Lucas 23

1Eb'jawe'tzuntz kykyaqil ex xikyiq'i'n Jesus twitz Pilat. 2Okx kyb'ajsa'ntzuntz twitzku', kyma: —Matz'elyalju' ichan lu qu'ne' tok xitulteju' ninqtaname'. Intma'n tu'n lalun qo q'on chojb'ile' te ninimaqkawil, expe' intma'n qa ate Krist, Nimaqkawil, chechij. 3Xi'tzun t-xjelu'n Pilat te Jesus: —¿Ma aya Nimaqkawil kye aj Juda? chij. —Axa inq'mante qa ayine', chi Jesus te. 4Xi'tzun tma'n Pilat kye kynejel pale ex kyeju' xjal kjalu: —Mixti' nelyal tilju' xjal lu wu'ne' tu'n tkub' tz'e'yset twitz, chij. 5Aye'tzunkye eoktenxi'xtl q'malte: —Tu'nju' tok xnaq'tzalkye xjal inche jaw xitj tu'n. Tzyet tq'on xnaq'tzb'il toj Kaliley, atzu'n ja'lo ljo'nx tb'inchante tzalu toju' tx'otx' Juda, chechij. 6Tetzunj tb'inte Pilat ja'lu, xitqani'n qa aj Kalileyju' ichan lu. 7Tetzunj tb'inte qa tjaq' tkawb'il Erodes ta' Jesus, tchaq' tu'n txi' twitz Erodes, qu'n ex atitoq Erodes toj Jerusalen kyoju' q'ij lu. 8Tetzunj tka'yinte Erodes tpon q'i'n Jesus twitz, jaw tzalaj, qu'n matxitoq b'et q'ij tajb'iltoq tu'n tok tka'yi'n, matxitoqna' tb'ixi' nkyma'n xjal ti'j Jesus ex tajb'iltoq tu'n tlonte jun b'a'nq'ob'aj nche tb'incha'n Jesus. 9Xitqani'n txqan t-xjel te, atzunte Jesus mixti'xte xittzaq'we'n te. 10Ex ate'toqju' kynejel pale ex xnaq'tzal kawb'il atzu', inxi'xtoq che b'ajsan ti'j. 11El ik'o'ntzuntz tu'n Erodes ex kyu'n t-xjal te q'oj, ex okkyq'o'n jun t-xb'alun tb'anilxi'x kse'n ti'j jun nimaqkawil. Xi'tzun sma'ntl twitz Pilat tu'n Erodes. 12Kyajq'ojtoq kyib' Pilat tuk'i'l Erodes nejtl, tojtzu'n q'ij lu e'ok kamiw kyib'. 13Eb'aj tb'u'yi'n Pilat kynejel pale, exqe' tzyul kawb'il exju' tnam, 14xitma'ntzuntz kye: —Matzul kyiq'i'ne' ichan lu nwitze', nkyma'ne' qa nche jaw xitju' xjal tu'n, matxitzun tz'ok toj xjel wu'ne' kywitzku'ye' ex mixti' jun til nelyal wu'ne' kse'n nche b'ajsane' ti'j. 15Expe' min sel yal jun til tu'n Erodes, qu'mtzun matzul t-sma'ntl qe. Tz'elxtzun kynik'e' ti'j ja'lo, mixti'te jun til xtb'incha tu'nwt tkub' b'yet. 16Kb'el ntz'e'ysa'ne' twitz, kxe'l ntzaqpi'ntzuntze', chi Pilat. 17Intoqtzun etz ttzaqpi'n Pilat jun xjal toj kars toj junjun ninq'ij tu'n tkyaj b'a'n kyuk'i'lju' xjal. 18Aye'tzunkye kykyaqil eokten ẍch'ilte kjalu: —¡Chq'oma tu'n tkub'yet! ¡Ate B'arab'as tzaqpimitza! chechij. 19Okxnitoq jpu'n B'arab'as tu'n tpaj q'ojin ti'ju' nimaqtkawb'il Rom toju' nintnam ex b'yonxjal. 20Yolin jumajtl Pilat kye, qu'n tajb'iltoq tu'n tetz ttzaqpi'n Jesus; 21aye'tzunkye jaw kyẍch'i'nxi'xtl kuw: —¡Q'onktza twitz krus! ¡Q'onktza twitz krus! chechij. 22Xitma'ntl Pilat kye toxmaji'n: —¿Ti'xi'xtzu'n myab'a'n matxi' tb'incha? Mixti' junwe' til nelyal wu'n tu'nwt tkub' b'yet. Kb'el ntz'e'ysa'ne' twitz, kxe'l ntzaqpi'ntzuntze', chij. 23Aye'tzunkye okxi'x tilil kyu'n, inxi'xtoq kyqani'n tu'n tjaw twitz krus; tu'ntzu'n inxi'xtoq che ẍch'in, xi'tzaq'we'tzuntz aju' kyajb'il. 24Kub' t-xima'n Pilat tu'n tb'inchetju' kyqani; 25etz ttzaqpi'n ichan jaw kysk'o'n tu'n ttzaqpet, ju' jpu'nkxtoq tu'n tpaj q'ojin ti'j nimaqkawb'il ex b'yonxjal, ex xitq'o'n Jesus tu'n tkub' b'yet kse'n kyajb'il. 26Tej t-xikyiq'i'n Jesus tu'n tjaw twitz krus, tzaj kytzyu'n jun ichan aj Sirene Simon tb'i, tzajnixtoq toj kojb'il, ex jaw kyq'o'n krus ti'j tqul tu'n t-xitiq'i'n lepchix ti'j Jesus. 27Nim xjal ex nim qya lepchiqe'xtoq ti'j, ntoq che oq' ex ntoq che ẍch'in tu'n b'is ti'j. 28Atzunte Jesus xika'yin kye ex xitma'n kye: —Eqya aj Jerusalen, lan che oq'e' wi'je', che oq'kye' kyi'jxe' ex kyi'j kyale'. 29Qu'n tzul q'ij okkyma'ye' kjalu: B'a'nxqekye' qya min nten kyal, eqya min sitz'j jun kyal ex min xten kyal tu'n kych'isante. 30Che aq'weltzun xjaltz q'malte kye witz kjalu: ¡Kukytzaj tz'aqe' qib'aje'!, ex kye ttxa'nwitz: ¡Qokyewame'! chechiku'. 31Ma'pena' b'inchanjtz ja'lu wi'je' mixti' wile', ¿yajtzulote' kyi'je' aj Jerusalen ati kyile', jni'lo txqan kb'inchanjtzel lo kyi'je'? chi Jesus. 32Ex exikyiq'i'n kab'e'tl ichan nimaq kyil tu'n kyjaw kyq'o'n junx tuk'i'l Jesus twitz krus. 33Tetzunj kypon toju' tenb'il Kyb'aqil Kyimni tb'i, jaw kyq'o'n Jesus twitz krus exqe' kab'e' nimaq kyil, jun toj tb'a'nq'ob' Jesus atzun juntl toj tnayaj. 34Tma Jesus kjalu: Taye, najsama kyil, qu'n min b'i'n kyu'n titi' nkyb'incha'n, chij. Aye'tzu'n xjal te q'oj xikyse'n tu'n tel yal se'ntoq kxela' kyaq'pu'n t-xb'alun Jesus kyxol. 35Ate'toqju' xjal nche ka'yin atzu'; exqepe' tzyul kawb'il intoq che xmayin ti'j kjalu: —Eklet txqantl tu'n; klomtzuntib' ja'lo, qa ax a Krist chq'o'n ex sk'o'n tu'n Dyos, chechij. 36Ex intoq che xmayin xjal te q'oj ti'j Jesus. Intoq che oklq'e ex ntoq xikyq'o'n b'inayr te, 37intoq kyma'n: —¡Qa ax aya kynimaqkawil aj Juda, klom natzun tib'a! chechij. 38Ex tz'ib'a'ntoq jun yol tib'aj twi', kjalu: A Kynimaqkawil aj Juda ja'lu, chij. 39Juntzun kyxolju' nimaq kyil yo'lqe'kxtoq twitz krus, ok ilin te Jesus kjalu: —¡Klom tib'a ex qo tkloma qa aya Krist! chij. 40Atzu'n juntl xittzaq'we'n teju' tuk'i'l, tma: —¿Maminxob'a te Dyos, ex ax tz'e'ysb'il witzb'aju' ta'ya'ya? 41Tojxi'x tu'me'l nqo yajta' qe, qu'n nqchjo'nju' qb'inchb'aj; atzunte' ichan lu mixti'te jun myab'a'n xtb'incha. 42Ex tma te Jesus: —Chin tna'tza ajttzyet tkawina, chij. 43Atzunte Jesus xittzaq'we'n te kjalu: —Axxi'x ktenb'ela wuk'i'le' ja'lo toj kya'j, chij. 44Kub' qxope' twitz tx'otx' tzyet-x te wanq'ij tzmax ttzaj oxe' te qale. 45Mixti' k'entl q'ij, ex xiẍilju' xb'alun toj tja Dyos toj nky'ajchaq. 46Jawẍch'in Jesus kuw, tma: —¡Taye, toj tq'ob'a kxela' nq'o'ne' wanmiye'! chij. Tej tmante ja'lu, kyimtzuntz. 47Tetzunj tlonte chaq'ul aj Rom ju' matxitoq b'aj lu, jaw tajwali'n Dyos ex tma: —Axxi'x, mixtoqti'te' ichan lu til, chij. 48Kykyaqiltzu'n xjal ate'toq ex kyilju' b'aj, eb'jik' b'et intoq kyjuma'n ttzikyk'u'j. 49Kykyaqiltzu'n ojtzqilte Jesus ate'toq najchaqinin; exqe' qya eoklpe ti'j tzajx toj Kaliley intoq che ka'yin atzu'. 50- 51Atitoq jun ichan tnik'alti'j, Jse tb'i, aj Arimatey, jun tnam toj Juda. Ajuntoq kyxolju' K'loj Tzyul Kawb'il kyxol aj Juda. Intoq ayon Jse lu ti'j tkawb'il Dyos ex min elb'a'n tb'incha K'loj Kawb'il toj twitz, 52xi' twitz Pilat qanilte t-xmilal Jesus. 53Tku'tzlenxi'tzun tiq'i'n twitz krus, kub' tb'altz'i'n tojun tb'anil sed xb'alun ex okxtq'o'n tojun jyom b'incha'nkx toj pik, mixti'xi'toq jun kyimni tz'okx toj. 54Atoq q'iju' tu'n kyb'inchante kyib' xjal teju' q'ij te ojlab'l ch'inxtoq ttzyet. 55Exqe' qya e'tzajlpe ti'j Jesus toj Kaliley, exi' ex kyilu' jul, ex kyil se'n kyaja' q'o'n t-xmilal Jesus. 56Tetzunj tanjkyi'j tuja, b'aj kyb'incha'n chukchaq k'ok'sb'il. Eojlanju' qya toju' q'ij te ojlab'l, se'nx ntma'n chaq'b'il.

will be added

X\