Lucas 2

1Etz jun chaq'b'il toju' tq'ijlalil lu tu'n ninimaqkawil Akust, tu'n tjaw jun kyajlal kkyaqil xjal. 2Jawju' tnejel kyajlal xjal lu tej atoq Kyirin kawil toj Sirya. 3Kkyaqil xjal atitoq tu'n kxi' tz'ib'al kyb'i tojilex ktanam. 4Qu'mtzun, etz Jse toju' tnam Nasaret, toj tx'otx' Kaliley ex xi' B'elen, toj tx'otx' Juda, ja itz'ja' nimaqkawil Dab'i, qu'n tyajajil Dab'i toqu' Jse. 5Xi' atzu' tz'ib'al tb'i, tuk'i'l Mariy ju' t-xu'jil, ch'onwi'toq. 6Tetzunj ate'toq B'elen, pon q'ij tu'n titz'ji tal Mariy. 7Atzuntzu' itz'ja' tnejel tal, kub' tb'altz'i'n toju' tan ex kub' tkuẍb'a'n toj twab'l chej, qu'n min knet jatu'n kkyeja' tojun ja. 8Ate'toqtzun jte' k'ik'lel nqayin tk'etz B'elen, intoq che xq'uqin kyrit qonik'an toj kojb'il. 9Naqx minab'en tkub' tyek'u'ntib' jun tanjl Qman Dyos kwitz, ex tzaj qoptz'aju' tajwalil Dyos kyi'jile; majxtzun eb'ajxob'. 10Tzajtzun tma'n anjl kye: Lalun che xob'e', qu'n matzaj wiq'i'ne' jun tb'anilxi'x tqanil kyeye', kkyaqil xjal che tzalajel tu'n: 11Matxi' tz'itz'ji jun klolkyeye ja'lo toju' ttanam Dab'i, aju' Krist, ju' Qajaw. 12A techelju' kyeye', kknetelju' ne'ẍ kyu'ne' b'altz'i'n toj tan ex kuẍli tojun twab'l chej, chiju' anjl. 13Textzu'n kmoj lu kub' kyek'u'n kyib' txqantl anjl eb'ajtzaj toj kya'j tk'etzju' anjl ntoq yolin, intoq jawkyajwali'n Qman Dyos kjalu: 14¡Ajwalinjtzxwit Qman Dyos te toj kya'j! ¡Tenxwit nak'b'il kyeju' xjal twitz tx'otx' sajlaq tk'u'j Dyos kyi'j! chechij. 15Tetzunj tanjkyi'ju' anjl toj kya'j, e'aq'wiju' k'ik'lel q'malte kxolilex: —Qo'qe'ye' B'elen ka'yilte xb'aj lu, aj saj tma'n Qman Dyos tqanil qe, chechij. 16Ojqeltzun kb'ajx ex knet Mariy ex Jse kyu'n, tuk'i'lju' ne'ẍ kuẍli toj twab'l chej. 17Tej klonte, e'okten q'malteju' tma anjl kye ti'ju' ne'ẍ, 18ex kkyaqilju' eb'inte eb'jaw lab'ti ti'ju' b'aj kma'n k'ik'lel. 19Majx kyej tenju' lu toj tanmi Mariy, intoq ximan ti'j. 20Anjtzun kyi'ju' k'ik'lel, intoq jawkynima'n Qman Dyos ex njaw kyajwali'n tu'n tkyaqilju' matxitoq kb'i ex matxitoq kyil, tkyaqil ikb'aju' kse'nx tzaj q'ma'n kye. 21Te wajxaq q'iju' ne'ẍ tej tokq'o'n techel ti'j tchib'jil, ex Jesus tb'i okq'o'n, axju' tb'i ojetoq tma anjl te Mariy na'mxtoq tok ch'onwi'. 22Tetzunj tjapun tq'ijlalil tu'n kẍtilsante kyib' se'nx ntma'n toj tkawb'il Moyses, xikyiq'i'n ne'ẍ Jesus Jerusalen tu'n txi'q'et te Qman Dyos. 23Kyb'incha ja'lu qu'n iktz'ib'a'n toj tkawb'il Qman Dyos kjalu: Tkyaqil tnejel k'wal q'a kxel q'et te Dyos, chij. 24Exi'tzun q'olteju' chojb'il q'ma'n toj tkawb'il Qman Dyos: kab'e' xlak'uk' mujqa kab'e' tal paloms. 25Najlitoq jun ichan Simeon tb'i toj Jerusalen toju' tq'ijlalil lu. Tnik'altoqti'j ex nniman te Dyos, intoq ayon tu'n ttzaqpetju' tnam Israel. Atitoqju' Xewb'aj Xjan tuk'i'l Simeon, 26ex ojetoq tzaj yek'u'n te qa tzmaxi' kkyimel ajxi' tlonte twitz Krist. 27Xi'tzun Simeon toj tja Dyos, atitoq Xewb'aj Xjan tuk'i'l; ex tej txiq'i'n ne'ẍ Jesus kyu'n tman, tu'n tjapunju' ntma'n toj kawb'il, 28jaw tchle'n Simeonju' ne'ẍ ex jaw tajwali'n Qman Dyos, kjalu: 29Matxi' japunju' tziya'ntl tu'na ja'lo, Nman Dyos: b'a'n tu'n nkyime' ja'lo, mixti'tl nb'ise'. 30Qu'n matxi' wile' kolb'il 31ju' matxi' tzyet tb'inchanteya kywitzku' kkyaqil tnam, 32aju' spik'un ktxaqul kye nimaqtnam ex k'okyel te tajwalilju' tnam Israel, chi Simeon. 33Majx e'jaw lab'tiju' tman ex ttxu Jesus tej t-xikb'i'nju' tma Simeon ti'ju' ne'ẍ. 34E'kub' tk'i'wla'n Simeon, ex xitma'n te Mariy ttxu Jesus kjalu: —Q'o'ntlte' k'wal lu tu'n kyjaw tz'aq mujqa tu'n kjawe' nim xjal toj Israel tu'n. K'okyel te jun techel nim xjal che elel ik'onte, 35tu'ntzun kq'ancha'lin kyxim nim xjal. Tkyaqiltzun ja'lu k'okyel kse'n jun k'uẍtx'e'nb'il teya, kk'ixb'el tanmiya tu'n, chi Simeon. 36Ex atitoq jun qya atzu' Ana tb'i t-sanjel Dyos, tmyal Penwel, kxol tnej tyajajil Aser. Tijwnaqxi'xtoq. Tzmaxtoq txin tej tmje, ex najan wuq ab'q'i tuk'i'l tchmil; 37matxitoqtzun b'ent kyajnaq kyaje' (84) ab'q'i tkyimlen tchmil, nanq'in tjunal. Majxtoq ati toj tja Dyos, intoq ajb'en te Dyos q'ijtl ex qonik'an, toj mewayi'n ex na'j Dyos. 38Ex pon Ana tojxju' kmuj lu, aq'wi q'ol chjonte te Dyos ex okten yolil ti'ju' ne'ẍ Jesus kye kkyaqilju' ntoq che ayon tu'n ttzaqpet Jerusalen. 39Tetzunj kb'inchante tkyaqilju' ntma'n toj tkawb'il Qman Dyos, anjtlkyi'j toj Kaliley, tojku' ktanam Nasaret. 40Intoq ch'iyju' k'wal ex intoq okxi'x tipumal, atixi'xtoq tnab'l ex atitoq t-xtalb'il Dyos tib'aj. 41Intoqtzun che'xju' tman Jesus tkyaqil ab'q'i Jerusalen ik'salte tq'ij Tzaqpib'l. 42Ex tej tel kab'lajoj ab'q'i Jesus, exi' kkyaqil Jerusalen, kse'nx nkb'incha'n toju' ninq'ij lu. 43Tetzunj tb'aju' ninq'ij lu, tej kb'aj anj kyja, kyejten k'wal Jesus Jerusalen, ex min kyilju' tman tej tkyej. 44Toj knab'l qa ajuntoq Jesus nb'et kyxol xjal, jun q'ij eb'et; tetzunj tb'aj kjyo'n kyxol kwitze'l ex kyxolilex ojtzqi'nqe' kyu'n, 45mixti'x knet kyu'n. Anjtzun kyi'jtz Jerusalen jyolte. 46Tb'ajlenxi'tzun oxe' q'ij tknet kyu'n toj tja Dyos, q'uqlitoq kxolju' xnaq'tzal kawb'il, intoq b'in kye ex nxjelun kye. 47Intoq che lab'ti kkyaqilju' nche b'in te tu'nju' k'atztwi' ex kyi'ju' ttzaq'web'l. 48Ejawtzun sak'puju' tman ti'j tej t-xikyka'yi'n; xi'tzun tma'n ttxu te kjalu: —Wal, ¿Tiqu'n xtb'inchaju'ya lu qeye'? Lu tmana ex ayine' nxi'x qojyone' nqob'isune' ti'ja, chij. 49Xi'tzun ttzaq'we'n Jesus kye: —¿Tiqu'n nchin kjyo'na'ye'? ¿Ma mitzun jun b'i'n kyu'ne' qa ati tu'n ntene' toj taq'un Nmane'? chij kye. 50Mixtzunti'x ekane ti'ju' xitma'n kye. 51Anjtzun ti'jtz kyuk'i'l Nasaret, axtzuntzu' anq'ina', intoq niman kye toj tkyaqil. Majxtzun e'kyajten tkyaqil ja'lu toj tanmi ttxu. 52Intoq ch'iy Jesus ex intoq tenxi'x tnab'l, ex b'a'n ela' twitz Dyos ex kwitz xjal.

will be added

X\