Hebreos 9

1Toju' tnejel yol kyej b'entti'j tu'n Dyos quk'i'l nk'u'na' kse'n tu'n qk'ulun te Dyos toju' ja xjan te twitz tx'otx'. 2Ikytten ja xb'alunju' te k'u'lb'il jaw b'incha'n kjalu: Toju' tnejel mqo'n ajqokx ttzija tok tb'i Xjan Mqo'n, ja ta'qe' tkb'el kantil exju' mes ja tkub'a' wab'j xjansa'nqe' twitz Dyos. 3Atzu'n tkab' mqo'n t-xexi' ti'jxi' xb'alun lik'u'ntz te maqb'il toj nky'ajchaq, tok tb'i Xjanxi'x Mqo'n; 4atzuntzu' ta'ya' jun q'anpwaq q'olb'eb'l jankub'a' tz'e'yset sturak, ex tkaxilju' yol kyajni b'antti'j tokyile q'anpwaq ti'j. Tojtzu'n kax lu tku'x jun q'anpwaq xar tku'x mana toj, ex toju' kax tku'xa' ttze Aaron ma'toq t-xulin exju' tz'lan ab'j jatz'ib'ana' lajoj chaq'b'il. 5Tib'ajtzu'n kax lu ate' kab'e' tilb'ilal anj Kerb'in kyb'i yek'b'ilte qa atzu' ta' Dyos, majxtoq ktxu'n tib'aju' kax tu'n kyxik'. Naqtzun aju' lay txinch'ik'b'a'nxi'xe' txqantl ti'xti' lu kyeye' ja'lo. 6Iktzunju', kykyaqilju' ti'xti' nk'u'mile kyten toju' ja xb'alun. Inche okxju' pale tkyaqil q'ij toju' tnejel mqo'n tu'n kyb'inchante k'u'lb'il te Dyos. 7Atzu'n toju' tkab' mqo'n ati t-xexi' o'kxju' kynejel pale in okx toj naq junmaj toj ab'q'i; ajtzun tokx toju' kol ja Xjanxi'x ati tu'n tokx tiq'i'n tchk'el a'lumj te chojb'ilte til ex chojb'ilte kyilju' xjal. 8Tu'ntzu'n ja'lu intyek'u'n Xewb'aj Xjan qe, qa ljo'nx tajb'enju' tnejel mqo'n te k'u'lb'il mixti' tu'me'l tu'n qokx toju' Xjanxi'x Mqo'n. 9Tkyaqilte' lu naq jun techlal ti'ju' tq'ijlalil ja'lo; qu'n lay b'ent tu'n tqe kyk'u'ju' xjal naq tu'n inche'x kyq'o'n oyaj ex chojb'il toj ju' ja te k'u'lb'il, tu'nwt tkub'najsa'n kyilju' nche k'ulun toju' tu'me'l lu. 10Qu'n ate' k'u'lb'il lu xi' nyolina' ti'j chib'j, k'wab'j ex ti'j chukchaq tu'me'l ẍtilsab'lkye, qu'n tkyaqilju' chaq'b'il lu o'kxtzu' najb'ena' te qxmilal ex che tenb'il akxku' npon tq'ijlalil tu'n tch'exb'et tu'n Dyos. 11Atzu'n ja'lo matxi' tzul Krist ex matxi' tz'ok te kynejel pale nimaqxi'x toklen ex matxi' tzaj tq'o'n xtalb'il qe. Nimaqxi'x toklenju' ja xjan jannajb'ena' Krist ex tz'aqlixi'x kyetwitzju' tnejel, mya kyb'ichb'aj xjal ex mya te twitz tx'otx'. 12Mya tchk'el chib' mujqa tchk'el qpoj tman wakx in okxtiq'i'n Qajaw Jesukrist te chojb'il kyil xjal toju' ja xjan, aku'te tchk'el ajb'en tu'n te chojb'il kyil xjal; naq jumaj ex tejumajx sokx toju' ja xjan, majx maqo kolpet tu'n tejumajx. 13Aye'kye' xjal nche tz'ilix, inche ẍtilset tu'n tchk'el tman wakx ex chib', ex ttza'jil ttxu wakx nkub' tz'e'yset tib'aj q'olb'eb'l, qama witxk'et kyi'j. 14Qatzun ikju' qa nche ẍtilset xjal tu'n kychk'el alu'mj ¡Yajtzunte' tchk'el Qajaw Jesukrist ma myatzulo nimxi'xte tipumal! Qu'n naq tu'nel Xewb'aj Xjan itz' tejumajx xitq'o'ntib' Qajaw Jesukrist te chojb'il mixti' ttz'ilil te Dyos, matxi' ẍtilset qanmi tu'n te tkyaqilju' qb'inchb'en te kamik, tu'ntzun qajb'en te Dyos itz'. 15Qu'mtzun ja'lo naq tu'nel Krist maqo ok toj jun ak'a'j yol kyej b'entti'j tu'n Dyos quk'i'l, qu'n ate Krist xkub'najsante kyilju' xjal kb'incha tjaq'ju' tnejel yol kyejni b'entti'j ojtxi', ex tu'nte kyk'ma'ya' xjal kyetzb'il tejumajx te Dyos, aju' tzajni ttziya'n kyeju' sk'onqe'tl tu'n. 16Kse'n jun tu'jil etzb'il nkyej q'o'n mixti' tajb'en qa na'mtoq tkyimju' nkyej q'onte. 17Qu'n mixti'x tajb'enju' tu'jil etzb'il qa itz'xju' xkyej q'onte, qatzun matxitoq kyim atitzun tajb'entz. 18Qu'mtzun aju' tnejel yol kyej b'entti'j tu'n Dyos kyuk'i'l ojtxi' qyajilb'en, el kychk'el alu'mj tu'n tqexi'x tk'u'jlalilju' yol lu. 19Qu'n tkyaqilju' chaq'b'il tz'ib'a'n toju' kawb'il xitma'n Moyses kye kykyaqil xjal; tb'ajlenxi'tzun tma'n, tzajtiq'i'n jni' t-smal rit kyeqka'yin ex jun t-ẍk'ilub' tze, ku'xtzun tnub'sa'n toju' kychk'el tal tman wakx ex kychk'el tman chib' smo'n twitz tuk'i'l a', oktzun twitxk'a'n ti'ju' tu'jil kawb'il ex kyi'j kykyaqil xjal. 20Xitma'ntzun Moysestz kjalu: Aju' chik' lu a tajb'enju' tu'n tkyej qexi'x tk'u'jlajilju' yol xkyej b'entti'j tu'n Dyos kyuk'ile', chij. 21Ikx oktwitxk'a'n Moyses kychk'el alu'mj ti'ju ja xjan ex kyi'j kykyaqil ti'xti' nche ajb'en toj k'u'lb'il te Dyos. 22Ex a intma'nju' toj kawb'il, naku'j tkyaqil ti'xti' ati tu'n kyẍtilset tu'n chik'; ex min nkub' najsa'n kyilju' xjal qa min sel tchk'el jun alu'mj. 23Qu'mtzun ilxi'xtoq ti'ju' kychk'el alu'mj tu'n tajb'en ẍtilsab'lkye ti'xti' naq tilb'ilalju' ati toj kya'j; aye'tzunkye' ti'xti' toj kya'j a chojb'ilju' nojqelan kye aju' tb'anilxi'x kyetwitz kychk'el alu'mj. 24Myatzu' okxa'te Krist toju' ja xjan kyb'inchb'aj xjal, qu'n ate' ja lu, naq jun tilb'ilal ti'ju' ja ati toj kya'j, xi'okxa'te Krist toj kya'j, ja nyolina' qi'j twitz Dyos ja'lo. 25Ex min okxte Krist b'a'npun maj q'oltib' te chojb'il, kse'n nkyb'incha'n kynejel pale atl junjun ab'q'i nche okx tuk'i'l kychk'el alu'mj, ex myaku' kychk'el kse'nte Krist. 26Naqwit ikju' atiwtlo tu'n tkyim Krist b'a'npun maj ttzajlenx tb'entlen twitz tx'otx'. Atzunte' ja'lo tej xjapun b'aju' tq'ijlalil, naq jumaj xtyek'utib' Krist ex naq junmaj kyim te chojb'ilte qil. 27Ikse'nqe xjalqo' naq junmaj qo' kyimel, qkyimlenxi'tzun qo' okyel toj xjel, 28ikxtzunte Kristju' naq junmaj xtaq'tib' tu'n tkyim te chojb'ilte kyil xjal. Tzultzun jumajtl tkamaji'n, mya'tl tu'n tchjet kyil xjal, qu'n tzul klolkyeju' nche' ayon ti'j.

will be added

X\