Hebreos 5

1Kykyaqilju' kynejel pale, inche jaw sk'o'n kyxol xjal ex in okq'o'n kyoklen tu'n kyyolin kyi'j xjal twitz Dyos, ex tu'n tkub' kyq'o'n oyaj ex chojb'il tu'n tchjet kyil xjal. 2Intzaj q'aq'an tk'u'ju' kynejel pale lu kyi'ju' mixti' b'a'n kyu'n ex kyi'ju' nche eltxalpuj ti'j Dyos, qu'n ikxnate mixti'xi'x tipumal; 3tu'ntzun tpaju' mixti'xi'x tipumal, ilti'j tu'n txitq'o'n chojb'ilte til ex chojb'ilte kyilju' tnam. 4Mix-a'lox jun xjal kb'entil t-sk'ontetib' tib'xtib' tu'n tok te nejenel, qu'n aku'te Dyos ntzaj txkonte ex aku' nokq'onte toklen kse'nte Aaron. 5Qu'mtzun ikxte Kristju' mya' tu'nxtib' oka' te Nejenel, aku'te Dyos okq'onte toklen, qu'n a Dyos q'mante te kjalu: Ateju'ya nk'wale'; matxi' txi' nq'o'ne' tchwinqlala ja'lo, chi Dyos. 6Ex xitma'n Dyos te toj jun tnejtl Tu'jil kjalu: Aya pale te jumajx, ikx toklena kse'n toklen Melkisedek, chij. 7Tej tten Jesukrist twitz tx'otx', na'n Dyos tuk'i'l tkyaqil tipumal expe' majx oq' twitz Dyos inxi'xtoq kub'san tu'n tklonjtz toju' kamik; tzajtzun ttzaq'we'n Dyos tkub'sb'il tu'nju' atixi'x tchiylal Dyos te. 8Tu'npetzu'n aku'te Krist Tk'wal Dyos, b'ent tnimet Dyos tu'n toj tkyaqilju' yajb'il ik'xtu'n; 9Tetzunj tjapun tzqet tkyaqil tu'n, oktzuntz te b'inchal kolb'il tejumajx kye kykyaqilju' nche okslan te, 10ex oktq'o'n Dyos te Kynejel pale kse'n toklen Melkisedek. 11Nimte' tu'n qyolin ti'j ja'lu, naqtzun aju' ch'uẍ tu'n tb'ajx nchik'b'ane' kyeye', qu'n mya lwiy nkane toj kywitze'. 12Ayepe'wtlokye' nche q'o'n xnaq'tzb'il ja'lo tu'nju' ojtxi' okslalqeye'; atzunte' ape' kyajb'iljuye' tu'n kyxi' xnaq'tzet jumajtle' kyi'ju' tal tnejel xnaq'tzb'il ti'j tyol Dyos. Matxi' che okye' naku'j ne'ẍ o'kx kyajb'il kych'uye', atzu'n wab'j kuw min nxi' kyu'ne'. 13Aye'tzu'n inx che ch'u'n ikqe'ju' kse'n jun ne'ẍ, min nelkynik' ti'ju' xnaq'tzb'il tnik'alxi'xti'j. 14Aye'tzunkye' xjal matxi' che ch'iy a kywaju' wab'j kuw, aye'ju' inel kynik' ti'ju' b'a'n ex ti'ju' myab'a'n, qu'n matxi' tzik' kywitz ti'j nim ti'xti'.

will be added

X\