Hebreos 3

1Qu'mtzun e'ntzik ex e'witz'in, aye'ye' oje che txokliye' tu'n Dyos tu'n kyokye' teku'xi'x, che ximanqe'ye' ti'ju' Jesukrist, Chq'o'n ex Kynejel pale nimaq toklen toj qokslab'l. 2Qu'n oktq'o'n Dyos toklen Jesus nimxi'x, kse'n jun kynejel pale, ex tkyaqilju' tyol Dyos japunxi'x tu'n, kse'nte Moyses japunxi'x tkyaqil tu'n kyxolju' ttanam Dyos. 3Atzunte Dyos oktq'o'n toklen Jesus nimxi'x kyetwitz Moyses, ikse'n jun b'inchal ja, nimxi'x toklen kyetwitzju' ja nb'ent tu'n. 4Qu'n tkyaqil ja ati jun b'inchalte; ikxtzunte Dyosju' ate b'inchante tkyaqilju' ati. 5Ajb'ente Moyses te Dyos, japun tu'n toj tkyaqil tajb'eb'l kyxol ttanam Dyos, ex ttziyaju' oktoq tma' Dyos yajxi'tl. 6Atzunte Krist K'walb'ajte, japunxi'x tu'n kyxolju' ttanam Dyos, ayo' qa q'uqli qk'u'j ti'j kukxju', exqa kukxju' nqo' ayon ti'j toj tzalajb'il. 7Qu'mtzun kse'n intma'n Xewb'aj Xjan toju' Tu'jil tyol Dyos kjalu: Qama kyb'iju'ye' intma'n Dyos ja'lo, 8Lalun kub' kych'uẍsa'n kyanmiye' kse'n kyb'incha aj Israel tej tok kyq'o'n ttx'u'jil Dyos ex okkyq'o'n Dyos toj joyb'ilti'j toj chq'ajlaj. 9Qu'n tma Dyos kjalu: Atzu' noka'ye' toj joyb'ilwi'je' kyu'n ojtxi' kyajilb'ene', extzun matxi'toq tz'ok kyka'yi'n nb'inchb'ene' toju' kab'naq ab'q'i. 10Qu'mtzun tzaj ntx'u'jile' kyi'j, ex nmaye': Kukx kytenjuye' chukjni kynab'le', ex min kyajb'ile' tu'n kyoklpeye' wi'je', nchije'. 11Qu'mtzun tzaja' nq'oje kyi'j ex nmaye' kye qa lay che okx toju' tx'otx' te ojb'il wu'ne', chi Dyos. 12Qu'mtzun, kyka'yinx kyib'e' e'ntzik ex e'witz'in tu'n lalun tz'el kypa'n kyib'e' ti'ju' Dyos itz'; qu'n jaku' tu'n tpaj kyanmiye' myab'a'n mintz'oka' qe kyk'u'je' ti'j Dyos. 13Kyq'uqb'am pe'kye' kyk'u'j kyxolilexe' atl junjun q'ij, atixku' anb'il tu'n kyb'inchanteye', tu'ntzun lalun kub' sb'u'n junkye' tu'n il ex tu'n lalun che okye' pi's twitz Dyos. 14Qu'n atiqe qoklen tuk'i'l Jesukrist, qa kukx qtenju' wa'lqoxi'x toj qokslab'l exqa q'uqlokxi'x qk'u'j ti'j kse'nxju' tnejel. 15Qu'mtzun intma'n toj Tu'jil kjalu: Qama kyb'iju'ye' intma'n Dyos ja'lo, lalun kub' kych'uẍsa'n kyanmiye' kse'nqe' aj Israel okkyq'o'n ttx'u'jil Dyos, chij. 16¿Alkyeqe'tzu'n eb'inte tyol Dyos ojtxi', ex e'okten q'olte ttx'u'jil Dyos? Kykyaqilju' eb'je'tz tiq'i'n Moyses toj Ejipt. 17¿Ex alkyeqetzu'n tzaj ttx'u'jil Dyos kyi'j toju' kab'naq ab'q'i? Aye'ju' eb'inchan il ex axtzu' e'kyaja' kyim toj chq'ajlaj. 18¿Ex alkyetzun xa'ya' tma'n Dyos qa lay che okx toju' tx'otx' te ojb'il tu'n Dyos? Kyeju' min xikynima'n tyol Dyos. 19Atzuntzu' nka'yina', qa min e'okxju' aj Israel toju' tx'otx' jatoq tu'n kyojlana' tu'n Dyos, tu'n tpaj min xikyoksla'n tyol Dyos.

will be added

X\