Lucas 7

1Tetzunj tb'aj yolin Jesus kye xjal, xi' toj Kaparnawum. 2Najlitoqtzun jun knejel xjal te q'oj aj Rom atzu', atitoq jun tmajin k'u'jla'nxi'xtoq tu'n, yab'toq ex ch'inxtoq tkyim. 3Tetzunj tb'inte nejenel tqanil ti'j Jesus, exi' tchq'o'n junjun tijwnaq aj Juda kub'sal twitz Jesus tu'n tpon q'analte tmajin. 4Epontzun tk'etz Jesus ex ekub'sanxi'x twitz kjalu: —B'a'nte' tu'n t-xitoni'na nejenel lu, 5qu'n intk'u'jla'n qtanam ex axte jaw b'inchante ja te k'u'lb'il qe, chechij. 6Xi'tzun Jesus kyuk'i'l, tetzunj kpon nqayin tk'etzju' tja, exi' tchq'o'n nejenel jte' amiw q'malte te Jesus kjalu: Taye, lalun tyajutib'a, qu'n myab'a'n qinwe' tu'n toktza toju' njaye'; 7qu'mtzun mixpeti'x ẍinxe' ayinku'ye' jyolteya. O'kxte' q'manxa tu'n tq'anetju' nmajine'. 8Qu'n ikxwe' atinqine' tjaq' kychaq'b'il nimaq kyoklen, ex ate' xjal tjaq' nchaq'b'ile'. Ajt-xinma'ne' te junkye tu'n txi', inxi'; ex ajt-xi nma'ne' te juntl tu'n ttzaj, intzaj; ex ajt-xinma'ne' te nmajine' tu'n txitb'incha'n jun ti'xti', nxitb'incha'n, chij. 9Majx kyej lab'ti Jesus tej tb'inte ja'lu, xika'yin kye xjal lepchqe'ktoq ti'j, tma: —Axxi'x b'ajxpe' tz'oka'yala'we' nim okslab'l wu'n kxol aj Israel kse'nte ichan lu, chij. 10Tetzunj tanjkyi'ju' exi' tchq'o'n nejenel tuja matxitoq q'anette' majin. 11Yajxi'tzuntl xi' Jesus tojun tnam Nayin tb'i. Lepchqe'ktoq t-xnaq'tzb'en ti'j kyuk'i'l txqan xjal. 12Tetzunj tpon nqayin tk'etzju' tnam, til xi'toq kxi' xjal mqulte jun kyimni, o'kxku'toq tal jun qya kyimni tchmil. Nim xjal toju' tnam lepchqe'ktoq ti'j. 13Tetzunj tka'yinte Qajaw, tzaj q'aq'an tk'u'j ti'j ex xitma'n te: —Lalun tz'oq'a, chij. 14Xilq'etzuntz ex okttzyu'n iq'b'ilte kyimni, e'kub'tzun we'ju' q'ilte kyimni. Xitma'n Jesus teju' kyimni: —Kxe'l nma'ne' teya q'a, ¡We'k'tza! chij. 15Jawtzun we'ju' matxitoq kyim ex aq'wi yolil, xi'tzun q'o'n tu'n Jesus teju' ttxu. 16Tetzunj kka'yinte xjal ja'lu, kkyaqil tzaj xob'el kyi'j ex e'aq'wi ajwalilte tb'i Dyos, kma: —Jun t-sanjelal Dyoste' nim toklen matxi' tzul qxol, chechij. Ex intoq kyma'n: —Matxi' tzul Qman Dyos onilteju' ttanam. 17Ex kub' puqli tyoljiju' matxitoq tb'incha Jesus toj tkyaqil tx'otx' Juda ex kyoju' tx'otx' ti'jile. 18Tb'i Xwan tkyaqilju' ti'xti' lu, qu'n b'ajx kma'n t-xnaq'tzb'en te. E'tzajtzun ttxko'n kab'e' kyxol 19ex exi' tchq'o'n tk'etz Qajaw, qanilte te qa axxi'x atoqte ati tu'n tul mujqa tu'n tkub' kyo'n juntl. 20Epontzun lq'eju' chq'o'nqe'toq tu'n Xwan tk'etz Jesus ex xikma'n te: —Maqotzaj chq'o'ne' tu'n Xwan Jawsal a' qanilte teya qa aju'ya ati tulel, mujqa ati tu'n tkub' qyo'n juntle', chechij. 21Textzu'n kmuj lu etq'a'na' Jesus nim xjal te yab'il ex te yajb'ilkye, ex kye tajaw il, ex jqet kwitz txqan moẍ tu'n. 22Xittzaq'we'ntzuntz kye: —Kutanj kyi'je' ex kmanxe' te Xwan aju' matxi' kyile' ex matxi' kb'iye'. Kmanxe te qa njqet kywitzju' moẍ, nche b'etju' kox, nche ẍtilsetju' ati xlemtx'a'k kyi'j, njqet kẍkyinju' t-ẍkyinqe', nche jaw anq'intlju' kyimni ex nxiq'metju' tpakb'al b'a'n kyeju' prow. 23¡K'i'wla'nxi'xte' q'uqli tk'u'j kukxju' wi'je'! chi Jesus. 24Tetzunj tanjkyi'ju' e'tzaj tchq'o'n Xwan, aq'wi Jesus q'malte kye xjal ti'ju' Xwan, tma: ¿Titi'kye' eb'je'x ka'yilte toj chq'ajlaj? ¿ma jun ajlaj nxyijunjtz tu'n kyq'iq'? 25Qatzun mya, ¿Ti'tzu'n eb'je'tze' ka'yilte? ¿mo ikse'n jun ichan tb'anil xb'alun ti'j tok? Kanli kywitze' aye'kye' tb'anil kyxb'alun tok ex inxi'x che achin, toj kyja nimaqkawil ta'qe'. 26¿Ti'tzu'n eb'je'tz tzuntze' ka'yilte? ¿Jun t-sanjel Dyos? Ikxi'xju', expe' nimxi'x toklen twitz t-sanjel Dyos. 27Ti'j te Xwanju' nyolina' toj tu'jil kjalu: Matxi' nnejb'a'ne' nsanjelale' twitza, tu'n tb'inchanteju' tb'eya, chij. 28Kxe'l nma'ne' kyeye', qa mixa'lo'xi' juntl kxol kkyaqil nimxi'xwit toklen kyetwitz Xwan; atzunte' naq ch'i'nxi'x toklen toj tkawb'il Dyos nimxi'x toklen kyetwitz Xwan. 29Kkyaqilju' eb'inte Xwan, exqepe' peyul chojb'il te Rom, b'jaw a' kwi' tu'n, ikytzu'n japunju' tajb'il Dyos kyu'n; 30aye'tzu'n parisey exqe' xnaq'tzal kawb'il elkik'o'nju' tb'is tk'u'j Dyos kyi'j, min kyaj tu'n tjaw a' kwi' tu'n Xwan. 31¿Se'nqetzunju' xjal toju' tq'ijlalil ja'lo? ¿Se'n kyu'me'l? 32Ikqe' se'nqe' k'wal nche kub' qe ẍchal jate'qe' nim xjal ex nxikyẍch'in kye kyuk'i'l kjalu: Ochinb'ane', aye'tzunkye' mixti'x eb'ixane'; ob'itzan b'itze' te b'is, ex mixti'x e'oq'e', chechij. 33Qu'n ulju' Xwan jawsal a', min nwan wab'j ex min nk'wan b'in, kmaye' qa tajaw il ati toj. 34Ex ma chinule' ayine' Tk'wal Dyos, nchin wane' ex nchin k'wane', ex nkma'ne' qa ya'l chin wane' ex ya'l chin k'wane', wamiw wib'e' kyuk'i'l xjal aj il ex kyuk'i'l peyul chojb'il te Rom. 35Atzunte' tnab'l Dyos nq'ancha'lin tu'nju' ntb'incha'n. 36Txokli Jesus tu'n jun parisey wal, ex xi' Jesus tja. Q'uqlitoqtzun ti'j mes. 37Atitoq jun qya, aj il, najlitoq tojxju' tnam lu, tb'i qa matxitoq pon Jesus wal tjaju' parisey, pon q'i'ntoq jun lmet tu'n, nojni tu'n k'ok'sb'il. 38Intoq oq', pon lq'e t-xe tqan Jesus ex eb'aj ak' tqan Jesus tu'n ta'l twitz, oktentzuntz tzqijsalkye tu'n t-xya'mal twi', b'aj tma'tzi'n ex oktq'o'n k'ok'sb'il kyi'j. 39Tetzunj tka'yinte parisey ja'lu, aju' txkonte Jesus, kub' t-xima'n kjalu: Naqwit t-sanjelalxi'x Dyosju' ichan lu, ma'wtlo tz'el tnik' ti'j se'nju' xjal nok mkonte, chij. 40Xi'tzun tma'n Jesus teju' parisey: —Simon, ati jun nyole' teya, chij. Xi'tzun ttzaq'we'n parisey te: —Q'mantza Xnaq'tzal, chij. 41Xi'tzun tma'n Jesus te: —Ate' kab'e' xjal ati kk'as te jun q'ol pwaq ch'ex. Aju' jun junk'al jo'naq (500) pwaq tk'as, atzu'n juntl kab'naqlajoj (50); 42mixtoqtzunti'x nb'ant tchjet kyu'n, kub' najsa'n kyk'as tu'nju' q'onte kych'ex kkab'il. Q'mantz tzuna ja'lo, ¿Alkyetzulo ktk'u'jla'xi'xtl kxol? chij. 43Xi'tzun ttzaq'we'n Simon: —Qapelo aju' xjal nimxi'x tk'as kub' tnajsa'n, chij. Xi'tzun tma'n Jesus te: Tu'me'l tu'na, chij. 44Xi'tzun ka'yin Jesus ti'ju' qya, ex xitma'n te Simon kjalu: —¿Ma ntka'yi'na qya lu? Machin oktze' toj tjaya ex min saj tq'o'na a' tx'ajb'ilkye nqane'; atzunte' qya lu macheb'aj ttxjo'n nqane' tu'n ta'l twitz ex mab'aj t-sun tu'n t-xya'mal twi'. 45Min ẍintzaj tq'olb'e'na tu'n jun ma'tz, atzunte' qya lu, atxi'x woktzlene' tuja, kukx kyok tma'tzi'n nqanju'ye'. 46Ex min xjax tq'o'na k'ok'sb'il toj nwi'ye', atzunte' qya lu matz'ok tq'o'n k'ok'sb'il kyi'ju' nqane'. 47Qu'mtzun kxe'l nma'ne' teya, matxi' che najsetju' txqan til, qu'n ma'xi'x tyek'u' tk'u'jlalil; atzunte' xjal naqch'i'n til xkub'najset, naqch'i'n tk'u'jlalil ntyek'u'n. 48Xitma'ntzuntz teju' qya: —Matxi' che kub'najsetju' tila, chij. 49Aye'tzun txqantl txokyenj ate'toq atzu', e'aq'wi xjelul kxolx kjalu: —¿Alkyetzu'n xjal lu, inpe' che kub' tnajsa'nju' il? chechij. 50Atzunte Jesus xitma'ntl teju' qya: —Matxi' kleta tu'nju' tokslab'la wi'je'; kutanja toj tzalajb'il, chij.

will be added

X\