Hebreos 4

1Qu'mtzun, atixku' anb'il qe tu'n qok toju' ojb'il tzajni ttziya'n Dyos, ati tu'n txi' qka'yi'n qib', qu'n jaku' ati junqe min b'ent tokx toju' ojb'il kub'ni tb'incha'n Dyos. 2Qu'n matxi' tzaj pakb'a'n tpakb'al b'a'n qe, kse'n xipakb'a'n kye xjal ojtxi'; aye'tzunkye mixti'x ajb'en kye, qu'n kyb'i extzun min xikyoksla'n. 3Ayo'tzunqe oje qo' okslan te, qo'qe' okyex toju' ojb'il b'incha'n tu'n Dyos, kse'nju' oje tma: Qu'mtzun oje tzaj nq'oje kyi'j ex oje txinma'ne' kye qa lay che okx toju' ojb'il b'incha'n wu'ne' Dyos, chi Dyos. Tma Dyos ja'lu, maskye ojetoq b'aj b'entju' taq'un, atxi'x tej tb'ent tkyaqil twitz tx'otx'; 4qu'n ati jun tnej toj Tu'jil tyol Dyos nyolin ti'ju' twuqi'n q'ij ex intma'n kjalu: Ojlante Dyos tej tb'entju' taq'un toj twuqi'n q'ij, chij. 5Ex intma'n jumajtl toju' Tu'jil tyol Dyos: Lay che okxkye' toju' ojb'il b'incha'n wu'ne', chij. 6Aye'ju' e' b'inte tpakb'al b'a'n nejku' min ẍe'okx toju' ojb'il tu'n tpaj min xikynima'n Dyos. Atzunte tzajni ttziya'n Dyos atixte' kyeju' junjuntl na'mx kyokx. 7Qu'mtzun matzaj tq'o'n Dyos jun q'ijtl anb'il, aju' tq'ijlalil ja'lo, ex matzaj tma'n qe kse'n tma ojtxi' kye' aj Israel tu'nel Dab'i kjalu: Qama kyb'iye' ntma'n Dyos ja'lo, lalun kub' kych'uẍsa'n kyanmiye', chij. 8Qu'n naqwit xitq'o'n Joswe ojb'il kye aj Israel, mixti'wtlo yolin ti'j juntl tq'ijlalil. 9Qu'mtzun atix jun q'ijtl anb'il kyeju' ttanam Dyos tu'n kyokx toju' ojb'il kub' tb'incha'n Dyos; 10alkyete matz'okx toju' ojb'il b'incha'n tu'n Dyos, k'ojlaltzuntz toju' taq'un, ikse'nte Dyos ojlan tej tb'aj b'entju' taq'un. 11Qq'onktzun tilil tu'n qokx toju' ojb'il b'incha'n tu'n Dyos, tu'n mix-a'lo' tz'ok kse'nqe'ju' min xikyoksla'n tyol Dyos. 12Qu'n itz'te' tyol Dyos ex ati tipumal. Tzayunxi'xte' twitzte kyetwitz jun k'uẍtx'e'nb'il jqu'n twitzte toj kykab'il plaj, majx in okpun tojxi' qanmi ex tzmax toj kyaqamil qb'aqil; inb'aj tka'yi'n tkyaqilju' qxim ex tb'is qk'u'j. 13Mixti'x jun tb'inchb'aj Dyos kb'entel tewin twitz, qu'n tkyaqil ti'xti' q'ancha'lile' twitz Dyos, ja kxe'la' qchik'b'a'n tkyaqilju' qb'inchb'en. 14Ate Jesus, Tk'wal Dyos, Kynejel pale nimxi'x toklen qe oje pon kanun toj kya'j. Qu'mtzun ati tu'n qwab'anteqib' toj qokslab'l ti'j. 15Qu'n aju' kynejel pale qe intzaj q'aq'an tk'u'j qi'j tu'n tpaj mixti' qipumal, qu'n ikx okte toj joyb'ilti'j tu'n tajaw il kse'nx nqo' ik'a'; naqtzun ate mixti' b'inchan il. 16Qoqe' lq'extzun tk'etz Dyos qek qk'u'j tu'n qpon kanun twitzju' tq'uqb'il jata' t-xtalb'il, tu'ntzun qtzajtq'o'n t-xtalb'il qe toju' tq'ijlalil inxi'x ojqelan toj qchwinqlal.

will be added

X\