Lucas 15

1Kkyaqilju' peyul chojb'il te Rom exqe' aj il eb'jo'k lq'e tk'etz Jesus b'ilte tyol. 2Tu'ntzun tpaju' lu eb'jaw yolinju' xnaq'tzal kawb'il ex parisey ti'j Jesus, intoq kma'n: —K'mo'nqe' aj il tu'nte' xjal na'j ex nwan kyuk'i'l, chechij. 3Xi'tzun tma'n Jesus techlal lu kye: 4¿Alkye junkye' kxol, qa ati jo'naq trit ex matxi' tzpet jun, ma mlaytzun che kyej ttzaqpi'nju' kyajnaq b'eljlajojtl toj kojb'il, kxe'ltzuntz jyolteju' xtzpet tzmax ajtokyal tu'n? 5Ajtzun tokyal tu'n, kjawix tq'o'n ti'j tqul nxi'x tzalaj, 6ajtzun tpon tja, nche b'aj ttxko'n tamiw exqe' najlqe' nqayin tk'etz ex nxitma'n kye: Qoqe' tzalaj wuk'i'le', qu'n matxi' knetju' nrite' xi'tzpet, chij. 7Ikxtzun kxe'l nma'nju'ye' kyeye', atixi'x nim tzalajb'il toj kya'j ti'j jun aj il matz'anjtzti'j tanmi kyekwitzju' kyajnaq b'eljlajoj min nojqelan tu'n tanjtzti'j kyanmi. 8Mujqa ¿alkye jun qya ati lajoj tpwaq ex matxi' tz'aq jun, ma mlaytzun jaw ttxqo'n tkantil ex kb'ajel tmso'n toju' tja tu'n tjyonte tpwaq chab'a tzmax ajtokyal tu'n? 9Ajtzun tokyal tu'n, che b'ajel ttxko'n tamiw exqe' najlqe' nqayin tk'etz, ex kxe'l tma'n kye: Qoqe' tzalaj wuk'i'le', qu'n matxi' tz'okyalju' npwaqe' xi'tz'aq, chij. 10Ikxtzu'n, atixi'x nim tzalajb'il kxolju' tanjl Dyos ti'j jun aj il matz'anjtzti'j tanmi, chi Jesus. 11Ex xitma'n Jesus techlal lu: Jun ichan ate'toq kab'e' tk'wal, 12tzaju' itz'inb'aj xitma'n te tman: Ta, q'ontza wetzb'ile' ati woklene' ti'j, chij. Kub'tzun taq'pu'n manb'aju' kyetzb'il kxol. 13Tojtzun jte' q'ijtl b'aj tk'ayi'n itz'inb'aju' tetzb'il xiq'o'n, xi'tzuntz najchaq tojuntl tx'otx' tuk'i'lju' pwaq lu, atzuntzu' b'aja' ttxa'ju'n tmedi toj achb'il twitz tx'otx'. 14Tetzunj tb'aj tnajsa'n tkyaqil, tzaj jun nin we'yaj toju' tx'otx' lu, tzajtzun we'yajtz ti'j. 15Xi' qanil taq'un te jun xjal toju' najb'il lu, xichq'o'ntzuntz k'ik'lel b'och toju' ttx'otx'. 16Tajb'ilxi'xtoq tu'n txi' twanju' kwa b'och, ex mixti'x nxiq'o'n te. 17Kub'tentzuntz ximalte: ¡Yaqi'n txqan majin ate' tja nmane' min nb'ajtl kwa, ayintzunwe' nchin b'aje' tu'n we'yaj tzalu! 18K'anjeltl wi'je' tja nmane', ex kxe'l nma'ne' te: Ta, matxi' chin b'inchan ile' twitz Dyos ex twitza; 19myab'a'ntl tu'n wok tq'o'na te tk'wala; chin tq'onka kse'n jun tmajina, nchiku'ye', chij. 20Kub'tzun b'e tu'n ex anjti'j tja tman. Na'mxtoqtzun tpon kanun, ilwi tu'n tman ex tzaj laqj tk'u'j ti'j. Xi' ojqelanju' tman k'lulte, oktchle'n ex b'aj tma'tzi'n. 21Xitma'n k'wa'lb'aj te: Ta, matxi' chin b'inchanwe' il twitz Dyos ex twitza; myab'a'n tu'n woktq'o'ntla te tk'wala, chij. 22Atzunte' tman xitma'n kye tmajin kjalu: Wix kyiq'imitze' tb'anil xb'alun ex kq'onkye' ti'j; ex kq'onkye' jun xmilq'ob'aj ti'j twitq'ob' ex kq'onkye' xjab' ti'j tqan. 23Kyiq'intze' qpoj tman wakx q'u'sxi'x ex kb'yonku'ye'. ¡Kb'el qtzalajsa'nte' lu tu'n jun ninwan! 24Qu'n kyimnitltoqju' nk'wale' lu ex matxi' jaw anq'intl; ojetoq txitzpet ex matxi' tz'okyal qu'n, chij. Tzyettzun ktzalajb'iltzu'. 25Atzunte' tzikb'aj atitoq toj kojb'il. Tej tanjti'j ex ch'inxtltoq tpon tk'etzju' ja, xitb'i'n chnab' nq'ajt exqe' b'ixil. 26Xi'tzun ttxko'n junju' majin ex xitqani'n te ti'toq nb'aj. 27Xitma'n majin te: Ana' titz'ina matzultl; ex matchaq'ju' tmana tu'n tkub'yetju' qpoj tman wakx q'u'sxi'x, qu'n b'a'n sula' ex mya yab', chij. 28Atzunte' tzikb'aj ojexi'x tzaj tq'oj, min tajb'il tu'n tokx tuja, ilti'j etzju' tman q'malte te tu'n tokx tuja. 29Xitma'n te tman kjalu: Kanli twitza jte'xi' ab'q'i nchin ajb'ene' teya, mixti' jumaj mixwitti'x nchin b'ine' teya, extzun b'ajxpe' tzaja' tq'o'na' tk'i'xwit jun tal chib' weye' tu'n nwane' kyuk'i'l wamiwe'. 30Atzu'n sulju' tk'wala na'j, matxi' b'aj ttxa'ju'n tmediya kyuk'i'l qya ajpajil, ex makub' tb'yo'ntla qpoj tman wakx q'u'sxi'x te, chij. 31Xi'tzun ttzaq'we'n tman te: Nky'ajul, axnatzu' ta'ta kukxju' nk'etze', ex teya tkyaqilju' ati weye'. 32Naq aju' atitoq tu'n tkub' qiksa'nte' lu tuk'i'l jun ninwan ex tu'n qtzalajsante, qu'n kyimnitltoqju' titz'ina, matzultl, ojetoq txitzpet ex maknetl qu'n, chiju' manb'aj, chi Jesus.

will be added

X\