Hebreos 2

1Qu'mtzun ati tu'n tok tenxi'x qnab'l ti'ju' yol matxi' qb'i, tu'ntzun lalun tz'el qpa'nqib' ti'j Dyos. 2Nimxi'xpena' toklenju' chaq'b'il kyma anjl ojtxi', aye'tzu'n mixti' xikynima'n ex eb'jik' tib'aj, kub' tz'e'ysa'n kywitz tojxi'x tu'me'l. 3¿Yajtzunqe, se'ntaq'wi tu'n qtzaqpaj teju' tz'e'ysb'il witzb'aj, qama kyej qtzaqpi'nju' kolb'il nimxi'x toklen? Qu'n aku'te Qajaw pakb'ante tqanil ti'j kolb'il tnejelxi'x, aye'tzu'n eb'inte kyma qa axxi'xju' yol lu, ex aye' ẍekyej q'onte qe. 4Ex aku'te Dyos tzaj kuwsantexi'x qa axju' yol tzaj tma'n qe kyu'n techlal, kyu'n tb'inchb'en tb'anilxi'x ex txqan b'a'nq'ob'aj b'ent tu'n Xewb'aj Xjan toj chukchaq tu'me'l, kse'nxju' tajb'il Dyos. 5Qu'n min tmate Dyos kye anjl tu'n kykawin kyib'aju' xjal toju' tq'ijlalil tzul, aju' nqo yolin ti'j. 6Tchik'b'a pe'na' jun toju' tyol Dyos kjalu: ¿Titi'tzun toklenju' ichan? ¿titi'tzun kyoklenju' xjal? ¿Titi'qu'n intzaja' tna'na ex inxi'x ximana kyi'j? 7Oktq'o'na jte' q'ij naqch'i'n toklen kyekywitz anjl, extzun oktq'o'na toklen nimxi'x tu'n tjaw nima'n; 8tkyaqil kub' tq'o'na tjaq' tqan tu'n tkawin kyib'aj, chij. Tu'ntzunju' kub' tq'o'n Dyos tkyaqil tjaq' tqanju' ichan, tkyaqil kyejten tjaq' tkawb'il. Na'mxtzun qlonte ja'lo qa tkyaqilwit tkub' tjaq' tkawb'il ichan. 9Lutzunte' Jesus, oktq'o'n Dyos jte' q'ij naqch'i'n toklen kyekywitz anjl, atzun ja'lo matxi' q'o'n toklen nimxi'x ex majaw nimsa'n naq tu'nju' ik'x kamik tu'n, kyim naq tu'n qpaj qkyaqil tu'nju' t-xtalb'il Dyos. 10Kub' tb'incha'n Dyos tkyaqilju' ti'xti' tu'n tajb'en te, ex a tajb'il Dyosju' tu'n kyten kykyaqil tk'wal tuk'i'l toj tajwalil. Qu'mtzun atitoq tu'n tok Jesukrist tz'aqlixi'x tu'n Dyos tu'n tik'x tkyaqilju' yajb'il tu'n ex tu'n tok b'inchalte kolb'il kyeju' xjal. 11Aye'tzunju' mache eltpa'n Krist tu'n kyajb'en o'kxte Dyos, junx kyman tuk'i'l Krist sel pa'nkye; qu'mtzun mixti' nch'ixwite Krist tu'n kyoktq'o'n te titz'in. 12Qu'n intma'n toj Tu'jil kjalu: Kxe'l npakb'ane' tb'iya kyeju' witz'ine', ex chin b'itzale' ti'ju' tb'iya toju' b'u'yb'il kyib', chij. 13Ex ikx intma'ntl kjalu: Atzu' kqeb'ila' nk'u'je' ti'j, chij. Ikx jumajtl intma'n: Luqine' atinqine' kyuk'ilju' k'wa'lb'aj e'tzaj tq'o'n Dyos weye', chij. 14Ikse'nqe' k'wa'lb'aj kyitz'inkyib' junx kychib'jil ex kychk'el, ikyxtzunte Jesusju' tej tok te xjal, ok te xjal tu'n tb'ent tkyim, tu'ntzun tkub' t-xitu'n tipumal tajaw kamik, aju' tajaw il. 15Tu'ntzu'n tkamik, ẍetzaqpeta'ju' xjal nche' xob' te kamik tkyaqil q'ij. 16Qu'n min ulte' Qajaw Jesukrist onilkye anjl, xi' u'late' onilkyeju' tyajajil Ab'raam. 17Tu'ntzun tb'ent tonin kyi'ju' xjal atitoq tu'n tok ikxju' kse'nkye, tu'ntzun tok te jun kynejel pale, in japunxi'x tu'n toj tajb'eb'l twitz Dyos, ex tu'n tchjet kyil xjal tu'n tu'nju' tkamik. 18Tu'ntzunju' yajtite Krist ex ok toj joyb'ilti'j tu'n tajaw il, qu'mtzun ati tipumal tu'n tonin kyi'ju' nche ok toj joyb'ilkyi'j.

will be added

X\