Lucas 21

1Intoq ka'yin Jesus kyi'ju' q'inun nku'x kyq'o'n pwaq toju' tkb'el oyaj, 2ex til jun qya prow kyimni tchmil intoq ku'x tq'o'n kab'e' tal pwaq q'ank'uxb'il. 3Tmatzuntz: —Axxi'x kxe'l nma'ne' kyeye', aju' qya prow kyimni tchmil lu nimxi'x xkub' tq'o'n kyekywitz kykyaqil; 4kykyaqilxju' xjal nkub' kyq'o'n kyoyaj aju' min nb'aj kyu'n, atzunte' qya lu, toju' tprowil, makub' tq'o'n tkyaqilju' ati te tu'n tanq'in, chij. 5Intoq che yolin junjun ti'ju' tja Dyos, tu'nju' xa'wanqeku'xi'xju' ab'j ti'j exqe' oyaj e'pon q'o'n wiqb'ilte. Tma Jesus ti'j: 6—Tzul tq'ijlalil lay kyejten jun ab'j tib'aj juntl ab'j ti'ju' nkyka'yine' lu. Tkyaqil kb'el xitj, chij. 7Xi'tzun kyqani'n t-xnaq'tzb'en te: —Xnaq'tzal, ¿jtojtzun japun ja'lu? ¿Ti'tzun techlal qa xi'kyul kanunju' ti'xti' lu? chechij. 8Xi'tzun ttzaq'we'n Jesus kjalu: B'a'nqe'xe' naq che kub' sb'u'ne'. Qu'n che ul txqan k'okyel kyq'o'n kyib' naku'xwitloj ayine'. Okkyma': Ayine' Krist, ex Matxi' tzulkanun tq'ijlalil, chechij. Lalun che'x lpeye' kyi'j. 9Ex ajkyb'inteye' tqanil q'oj ex ch'exb'eb'l, lalun che xob'e', ati tu'n tik'te' lu nejtl; na'mxtoqtzun tjapunte' b'ajsb'il q'ij, chij. 10Xitljo'n tq'umji: Kq'ojil jun nintnam ti'j juntl ex kq'ojil tnam ti'j juntl. 11Tzul kyejnajnab' kuw, ex we'yaj ex yab'il toj chukchaq najb'il, ex che q'ancha'lixel ti'xti' xob'ajilx twitz kya'j ex nimaq techlal. 12Na'mxtoqtzun kyik' ja'lu, k'okyel kyq'ob' xjal kyi'je' ex kjyonjtzel toj kyq'ije' kyu'n. Chexe'l q'i'ne' toj xjel kyoj ja te k'u'lb'il, che okyex q'o'ne' toj kars ex che pomel q'i'ne' kywitz nimaqkawil ex kywitz kawil tu'npaje'. 13Ikytzu'n ktenb'el anb'il kyeye' tu'n kytziyane' wi'je'. 14Kyq'onku'ye' toj kyanmiye' tu'n lalun che ximanaje' nejtl titi' kxe'l kyma'ne', 15qu'n kxe'l nq'o'nwe' yol tuk'i'l nim nab'l kyeye', layx b'ent kytzaq'wet kyu'n kyajq'oje'. 16Aye'kupe' kymane', kytzike' mo kyitz'ine', kywitze'le' mo kamiwe', che xe'lq'onkyeye' toj kyq'ob' xjal. Che kb'el b'yo'n junjunkye' kyu'n, 17ex che elel ik'o'ne' kyu'n kykyaqil xjal tu'npaje'; 18laytzun kub'naj junkye' t-xya'mal kywi'. 19¡Che we'ku'ye' b'a'nxi'x, tu'n kyklete'! 20Ajkyka'yinteye' txoli'ntlti'j Jerusalen kyu'n xjal te q'oj, kanex toj kywitze' qama ponju' kmuj tu'n tkub' xitu'n. 21Lwixtzun che b'ajx oqju' ate' toj Juda kyoj nimaq k'ul; exqe' ate' toj Jerusalen, lwix che etz oq toju' nintnam, exqetzu'n ate' toj kojb'il, lalun tz'anjtz kyi'j toju' nintnam. 22Qu'n tq'ij tz'e'ysb'il witzb'ajte', tu'n kyjapun tkyaqilju' tz'ib'a'n kyoj Tu'jil. 23¡Qab'anx kywitzju' qya ch'onwi'qe' mujqa ate' kyal nche ch'u'n toju' tq'ijlalil lu! Qu'n nim k'ixk'oj tzul ex tz'e'ysb'il witzb'aj kuwxi'x ti'ju' tnam lu. 24Junjun che kb'el b'yo'n tu'n k'uẍtx'e'nb'il, aye'tzun txqantl che xe'lq'i'n toj kars kyoj kykyaqil nimaqtnam; ex kb'ajel txa'ju'n Jerusalen kyu'n xjal min nche niman te Dyos tzmax ajtjapun tq'ijlalil xiq'o'n kye. 25Che ul techlal ti'ju' q'ij, ti'ju' xjaw ex kyi'ju' che'w; ex kyupjel kyuk'i'lju' xjal twitz tx'otx' kyoju' nimaqtnam ex che b'ajel xob' tu'n tq'ojq'ojilju' ninnjab' ex ttolob' kuwxi'x. 26Majx che b'elnumju' xjal tu'n xob'el ajtkub' kyxima'nju' tzul ti'ju' twitz tx'otx'; qu'n okpe' che yukchelju' ipumalj twitz kya'j. 27Chin ka'yinjtzel tzuntze' ayine' Tk'wal Dyos ajntzaje' toju' muj tuk'i'l nim wipumale' ex wajwalile'. 28Ajttzyet kyik'ju' ti'xti' lu, kykuwsam kyk'u'je' ex kywab'anktz ti'j kywi'ye', qu'n xi' tul kanun tzaqpib'l kyeye', chi Jesus. 29Ex kub' tq'o'n yek'b'il lu kye: Kyka'yinxpe'ye' tqan iw, mujqa alkyexju' juntl tze. 30Ajkyka'yinteye' ajttzaj t-xul, inel kynik'e' qa xi' tetz jb'alil. 31Ikxtzun tu'me'lju', ajkyka'yinteye' nche ik'ju' ti'xti' lu, kaneku' toj kywitze' xi' tul kanun tkawb'il Dyos. 32Axxi'x kxe'l nma'ne' kyeye', na'mxtoq kyb'ajkyimju' xjal ate' ja'lo ajtb'jik' tkyaqil ja'lu. 33Che b'ajelkye' kya'j ex tx'otx', aye'tzunwe' nyol ilti'j che japumel. 34B'a'nqe'xe', lalun che okju' achb'il toj kyanmiye', ex tx'ujte'n ex lalun b'ajx kyk'u'je' toju' chwinqlal ja'lo, qu'n jaku' mikynab'ene' ajtulju' tq'ijlalil lu 35kse'n jun xpatxab'. Qu'n tzul kyib'aj kykyaqilju' najlqe' twitz tx'otx'. 36Kyb'incham kytene', che na'nqe' Dyose' tkyaqil kmuj, tu'ntzun ktzaqpaje' te tkyaqilju' ti'xti' che ik'el ex tu'n tb'ant kyyek'unte kyib'e' nwitze' ayine' Tk'wal Dyos, chi Jesus. 37Intoq q'on xnaq'tzb'il Jesus toju' tja Dyos te q'ijtl, atzu'n te qonik'an intoq kyejten twi' witz Olib'o tb'i. 38Ex kykyaqil xjal b'a'nprimtoq nche'x toju' tja Dyos b'ilte xnaq'tzb'il ntq'o'n Jesus.

will be added

X\