1 Yajxi'tzuntl, e'jaw t-sk'o'n Qajaw oxnaq kab'lajojtl (72) xnaq'tzb'en, ex exi' tnejb'a'n twitz te kakab' kb'aj, kyoj kkyaqil kojb'il ex tnam jachaq tu'n t-xa'ya'. 2 Xitma'n kye kjalu: Axxi'x nimte' twitz awal ati, aye'tzu'n aq'unal naqjte'x. Qu'mtzun kyqaninxe' teju' tajaw awal tu'n kytzaj tchq'o'n txqantl aq'unal. 3 Kuxkxi'ye'; nche'x nchq'o'ne' kse'nqe' rit kxol xo'j. 4 Lalun txikyiq'i'n kpwaqe' mo kwaye' mo kxajab'e'; ex lalun che kub' we'ye' q'olb'elkye xjal toj b'e. 5 Ajkyokxe' toj jun ja, nejtl che kq'olb'enqe'xe' xjal kjalu: Tzalajb'ilxwit kyeye' toju' ja lu, chechiku'ye'. 6 Qatzun b'a'n kten xjal toju' ja lu, kjapumel se'n tb'is kyk'u'je'; qatzun mya, k'anjetz ti'ju' q'olb'eb'l kyuk'ile'. 7 Naq toj junx ja che tenkja'ye', che wanqe'ye' ex che k'wanqe'ye' ti'ju' ati kye, qu'n ati tu'n tk'montete' aq'unal twitk'u'j. Lalun che'xe' jayi'n. 8 Ajkpone' tojun tnam, jamache k'monjtza'ye', che wanqe'ye' ti'ju' makub' q'o'n kwitze'; 9 che kyq'aname' yab' ate' toj, ex kymanxe' kye xjal: Matxi' tzulkanun tkawb'il Dyos kyuk'i'le' chechiku'ye'. 10 Qatzun mache pone' tojun tnam ex mix-a'lo' xk'monkyeye', kukyetze' toj b'e ex kymanxe': 11 ¡Expe' k'elel qchto'ne' quq sok ti'j qqane' toj ttanama, te yek'b'il qa myab'a'n xjal qe'ye'! kyb'inku'tzune' qa matxi' tzul kanunju' tkawb'il Dyos kyk'etze', chechiku'ye'. 12 Kxe'l nma'ne' kyeye', ajtjapun tq'ijlalil, nimxi'x tz'e'ysb'il twitzju' tnam lu kb'el kyekywitzu' xjal toju' Sodom. 13 ¡Qab'anx kwitze' aj Korasin! ¡Qab'anx kywitze' aj B'etzayda! Qu'n naqwit kyoj tnam Tiro ex Sidon ẍeb'enta' b'a'nq'ob'aj ẍenb'incha'ye' kyxole', ojtxi'xi'x witlo tanjtzlen ti'j kyanmi tuk'i'l Dyos, tokwitlo kyi'j te b'is ex q'uqlqe'wtlo toj tza'j. 14 Ajtzun tpon tq'ijlalil tu'n kyokye' toj xjel, nimxi'x tz'e'ysb'il kywitze' kb'el kyekywitzju' xjal aj Tiro ex aj Sidon. 15 Extzunta Kaparnawum, ¿chiloya qa matxi' jawlq'eya najchaq? ¡tzmax t-xexi' jul kpomela' tz'aqa! 16 Alkyete makub' b'inkyeye', ayine' nchin kub' tb'i'n; ex alkye matz'el ik'onkyeye', ayine' nchin eltik'o'n; ex alkye matz'el ik'onweye', inel tik'o'nju' saj chq'onweye', chi Jesus. 17 Nche tzalaju' oxnaq kab'lajoj tej tanjtzkyi'j, kyma kjalu: —¡Taye, inpe' qo'x kyb'i'nju'ye' tajaw il toj tb'iya! chechij. 18 Xitma'n Jesus kye: —Ikyju', mawile' ajq'oj ntzaj tz'aq twitz kya'j naku'j xloq'lo'kya'j. 19 Matxinq'o'ne' kyipumale' tu'n kyb'ete' kyib'aj kan ex lakran, ex tu'n tkub'ti'j tkyaqil tipumalju' ajq'oj kyu'ne', ex mixti'te tu'n kyk'ixb'iye' tu'n. 20 Lantzun che tzalaje' tu'nju' nche'x b'i'ne' kyu'n tajaw il, xi' che tzalaja'ye' tu'nju' tz'ib'a'ntl kyb'iye' toj kya'j, chi Jesus kye. 21 Tojtzu'n kmuj lu, inxi'xtoq tzalaj Jesus tu'n Xewb'aj Xjan, tma kjalu: Njaw wajwali'na Nman Dyos, Tajaw kya'j ex tx'otx', qu'n aye' ti'xti' e'kub' tewa'na kye ati kynab'l ex ati kyojtzqib'l, matyek'uya kyeju' ch'i'n kyoklen. 22 Matzaj tq'o'n Nmane' kykyaqil ti'xti' weye'. Mix-a'lo' b'ilte alkyeqine', ayine' Tk'wal Dyos, o'kx nma'ne' ojtzqil weye', ex mix-a'lo' ojtzqilte alkyeju' Nmane', o'qinkxe' ojtzqilte ayine' Tk'wal, chi Jesus. 23 Ul jumajtl kyk'etzju' t-xnaq'tzb'en, xitma'n kye oqe'kxtoq kjalu: Tb'anilxi'xte' kyeju' nche lonteju' nche kyka'yi'ne'; 24 qu'n nim t-sanjelal Dyos ex nimaqkawil kyajb'iltoq tu'n tok kyka'yi'nju' nkyka'yi'ne' ja'lo ex mixti'x xkyil; kyajb'iltoq tu'n kyb'inteju' nkyb'i'ne' ja'lo ex mixti'x xkyb'i, chij. 25 Ul lq'e jun xnaq'tzal kawb'il naq tu'n tel yal jun til Jesus tu'n, chij kjalu: —Xnaq'tzal, ¿Titi' ati tu'n nb'inchanteye' tu'n nkanb'anteye' chwinqlal tejumajx? chij. 26 Xittzaq'we'n Jesus te: —¿Ti'tzu'n tz'ib'a'n toj kawb'il? ¿Ti'tzu'n njaw t-ẍch'i'na? chij. 27 Xi'tzun ttzaq'we'n xnaq'tzal kawb'il kjalu: —K'u'jlama Dyos Manb'aj janajb'ena'ya tu'n tkyaqil tanmiya, tu'n tkyaqil tk'u'ja, tu'n tkyaqil tipumala ex tu'n tkyaqil tnab'la; ex k'u'jlama t-xjalila kse'nxta ntk'u'jla'n tib'a, chij. 28 Xitma'n Jesus te: —B'a'n ttzaq'web'la. Qa ntb'incha'na ikju', ktenb'el tchwinqlala, chi Jesus. 29 Atzunte' xnaq'tzal kawb'il, tajb'iltoq tu'nxi'x t-xjelun te Jesus, tma: —¿Alkyetzu'n nwnaqile'? chij. 30 Xi'tzun ttzaq'we'n Jesus te: —Jun xjal intoq b'et toju' b'e ntzaj Jerusalen tu'n tpon Jeriko, eb'jo'k tzaqpaj leq' ti'j majxpe' b'je'l kyiq'i'n ti'j; b'aj kyb'yo'n ex eb'ajx oqtzuntz, ch'inxmi kyima' kyu'n. 31 Naqtzun minab'en tik' jun pale tojxju' b'e lu; tetzunj t-xitka'yi'n xjal, ik' kuman ti'j ex xitljo'n tb'e. 32 Ex pon jun aj Leb'i atzu', ex tej tka'yinte, ik' kuman ti'j ex xitljo'n tb'e. 33 Atzun jun aj Samarya ntoq b'et tojxju' b'e lu, tej tka'yinte, tzaj laqj tk'u'j ti'j. 34 Xilq'e tk'etz, b'aj tq'a'na'n tk'ixb'len tu'n aseyt ex b'in, ex b'aj tptzo'n. Jax tq'o'ntzuntz tib'ajku' tchej, xitiq'i'n tojun ja ex xitka'yi'n. 35 Tetzun juntl q'ij, jatztiq'i'n aj Samarya pwaq kse'n chojb'il kab'e' tq'ij jun aq'unal, xitq'o'n teju' tajaw posadb'il ex xitma'n te: Ka'yinx ch'i'na ichan lu, qatzun matnajsatl pwaqa ti'j, kxe'l nchjo'ntle' teya ajtanjtz wi'je', chij. 36 ¿Alkyetzun jun kyxolju' oxe' lu ok te twnaqilju' e'oktzaqpaj eleq' ti'j toj twitza? chi Jesus. 37 Xi'tzun ttzaq'we'n xnaq'tzal kawb'il: —Aju' tzaj laqj tk'u'j ti'j, chij. —Kutzun txi'ya ex b'inchama ikju', chi Jesus te. 38 Xitljo'n Jesus tb'e ex pon tojun kojb'il, kyej tja jun qya Marta tb'i. 39 Atitoq jun ttzik mo titz'in Marta, Mariy tb'i, kub' qe tk'etz Jesus b'ilteju' ntoq tma'n. 40 Atzunte Marta inxi'xtoq b'ajx tk'u'j tij txqan taq'un, pon lq'e tk'etz Jesus ex xitma'n te kjalu: —Taye, ¿ma min nximana tu'nju' nchin kyej tq'o'ne' witz'ine' njunale' ti'j tkyaqil txqan aq'untl? Q'manxa te tu'n ttzaj onilweye', chij. 41 Atzunte Jesus xittzaq'we'n te: —Marta, Marta, inxi'x b'ajx tk'u'ja ex mixti'x nojlana toju' txqan taq'una, 42 naqna' junte' in nojqelan. Aju' tb'anilxi'x xjaw t-sk'o'n Mariy, ex mix-a'lo' k'elel q'inte te, chi Jesus.
