Lucas 24

1Tojtzun tnejel q'ij te sman exi'tl ttziju' muqb'il b'a'n prim, xikyiq'i'n k'ok'sb'il nab'e'ntl kyu'n. 2Tetzunj kypon, mixtoq ti'tlte' ab'j tjpelju' muqb'il jakyeja' q'o'n; 3Eokxtzuntz toj, ex mixti'toqte' t-xmilal Qajaw Jesus. 4Majxtzun eku' tzpetl tu'n tpaj, naqtzun mikynab'en tej tok ka'yi'n kab'e' ichan wa'lqe' kyk'etz, tok kyxb'alun inxi'x che qoptz'aj. 5Tu'ntzu'n kyxob'el, eb'ajkub' meje majx ku'pun kyplaj twitz tx'otx'; aye'tzunkye' ichan kyma kye: —¿Tiqu'n nkyjyo'na'ye' itz' kyxol kyimni? 6Mixti'te' tzalu, matxi' jaw anq'intlte'. Kyna'ntze' xitma'n kyeye' tej atixtoq Kaliley: 7qa atoq Tk'wal Dyos atitoq tu'n txiq'o'n toj kyq'ob' aj il, qa oktoq kjawil q'o'n twitz krus exqa kjawiltoq anq'in toj toxi'n q'ij, chechi anjl. 8B'ajtzajtzun kyna'n tyol Jesus, 9tetzunj tanjtzkyi'j ttzi muqb'il, xikyma'n kyeju' junlajoj (11) chq'o'nqe' ex kye txqantl. 10Aye' Mariy aj Makdala, Xwana, Mariy ttxu Santyay exqe' txqantl qya e'pon q'inte tqanil. 11Aye'tzun chq'o'nqe' min xikyoksla'n, qu'n kma qa naqtoq nok toj kywitz. 12Atzunte Luch xi' ojqel ttzi muqb'il; tetzunj tka'yinte tojxi', oqe'kxtoqkye' xb'alun ate'. Anjtzun ti'jtz tuja, inxi'xtoq lab'ti ti'ju' b'aj. 13Ax q'ij ja'lu xi'toq kyxi' kab'e' xnaq'tzb'en tojun tnam Emaus tb'i, ch'inxmi oxe' ajlab' ta' tk'etz Jerusalen. 14Intoq che b'et-xi' nche yolin ti'j tkyaqilju' matxitoq b'aj. 15Intoq che yolin ex nche wulj, pon lq'e Jesus kyk'etz ex xib'et kyuk'i'l. 16Maskyetoq nok kyka'yi'n, atitoq maqb'il ti'j kywitz tu'n lalun tz'el kynik' te alkyetoq. 17Xitqani'n Jesus kye: —¿Ti'tzun nkyoli'ne' toj b'e? chij. Ekub'tzun we' intoq che b'isun, 18atzun junkye, Kleopas tb'i, xittzaq'we'n kjalu: —¿Ma o'kxku'loya xten toj Jerusalen min b'i'n tu'na titi' matxi' b'aj kyoju' q'ij lu? chij. 19Xi'tzun tqani'n kye: —¿Ti'tzun xb'aj? chij. Xikyma'ntzuntz te kjalu: —Aju' xb'aj ti'j Jesus aj Nasaret, juntoq t-sanjelal Dyos nimtipumal tu'n kyb'ant ti'xti' tu'n ex tu'n tyolin twitz Dyos ex kywitz tkyaqilju' tnam; 20extzun makyej b'entti'j kyu'n kynejel pale ex kyu'n tzyul kawb'il qxol tu'n tkub' b'yet ex majaw kyq'o'n twitz krus. 21Q'uqlitoq qqk'u'je' qa atoq ktzaqpilteju' nintnam Israel. Matxitzun b'aj oxe' q'ij tb'ajlen ja'lu. 22Ma'pe' qo sak'punjtze' kyu'n junjun qya ate' qxole', ext'anj ttzi jul b'a'n prim, 23mixtzunti' xkyitlju' t-xmilal, matza'njkyi'j kyja. Ex nkyma'n qama kub' kyek'u'n kyib' junjun anjl kywitz ex matzaj kyma'n kye qa itz' Jesus. 24Ext'anjtzun junjun quk'i'le' yajxi'tl ttzi jul ex ikx xkyilju' se'n matxitoq kymaju' qya, atzunte' Jesus mixti'toq, chechij te Jesus. 25Xitzun tma'n Jesus kye: —¡Mixti'xpelo nkane toj kywitze' ex yajxi'x nxikyoksla'ne' kymaju' t-sanjelal Dyos! 26¿Ma myatzun ilti'j tu'n tyajtiju' Krist kyoju' ti'xti' lu na'mtoq tjaw ajwali'n? chij. 27Oktentzuntz chik'b'alte tkyaqil jatz'ib'ana' ti'j, tzyet-x kyoj tuj Moyses ex kyojile kyuj t-sanjelal Dyos. 28Tetzunj kypon toju' tnam ja exa', tb'incha Jesus ku'wtloj xi't-xi' najchaq ch'i'ntl. 29Aye'tzunkye tej kka'yinte ljontoq tb'e Jesus xikyma'n te: —Kutkyeja qk'etze', qu'n matxi' qo'qex. Xi' qok yupj, chechij. Kyejxtzun Jesus kyuk'i'l. 30Tetzunj q'uqliqe'toq ti'j mes, jaw ttzyu'n wab'j, ex tej txitq'o'n chjonte te Dyos, kub' taq'pu'n ex xitq'o'n kye. 31Atzun kmuju' tjqet kywitz ex elkynik' ti'j Jesus; atzunte Jesus kub'naj kywitz. 32Kymatzuntz kyxolx: —¡Qu'npena'tzunlo majxtoq nqna'n jun tzalajb'il toj qanmi tej ntoq yolin qe toj b'e ex intoq tzaj tchik'b'a'nju' ntma'n toj Tu'jil! chechij. 33Lwiyxi'xtzun anjtlkyi'j Jerusalen, b'u'yi'ntoq kyib'ju' junlajoj (11) chq'o'nqe' kyuk'i'lju' kyuk'i'l tej kypon, 34ex kyma kye: —Axxi'x matxi' jaw anq'intlte Qajaw, makub' tyek'u'ntib' twitz Simon, chechij. 35Xi'tzun kytx'olb'a'nju' b'ajkye toj b'e kykab'il, ex se'n ela' kynik' te Jesus tej tkub' taq'pu'n wab'j. 36Inxtoqtzun che yolin ti'ju' lu, tej tkub' tyek'u'ntib' Jesus kyxol ex exitq'olb'e'n, tma: —Che tenxwite' toj nak'b'il, chij. 37Majx eb'ajxob', toj kynab'l qa jun xewb'aj nkyka'yi'n. 38Atzunte Jesus xitma'n kye: —¿Tiqu'n nche xob'a'ye'? ¿Tiqu'ntzun atiya' jawje'n toj kyanmiye'? 39Kyka'yinqe'tze' nqane' ex nq'ob'e'. Ayinxweju'ye'. Chin kymkonke' ex chin kyka'yinke': mixti'te jun xewb'aj tchib'jil ex tb'aqil, kse'nwe' nchin ok kyka'yi'ne' lu, chij. 40Tej tb'aj tma'n ja'lu, eb'ajxtyek'u'n tq'ob' exqe' tqan. 41Aye'tzunkye mixtoqti' nb'ent txi' kyoksla'n tu'nju' ntoq che tzalaj ex nche xob', xitqani'n Jesus kye: —¿Ma ati ch'i'n qwa tzalu? chij. 42Xi'tzun kyq'o'n jun piẍ kyiẍ k'a'si'n te, 43Xittzyu'n ex xitwan kywitzku'. 44Ex xitma'n kye: —Ate matxi' b'aju' wi'je' aju' oje txinma'ne' kyeye' tej atinqinx toqe' kyxole': atitoq tu'n tjapun tkyaqilju' tz'ib'a'n wi'je' toj tkawb'il Moyses, kyoju' kyuj t-sanjelal Dyos ex kyoju' b'itz. 45Tb'inchatzuntz tu'n telkynik' ti'ju' ntma'n toj Tu'jil, 46ex xitma'n kye: —Tz'ib'a'nte' toj Tu'jil qa atitoq tu'n tkyim Krist, ex tu'n tjaw anq'in toj toxi'n q'ij, 47ex toj tb'i kxela' q'ma'n tqanil kyoj kykyaqil nimaqtnam tu'n tanjtzti'j kyanmi xjal, tu'n tkub' tnajsa'n Dyos kyil. Ktzyetelx toj Jerusalen, 48ati tu'n tb'ajx kytziya'ne' lu. 49Ex ktzajel nq'o'ne' ttziya' Nmane' kyib'aje'. Che tenkj tzunkye' tzalu toju' nintnam Jerusalen, tzmaxi'j ajkyk'monteye' ipumalj tzul te toj kya'j, chi Jesus kye. 50Exi'tzun tiq'i'n Jesus t-xnaq'tzb'en ti'jxi' nintnam, tzmax kpon B'etanya, ejawtzun tiq'i'n Jesus tq'ob' twitz kya'j ex e'kub' tk'i'wla'n. 51Tetzunj intoq che tk'i'wla'n, o'kx tel lq'e kyk'etz ex xiq'i'n toj kya'j. 52Kyb'ajlenxi'tzun k'ulun te, anjkyi'j toj Jerusalen inxi'xtoq che tzalaj. 53Ex jachq'altoq ate' toj tja Dyos, intoq jawkyajwali'n Qman Dyos.

will be added

X\