Lucas 13

1Tojtzu'n kmuj lu e'pon junjun xjal q'malte te Jesus ti'ju' tb'incha Pilat, matxitoq b'aj t-smo'n kychk'el junjun aj Kaliley e'pon toj Jerusalen tuk'i'l kychk'elju' alu'mj e'kub' kyq'o'n te chojb'il. 2Xi'tzun tma'n Jesus kye: ¿Ma alo b'aja' kyi'ju' ichan aj Kaliley lu qa tu'n aj il qexi'x kyekwitzju' txqantl toju' kytx'otx'? 3Minti'; qa min sanjtzkye' ti'j kyanmi tuk'i'l Dyos, ex che kyimelkye'. 4¿Mujqa aye' aj il qexi'xju' wajxaqlajoj e'kyim tej ttzaj tz'aqju' ja Silowe nimin twe' kyekywitzju' txqantl najli qe'toq toj Jerusalen? 5Minti'; Qa min sanjtzkye'kyi'j tuk'i'l Dyos, ex che kyimele', chi Jesus. 6Xitma'n Jesus techlal lu kye: Ati junwi' iw awa'n tu'n jun ichan toju' tawal, xi'tzun ka'yilte qa atitoq twitz, mixti'xte jun knet tu'n. 7Xitma'ntzuntz teju' nka'yinte tawal: Mab'ent oxe' ab'q'i nchin ule' jyolte twitzju' iw lu, mixti'xte twitz nokyal. Tx'emunktza, qu'n mixti'x tajb'en ati toju' tx'otx', chij. 8Atzunte' ka'yil tx'otx' xittzaq'we'n te: Taye, tenkupunj toju' ab'q'i lu; kjawil nko'pi'ne' tx'otx' ex kb'elex nq'o'ne' ttz'isil. 9Qapetzunlo kwitzaltz; qatzun mixti'x, tx'emunktz tzuntza, chij, chi Jesus. 10Intoq tq'o'n Jesus xnaq'tzb'il tojun ja te k'u'lb'il tojun q'ij te ojlab'l; 11atitoqtzun jun qya atzu', ma'toq b'ent wajxaqlajoj ab'q'i yab'. Majxtoq k'o'lti'j tu'n jun tajaw il, mixtoqti'x njawe'. 12Tetzunj tok tka'yi'n Jesus, xittxko'n ex xitma'n te: —Qya, matxi' tzaqpeta teju' tyab'ila, chij. 13Ekub'tzun tq'o'n tq'ob' tib'aj, textzu'n kmuj jawe' qya ex aq'wi ajwalilte Dyos. 14Atzu'n nejenel toju' ja te k'u'lb'il tzaj ttx'u'jil, qu'n tq'a'na Jesus toj q'ij te ojlab'l, xitma'n kye xjal: —Qaq q'ij ati tu'n qaq'unan; kuktzaje' q'ol q'ana' kyib'e' kyoju' q'ij lu, mya toj q'ij te ojlab'l, chij. 15Xi'tzun ttzaq'we'n Qajaw te: —Xmletz'qe'ye', ¿ma mixtzunti' nel kpju'nkye' kwakix mo kycheje' b'ur toj q'ij te ojlab'l, tu'n t-xikyiq'i'ne' k'wal a'? 16Atzunte' qya lu, tyajajil Ab'raam, mab'ent wajxaqlajoj ab'q'i xwaku'n tu'n tajaw il, ¿ma laytzun tzaqpet maskye toj q'ij te ojlab'l? chij. 17Tej txitma'n Jesus ja'lu, eb'ajkub' ch'ixwiju' tajq'oj; aye'tzunkye' xjal inxi'xtoq che tzalaj tej tok kka'yi'n nimaq ti'xti' nche tb'incha'n. 18Ex xitma'n Jesus kjalu: ¿Se'ntzunju' tkawb'il Dyos, alquk'i'l kb'ela' nmujb'a'ne'? 19Ikyse'n jun ij ẍmostas nku'x tawa'n jun ichan toj ttx'otx', nch'iytzuntz tzmax ajtpon naku'j jun nin tze, nimin nche najan pich' kxolju' tq'ob', chi Jesus. 20Ex tma Jesus: ¿Se'n k'okyela' nq'o'ne' tkawb'il Dyos? 21Ikyte' se'n ttx'amal nxi't-smo'n jun qya tuk'i'l oxe' mlon arin tu'n ttx'amsetju' q'otj, chi Jesus. 22Ljo'ntoq tb'e Jesus tu'n tpon toj Jerusalen, nq'onxi' xnaq'tzb'il kyoj tnam ex kyoj kojb'il jachaq nik'a'. 23Xiqani'n te tu'n jun xjal: —Taye, ¿manaq jte'xju' che kletel? chij. Xittzaq'we'n Jesus te: 24—Kq'onk tilile' tu'n kyokxe' toju' b'o's ttzija, qu'n nimte' kyajb'il tu'n kyokx, ex lay b'ent kyokx. 25Tjawlenxi' we' tajaw ja ex tetzlenxi' tjpu'n ja, qama che kyajtene' pe'n, k'okyex kma'ne' twitz tjpel ja kjalu: Taye, jqonkxa ja qeye' chechiku'ye'. Atzunte k'eletz ttzaq'we'n: Min b'i'n wu'ne' jaẍe tzaja'ye', chij. 26Che aq'weltzuntze' q'malte kjalu: Oje qo wane' ex oje qo k'wane' tuk'i'la, ex q'on xnaq'tzb'ila kyoju' qb'eye' chechiloye'. 27Atzunte k'eletz ttzaq'we'n: Min wojtzqi'ne' te jaqe'ye'. ¡Kukxi'ye' b'inchal myab'a'n! chilo kyeye'. 28Tzultzun oq'e'ntz ex b'is kyi'je' ajkyka'yinteye' ate'kye Ab'raam, Isaak, Jakob' ex kykyaqil t-sanjelal Dyos toju' tkawb'il Dyos, aye'tzunkye' che elex q'o'ne' ti'jxi'. 29Qu'n che tzajel xjal toj tb'a'nq'ob'kya'j ex toj tnayajkya'j, toj tjawetzq'ij ex toj tkub'exq'ij, tu'n kkub' qe wal toju' tkawb'il Dyos. 30Ate'tzun junjun mankb'il ta'qe' ja'lo che okyel nejl, ex ate' junjun nejliqe' ja'lo che okyel mankb'il, chi Jesus. 31Epontzun junjun parisey tojxju' q'ij lu, ex xikma'n te Jesus: —Kutik'a tzalu, qu'n tajb'il Erodes tu'n tkub' b'yo'na tu'n, chechij. 32Xi'tzun ttzaq'we'n kye: —Kukxi'ye' ex kmanxe' teju' chuẍ na'j: Nche ex nxla'ja'nwe' tajaw il ja'lo ex najchi'j, ex nche nq'ana'ne' yab', ex kab'j chin qjene'. 33Oktzun kxe'l nljo'nwe' nb'e ja'lo, najchi'j ex kab'j, qu'n myatzu' tu'n tkyima'te jun t-sanjelal Dyos ti'jxi' Jerusalen. 34¡Malayqe'xwite' aj Jerusalen, nche kub' kyb'yo'ne' t-sanjelal Dyos exqe' nche tzaj tchq'o'n Dyos q'mal tpakb'alil kyeye', nche b'aj kyxone' toj ab'j! ¡B'a'npunxi' maj wajb'iltoqe' tu'n kyok nb'u'yi'ne' junx, kse'n ttxu ek' nche ok tb'u'yi'n tal tjaq' t-xik', ex min kyajb'ile'! 35Lutzun kjaye' kjel kkolb'e'ne'; ex lay chin nok kka'yi'ntle', tzmaxi'j ajkymanteye' kjalu: ¡K'i'wla'nte' tzul chq'o'n tu'n Qman Dyos! chi Jesus.

will be added

X\