Hebreos 7

1Ate Melkisedek nimaqkawiltoq toj tnam Salem ex paletoq te Dyos nimxi'x toklen. Tej tanjtzti'j Ab'raam toj q'oj, tkub'lenxi' kyi'ju' nimaqkawil tu'n, etz Melkisedek k'lulte ex kub' tky'iwla'n Ab'raam; 2xi'tzun tq'o'n Ab'raam tlajoji'n tnej te Melkisedek ti'j tkyaqil tkamb'a toju' q'oj. Aju' b'iyj Melkisedek a tz'elpuna'ju' nimaqkawil tnik'alxi'xti'j, expe' a juntl tb'iju' nimaqkawil toj Salem, atz'elpuna'ju': nimaqkawil q'ol nak'b'il. 3Mixti'x b'i'n alkye tman Melkisedek, alkye ttxu ex alkyeqe' ojtxi' tyajilb'en; min b'i'n jtoje titz'ji ex jtoje tkyim; ikyininxju' kse'n Tk'wal Dyos, aju' pale tejumajx. 4Nimxi'xte' toklen Melkisedek, qu'n xitq'o'n qyajilb'en Ab'raam tlajoji'n ti'ju' tkanb'a toj q'oj te. 5Kse'n intma'n toj tkawb'il Moyses, ati kyoklenju' pale tyajajil Leb'i tu'n tel kypeyu'n tlajoji'n tkyaqil ti'xti' kyi'ju' tnam, aye'xju' kywnaqil, maskye tyajajilx Ab'raamqe'. 6Atzunte Melkisedek, maskyepe' mya tyajajil Leb'i, tk'amju' tlajoji'n te Ab'raam ju' ojetoq ttziya Dyos tyol te. Ex kub' k'iwla'n Ab'raam tu'n Melkisedek; 7ex mix-a'lox kb'entel tewante qa nimxi'x toklenju' ink'iwlan kyetwitzju' nkub' k'iwla'n. 8Aye'kye' nche k'monte tlajoji'n toju' tq'ijlalil ja'lo, ichanqe' inche kyim; atzunte' intma'n toj tu'jil ti'j Melkisedek, kukx ttenju' qu'm mixti' intma'n toj Tu'jil qa oje kyim. 9Toj juntl tu'me'l, aye' pale tyajajil Leb'i inche peyun tlajoji'n ja'lo, xikychjo'n tlajoji'n te Melkisedek tej t-xitchjo'n Ab'raam te; 10qu'n tu'nju' tyajajil Ab'raamqe', maskye na'mxtoq kyitz'ji, naku'j aye'jun ate'toq tej tetz Melkisedek k'lulte Ab'raam. 11Kyk'am aj Israel tkawb'il Moyses nyolin kyi'ju' pale tyajajil Leb'i, aye' tyajajil Aaron. Naqwit mache okju' aj Israel tnik'alkyi'j kyu'n pale lu, myawtlo ilti'j tu'n ttzaj juntl pale junxi'tl, kse'n toklen Melkisedek mya tyajajil Aaron. 12Qama che ch'exb'etkye' pale, ex ati tu'n tch'exb'etju' kawb'il; 13myana' tyajajil Aaron te' Qajaw, kse'n intma'n toj Tu'jil, xi'tzajna'te ti'j juntl tnej kyajil aj Israel b'ajx tz'etza' jun pale kyxol. 14Qu'n b'i'nxi'x qu'n qa xi' itz'ja' Qajaw Jesukrist ti'j tyajajil Juda; ex tej tyolin Moyses min tma qa che okyel aj Juda te pale. 15Chik'lixi'xtzuntz qa aju' k'a'j pale lu junxi'tlte', ikx toklenju' kse'nte Melkisedek, 16min sok te pale tu'nwtju' tyajajil kse'n intma'n kawb'il, ma tz'okte' te pale tu'nju' tchwinqlal mlay b'aj. 17Qu'n intma'n Dyos ti'j toj Tu'jil kjalu: Aya pale tejumajx, ikx toklenju'ya kse'nte Melkisedek, chij. 18Ikytzu'n makyej najte' ojtxi' chaq'b'il tu'n tpaj mixti' tipumal ex mixti' tajb'en, 19qu'n min xb'ent kyokju' xjal tnik'alkyi'j tu'n tkawb'il Moyses, ex ma tzaj q'o'n jun q'uqb'ab'l qk'u'j b'a'nxi'x te t-xelju' kawb'il lu, tu'n qpon lq'e tk'etz Dyos. 20Tzaj tna'nte Dyos tb'i tej tok Jesukrist te pale, atzu'n tej kyokju' txqantl pale min tzaj tna'n tb'i, 21atzu'n tej tok Jesukrist te pale tzaj tna'n Dyos tb'i ti'j, qu'mtzun tz'ib'a'n toj Tu'jil kjalu: Tzaj tna'nte Dyos tb'i ti'j ex lay tch'exb'eju' tyol qu'n tma: Aya pale tejumajx, chij. 22Ikytzu'n a Jesus tziyante ex tq'uqb'axi'x tk'u'jlalil, qa ktb'incha' tu'n tjapunju' yol kyej b'entti'j tu'n Dyos tnejel. 23Aye'tzunkye' txqantl pale, nimxi' matxi' che b'ajten tu'n tpaju' nche kyim; 24atzunte' Jesus mina' junti' nkyim, lay kyej tq'o'nju' toklen te pale te juntl. 25Qu'mtzun ati tipumal Jesus tu'n kykletju' xjal tu'n tejumajx, aye' inche pon lq'e tk'etz Dyos noq tu'nel, qu'n itz'te' Jesus tejumajx tu'n tkub'san twitz Dyos kyi'j. 26Qu'mtzun ate Jesus kynejel pale atixi'x tajb'en qe. Qu'n ate Jesus xjan te, mixti' til ex mixti'x ttz'ilil tanmi, pa'ntib' kyi'j aj il ex nimxi'x toklen kyetwitz kya'j. 27Mikxa'ju' kse'nqe' txqantl kynejel pale, inche kub' kyb'yo'n alu'mj te chojb'il atl junjun q'ij, tnejelxi'x te chojb'ilte kyil, yajxi'tzuntl te chojb'ilte kyilju' tnam. Atzunte Jesus noq junx maj oje txi' tq'o'n chojb'il kyil xjal ex tejumajx, qu'n aku'te xitq'o'ntib' tu'n tkyim. 28Ate intma'n toj tkawb'il Moyses tu'n kyok kynejel pale, aye' mixti'x njapun kyu'n twitz Dyos. Atzunte' tzajni ttziya'n Dyos qe tib'ajxi'ju' tkawb'il Moyses, tma Dyos qa k'okyel tq'o'nju' Tk'wal te kynejel pale, tz'aqli toj tkyaqil tejumajx.

will be added

X\