Lucas 14

1Jun q'ij te ojlab'l okx Jesus wal tja jun knejel parisey, ex intoq che nenun txqantl parisey ti'j. 2Ex atitoq jun ichan twitz Jesus, yab'toq tu'n male'n. 3Xitqani'n Jesus kye xnaq'tzal kawb'il ex kye parisey kjalu: —¿Maq'o'n toj kawb'il tu'n tq'anet jun yab' toj q'ij te ojlab'l mujqa min? chij. 4Aye'tzunkye mixti'xte kma. Tzajtzun ttzyu'n Jesusju' yab' ex q'anet tu'n, ex xitma'n te tu'n tanj. 5Xitma'ntzuntz kye parisey: —¿Alkyetzun junkye', qama ku'x tz'aq jun tk'wal mujqa twakyix toj jul, lay jatztiq'i'n maskye toj q'ij te ojlab'l? chij. 6Ex mixti'xte b'ent ttzaq'wet kyu'n. 7Tej tok tka'yi'n Jesus inxi'xtoq jaw kjyo'n txko'nqe' kq'uqb'il te oklenj ti'j mes, xitma'n jun knab'l kjalu: 8—Qama txkonjtza tojun ninwan ti'j mjeb'le'n, lalun kub' qeya toju' q'uqb'il nim toklen, qu'n jaku' pon juntl txokenj nimxi'x toklen kyetwitza; 9ex jaku' tzulju' xtxkonkyeye' q'malte teya: Q'onxa tq'uqb'ila teju' juntl lu, jaku' chi. Ch'ixb'ajilxtzuntz teya ajt-xi'ya qeb'il toj ju' mankb'il q'uqb'il. 10Ata' b'incham qama txkonjtza, qeku'ya toju' mankb'il q'uqb'il, tu'ntzun ajtulju' xtxkonteya, ktma' teya: Kutoktza tojun q'uqb'il te oklenj wamiw, chij. Kjawil nima'ntzuntza kwitzju' q'uqliqe' tuk'i'la ti'j mes. 11Qu'n alkyete njaw nimantetib', kb'el me'ssa'n; ex alkye nkub' tme'ssa'ntib', kjawil nima'n. 12Ex xitma'n teju' ichan txkonte: —Ajtkub' tq'o'na jun wan, lalun che ttxoka tamiwa, exqe' ttzika mo titz'ina, exqe' twitze'la, exqe' najlqe' nqayin tk'etza q'inunqe'; qu'n ex ktxkonjtzela kyu'n, oktzun tzajel q'o'n t-xeltz teya. 13Ape' b'inchamju'ya, ajtkub' tq'o'na jun ninwan, txkonqe'tza prow, e'tzqij kq'ob', e'kox ex e'moẍ; 14K'i'wla'n tzuntza. Layna' b'ent ttzaj kychjo'n teya, oktzun tk'ma'ta tu'me'l t-xel toju' q'ij ajkyjaw anq'in tnik'alkyi'j, chi Jesus. 15Tetzunj tb'inte jun xjal q'uqlitoq kxolju' q'uqlqe' ti'j mes, xitma'n te Jesus kjalu: —¡Tzalajb'ilte' teju' maten toju' ninwan toj tkawb'il Dyos! chij. 16Xitma'n Jesus te: —Ati jun xjal kub' tq'o'n jun ninwan, ex xitchq'o'n ktxokli txqan xjal. 17Tetzunj tponju' kmuj te wan, xitchq'o'n tmajin q'malte kyeju' txko'nqe' tu'n kytzaj, qu'n matxitoq b'entju' wab'j. 18Kkyaqilxtzun e'okten q'malte tiqu'n lay che tzaj. Tmaju' jun nejtl: Tzma xlq'et jun piẍ ntx'otx'e', ilti'j tu'n nxi'ye' ka'yilte. Najsama lay chin pone', chij. 19Atzun juntl tma: Mache lq'et jwe' muj nwakyixe', machinxe' aq'unal kyi'j qa b'a'nqe'. Najsama, lay chinxe', chij. 20Atzun juntl tma: Tzma ẍin mjeye', lay b'ent nxi'ye', chij. 21Anjtzti'ju' majin ex xitma'n tkyaqil teju' tajaw. Tzajtzun ttx'u'jilju' tajaw ja ex xitma'n teju' tmajin: Wix kutxi'ya kyoj b'e ex kyoj tal b'e toju' nintnam, ex q'inqe'tza prow, tzkaj, moẍ ex kox tzala, chij. 22Yajxi'tzuntl xitma'n majin: Taye, matxi' nb'inchaye' saj tma'na, ex atix anb'il, chij. 23Xi'tzun tma'n tajaw teju' majin: Kutxi'ya kyoj b'e ex kyoj b'ya', ex ilxi'xti'j q'inqe'ktza tu'n tnoju' njaye'. 24Qu'n axxi'x mix-a'lo' jun kxolju' txko'nqe'toq nejtl tu'n kwan toju' ninwan xkub' nq'o'ne', chij. 25Nim xjal lepchqe'ktoq ti'j Jesus; anjtzun ka'yinti'j Jesus kye ex tma: 26Qa ati jun saj wuk'i'le' ex min nchin tk'u'jla'nxi'xe' kyekwitzju' tman, ttxu, t-xu'jil, tk'wal, titz'in mo ttzik mo tanab', expe' kyetwitz aku', lay b'ent tok te nxnaq'tzb'ene'. 27Ex alkye min xjaw tiqa'n tkurus ex tu'n toklpe wi'je', lay b'ent tok te nxnaq'tzb'ene'. 28Qa ati junkye' tajb'il tu'n tjaw tb'incha'n jun ja nimin twe', ¿ma mixtzunti' nkub' qe nejtl ximalte jni' kb'ajel ti'j, tu'n t-xitka'yi'n qa ati tu'me'l tu'n tjapun b'aj tu'n? 29Qatzun min jaku' naq ku'x tq'o'n tq'uqlil ex jaku' lay japunb'aj tu'n, kkyaqiltzu'n xjal che okyel ka'yinte jaku' che aq'wi xmayil ti'j. 30Jaku' kma: Naqsok ttzyu'n te' xjal tja, extzun min xb'ent tjapun b'aj tu'n. 31Mujqa ati jun nimaqkawil ati tu'n txi' q'ojil ti'j juntl nimaqkawil, ¿ma laytzun kub' qe nejtl ximalte qa kb'entel tq'ojin tu'n junmutx' jo'k'al (10,000) t-xjal te q'oj kyi'j kab'mutx' lajk'al (20,000) ajq'oj? 32Qatzun lay b'ent tq'ojin kyi'j, che xe'ltchq'o'n t-sanjel qanilte teju' juntl nimaqkawil atixtoq najchaq tu'n kten toj nak'b'il. 33Ikxtzunkyeju'ye', qa alkye min xkyaj tq'o'n tkyaqilju' ati te, lay b'ent tok te nxnaq'tzb'ene'. 34B'a'nte' atz'an; qatzun mixti'tl tpitz'mojil, ¿se'n taq'wi tu'n tajb'entl? 35Laype' tz'ajb'en te tx'otx' ex te ch'uq tz'is. Naq k'elex xoyet. Alkye b'a'n tb'inte, b'inx.

will be added

X\