txi' Jesus toj kya'j, twab'a' tib' tu'n txi' Jerusalen. 52Exi' tnejb'a'n sanjelal tu'n kyxi' jyolte jatu'n tkyaja' wtan tojun kojb'il toj Samarya; 53aye'tzu'n aj Samarya mixti'x kyk'am, qu'n elkynik' ti'j qa xi'toq txi' Jerusalen. 54Tetzunj kyka'yinte t-xnaq'tzb'en, aye' Santyay ex Xwan, xikyma'n te Jesus: —Taye, ¿Ma tajb'ila tu'n txiqma'ne' tu'n tku'tz q'aq' toj kya'j, tu'n kyb'aj tz'e'y tu'n? chechij. 55Anjtzun miltz'uj twitz Jesus kyi'j ex eb'aj ttzak'u'n: —Min kanlikye' kywitz ja ntzaja' kyxime' lu, chij. 56Qu'n min ẍinulwe' b'yolkye xjal, ayine' Tk'wal Dyos, klol kye ẍinula'we', chij. Exi'tzuntz tojuntl kojb'il. 57Ljo'ntoqtzun kyb'e, xitma'n jun ichan te Jesus: —Taye, wajb'ilwe' tu'n nxilpe ti'ja jaxjaku' matxa'ya, chij. 58Xi'tzun ttzaq'we'n Jesus te: —Ati kye chuẍ kyjul ex ati kye pich' kyja; ayintzunwe' Tk'wal Dyos qine', mixti' jatu'n nkyaja' txaleye', chij. 59Xitma'n Jesus te juntl: —Lpetza wi'je', chij. Atzunte xittzaq'we'n: —Taye, q'ontza anb'il tu'n nmqunteye' nmane' nejtl, chij. 60Xittzaq'we'n Jesus te: —Q'onkjta kye kyimni tu'n tku'x kymqu'n kykyimni; lwix kutxi'ta ex pakb'anxa tkawb'il Dyos, chij. 61Atzun juntl xitma'n te Jesus: —Taye, wajb'ilwe' tu'n nxi' tuk'i'la, naq o'kx q'ontz anb'ila weye' nejtl tu'n nxi'ye' q'olb'elkyeju' toj njaye', chij. 62Xi'tzun ttzaq'we'n Jesus te: —Jun xjal nkjon extzun nka'yinxtl ti'jxi', lay b'ent tajb'en toj tkawb'il Dyos, chij.

will be added

X\