Lucas 4

1Nojnitoq Jesus tu'n Xewb'aj Xjan, anjtz ttzi nin a' Jordan, ex xiq'i'n tu'n Xewb'aj toj chq'ajlaj. 2Ten kab'naq q'ij atzu', ex ok toj joyb'ilti'j tu'n tajaw il. Mixti'x wan toju' tq'ijlalil lu, tzajtzun we'yaj ti'j. 3Xi'tzun tma'n tajaw il te: —Qa tk'wal Dyos xi'xa, q'manxa kye ab'j lu tu'n kjaw b'ent te wab'j, chij. 4Xi'tzun ttzaq'we'n Jesus te: —Intma'nte' toj Tu'jil kjalu: Myanaq o'kx tu'n wab'j k'anq'ila'te xjal, chij. 5Xi'tzun q'i'n Jesus tu'n tajaw il, ex tojun kmujx eb'ajxtyek'u'n kkyaqilju' tnam twitz tx'otx' te Jesus, 6xitma'n te: —Kxe'l nq'o'ne' tkyaqil kyipumal ex kyoklenju' tnam lu teya. Qu'n tzajni q'o'n weye', ex kxe'l nq'o'ne' ja wajb'ila'ye' tu'n txinq'o'ne'. 7Tkyaqil kxe'l nq'o'ne' teya qama kub' mejeya exqa mak'uluna weye', chij te Jesus. 8Xittzaq'we'n Jesus te kjalu: —Intma'nte' toj Tu'jil kjalu: K'uluna teku' Dyos Manb'aj janajb'ena'ya, ex o'kxtzu' tz'ajb'ena'ya te, chij. 9Xiq'i'ntzuntz toju' nintnam Jerusalen tu'n tajaw il, jaxtiq'i'n tib'aj tja Dyos janajchaqxi'x tokxa', ex xitma'n te: —Qa axxi'x Tk'wal Dyosa, xonku'x tib'a tzalu; 10qu'n ina' tma'n toj Tu'jil kjalu: Che tzajel tchq'o'nte Dyos tanjl tu'n txi' ka'yi'na ex tu'n tklonjtza kyu'n. 11Kjawil tzyu'na kyu'n, tu'n lalun tokpaj tqana ti'j jun ab'j, chij. 12Xittzaq'we'n Jesus te kjalu: —Ex intma'n toj Tu'jil: lalun tz'ok tq'o'na Dyos Manb'aj janajb'ena'ya toj joyb'ilti'j, chij. 13Tetzunj min knet juntl tu'me'l tu'n tajaw il tu'n tkub' tz'aq Jesus tu'n, eltpa'n jte' q'ij tib' ti'j. 14Anjtzun ti'j Jesus Kaliley, nojni tu'n Xewb'aj Xjan, ex intoq q'manjtz tqanil ti'j toj tkyaqilju' tx'otx' ti'jile. 15Intoq q'on xnaq'tzb'il kyoj ja te k'u'lb'il jachaq npona', ex kkyaqil xjal nche lab'ti ti'j. 16Pon Jesus toju' tnam Nasaret jach'iya'. Okx toju' ja te k'u'lb'il toj q'ij te ojlab'l, kse'nxtoq ntb'incha'n, ex jawe' ẍch'ilte Tu'jil tyol Dyos. 17Xiq'o'n anb'il te tu'n tjaw t-ẍch'i'n toju' tuj Isayiy t-sanjelal Dyos, ex tej t-xitjqo'n, knet tu'n ja ntma'na' kjalu: 18Atiju' Xewb'aj te Qman Dyos wib'aje', tu'nju' machin t-xjansaye' tu'n txinma'ne' tpakb'al b'a'n kyeju' prow; machin tzaj tchq'o'ne' q'malte tqanil tzaqpib'l kyeju' jpu'nqe' jqolte kwitzju' moẍqe'; ex tzaqpil kyeju' jtz'o'nqe'. 19tu'n t-xinpakb'a'ne' tq'ijlalil xtalb'il tzul tu'n Dyos, chij. 20Kub'tzun tjpu'n Jesus u'j, xitq'o'n teju' nonin toju' ja te k'u'lb'il, ex kub' qe. Kkyaqilu' ate'toq intoq che ka'yink ti'j Jesus. 21Aq'witzuntz q'malte kye kjalu: —Matxi' japunju' xkb'iye' ja'lo toj tyol Dyos, chij. 22Kkyaqil intoq che yolin b'a'n ti'j Jesus ex intoq che lab'ti kyi'ju' ti'xti' tb'anilxi'x ntoq che tma'n. Intoq che xjelun kxolx kjalu: —¿Ma myatzun tk'wal Jse ja'lu? chechij. 23Xittzaq'we'n Jesus kye kjalu: —Okpetzunlo ktzajel kma'ne' yol weye' kjalu: Q'anal, q'anam tib'a tib'xtib'a. Expelo ktzajel kyma'ne': B'inchamtzuna tzalu tojx ttanama, kse'nx oje qb'iye' b'aj tb'incha'na toj tnam Kaparnawum, chechiloye', chij. 24Ex xitljo'n tmante kjalu: —Axxi'x kxe'l nma'ne' kyeye', mixti' jun t-sanjelal Dyos b'a'nwt nk'monjtza' tojx ttanam. 25Axxi'x nimtoq te qya kyimni kychmil kyxol aj Israel tej tten Eliy t-sanjelal Dyos, tej min kub' jb'al toj oxe' ab'q'i tk'i' nik'jan, ex tzaj nin we'yaj toj tkyaqilju' tx'otx'; 26extzun min xichq'o'n Eliy tja junju' qya kyimni kychmil kyxol aj Israel, xi' xa' chq'o'na' tja jun qya kyimni tchmil aj Sarepta, nqayin tk'etz nintnam Sidon. 27Ex ikx nimtoq xjal yab'qe' tu'n xlemtx'a'k kxol aj Israel tej tten Elisey t-sanjelal Dyos, extzun mix-a'lo' junkye q'anet, ate Naaman aj Sirya q'anet, chi Jesus. 28Kkyaqiltzu'n ate'toq toju' ja te k'u'lb'il, tzaj ktx'u'jil b'a'nxi'x tej kyb'inte ja'lu. 29Eb'jawe'tzuntz, exkyiq'i'n Jesus ti'jxi' tnam, xikyiq'i'n twi' xaq jatokxa'toqju' tnam tu'n tex kxon. 30Atzunte Jesus elb'et kxol, xi'tzuntz. 31Xi' Jesus Kaparnawum, jun tnam toj Kaliley, intoq q'on xnaq'tzb'il kye xjal kyoju' q'ij te ojlab'l. 32Intoq che lab'ti xjal ti'j tu'nju' xnaq'tzb'il ntoq tq'o'n, qu'n intoq yolin kye tuk'i'l oklenj. 33Atitoq jun ichan tzyu'n tu'n tajaw il toju' ja te k'u'lb'il, jawẍch'in kuw: 34—¡Qo tenku' qeju'ye'! ¿Tiqu'n saja'ya yekulqeye', Jesus aj Nasaret? ¿Mamatzaja b'yolqeye'? Wojtzqi'n na'ta, ex b'i'n wu'ne' aya Xjan te Dyos, chij. 35Xi'tzun ttzaq'we'n Jesus teju' tajaw il lu, kjalu: —¡Kuttziya ex tzaqpinkja ichan lu! chij. Kub'tzun xonju' ichan twitz tx'otx' tu'n tajaw il kwitz kkyaqil, kyej ttzaqpi'ntzuntz, mixti'te k'ixb'j tu'n. 36Kkyaqil xjal eb'ajxob' ex ntoq kma'n kyxolilex: —¿Se'ntzulo ttenju' yol lu? Nche ex tchq'o'n ichan lu tajaw il tuk'i'l ipumalj ex oklenj, ¡ex nche ex! chechij. 37Ex kub' puqli tyolji Jesus toj tkyaqilju' tx'otx'. 38Tej tetz Jesus toju' ja te k'u'lb'il, xi' tja Simon. Yab'toqju' qya, tji Simon tu'n nim kyaq, ex ekub'san te Jesus ti'j. 39Kub' tzipe Jesus ex xitmyo'nju' kyaq, ex elju' kyeqti'j. Jawe'tzuntz ex aq'wi b'inchalte kwa. 40Tetzunj tex q'ij, kkyaqilju' ati kyab' te chukchaq yab'il eb'aj tzaj kyiq'i'n tk'etz Jesus; kub'tzun tq'o'n tq'ob' kyib'aj te junjunal, ex eq'anet tu'n. 41Ex nim yab' e'kyaj tzaqpi'n tu'n tajaw il, intoq jawkma'n kuw: —¡Aya Tk'wal Dyos! chechij. Atzunte Jesus intoq che'x tmyo'n tajaw il ex mintjo'n tu'n kyolin, qu'n ojtzqi'ntoq kyu'n qa a Krist. 42Tetzunj qsqix, ex Jesus ti'jxi' nintnam tojun tenb'el tjunalx. Aye'tzu'n xjal ejyon ti'j, ex e'pon tk'etz ja ta'toq. Intoq kub' kmyo'n tu'n lalun txi', 43atzunte Jesus ntoq xitma'n kye: —Ex ikx ati tu'n t-xinpakb'a'ne' tpakb'al b'a'n kye txqantl tnam, qu'n a ẍintzaja' chq'o'nju'ye', chij. 44Iktzu'n intoq xi' Jesus q'malteju' tpakb'al b'a'n kyoj ja te k'u'lb'il toju' ktx'otx' aj Juda.

will be added

X\