Hebreos 8

1Ate nimxi'x toklenju' toj tkyaqilju' nxiqma'ne' kyeye', aju' tu'n ati jun tnejel qpale nimaqxi'x toklen, xi'q'uqla' ja'lo toj tb'a'nq'ob' Dyos toj kya'j, 2ex in najb'en toju' ja xjanxi'x, aju' ja xjan axxi'x lu aku' Dyos b'inchante, mya'ye' xjal. 3Kykyaqil kynejel pale nxiq'o'n kyoklen tu'n tkub' kyq'o'n oyaj ex chojb'il te Dyos, qu'mtzun ikxte Qajaw Jesukrist ati tu'n tkub' tq'o'n jun oyaj twitz Dyos. 4Naqwit atite' Qajaw Jesukrist twitz tx'otx', mixti'x petlo sok te pale, qu'n ate'tlkye pale twitz tx'otx' nche kub' q'onte oyaj chqo'nqe' toj tkawb'il Moyses. 5Tkyaqiltzunte' nkyb'incha'n pale lu twitz tx'otx' toju' kyajb'eb'l te Dyos, noqx jun techlal ex noq jun t-xlekumalju' ati toj kya'j, qu'n tej tb'inchante Moyses ja xjan, tzaj tma'n Dyos te kjalu: B'inkuya b'a'nxi'x ex b'ichanxa kse'nxju' oje txinma'ne' teya twi' witz, chi Dyos te. 6Atzunte' tnejel qpale, matxi' tk'am jun nimaq toklen te pale tb'anilxi'x, ate ntzaj chik'b'ante yol kyejni b'entti'j tu'n Dyos tb'anilxi'x, tb'anilxi'xju' ntzaj ttziya'n qe kyetwitzju' tnejel. 7Naqwit okju' tnejel yol kyejni b'entti'j tu'n Dyos tzinunxi'x ti'j, myawtlo ilti'j tu'n tb'entti'j juntl tkab' yol. 8Tka'yitzunte Dyos ati kypaltilju' xjal, tmatzuntz kjalu: Tzul tq'ijlalil —chi Qajaw— kjel b'entti'j jun ak'a'j yol wu'ne' kyuk'i'l aj Israel ex aj Juda. 9Mikxa'tl te yol lu kse'n kyej b'entti'j wu'ne' kyuk'i'lju' ojtxi' kyajilb'ene', tej chab'axi'x eb'je'tz nxko'ne' tu'n kyetz wiq'ine' toju' tx'otx' Ejipt; Aye'tzunkye min xjapunju' yol kyu'n, qu'mtzun mache kyej nleb'a'ne', —chi Qman Dyos—. 10Ate' ak'a'j yol kjel b'entti'j wu'ne' kyuk'i'l aj Israel toju' tq'ijlalil tzul, aja'lu, —chi Qman Dyos:— Kche kb'el nq'o'ne' nkawb'ile' toj kynab'l ex che kjel ntz'ib'a'ne' toj kyanmi. Ayine' chin nokyel te Kydyos aye'tzunkye che okyel te ntaname'. 11Min nojqelantl tu'n tq'on xnaq'tzb'il jun te juntel, jun kyxjalil mujqa kywitze'l tu'n telkynik' wi'je' ayine' Dyos, qu'n kykyaqil k'elelkynik' weye', k'elelkynik'ju' b'o's exqe' nimaq. 12Kb'el najsa'ne' kyb'inchb'aj myab'a'n ex lay che tzaj nna'ntle' kyil, chi Dyos. 13Tu'ntzunju' nyolin Dyos ti'j juntl ak'a'j yol tu'n tkyej b'entti'j quk'i'l, intchik'b'a'n qa ojtxi'tlju' tnejel yol kyejni b'entti'j, mixti'tl tajb'en ex in nojqelan tu'n tkub' naj.

will be added

X\